Read zande 2 SAMUERE 19 Bible Online

2 SAMUERE 19 - zande bible

2 SAMUERE 19

¹I ki gumba ha fu Yoaba “Mongere, bakindo nakpara ni aume ki nirungo tipa Abisaroma.”

²Gayo diabese ki sa tihe ni gu uru re ni kina rago ginahe fu aboro dunduko; bambiko aboro agi he ni gu uru re ya, “Bakmdo narungo tipa wiriko bakere.”

³Ni gu uru re aboro ki karaga tiyo ni gbuko ku bakporo yo, wa agu aboro zee nimángi yo ho i nioro ni ti ngba vura ni gbuko.

⁴Bakindo ki dadi kpakpuko, ki nikpari ni bakere wawa, niya, “Ako Abisaroma wire, Ako Abisaroma wire, wire!”

⁵Si du Yoaba aye fuo bakindo ku dimoyo, ki ya fu ko, “Mo wasi avururo areme dunduko, nga agu yo nibatasi ungaro ni gi uru re, na unga awiro nga akumba na ade a, na adiaro, na gamo adebadia a;

⁶wa mo akpi kina nyemu agu yo nasoga ro, ki sogo agu yo nakpi nyemu ro. Bambiko mo nayugo ho areme, ya gamo abazogo na avururo, he nga yo bangiro te; bambiko mi bi he areme, ya ka Abisaroma nakpi nga ya, kina rani ki kpiki dunduko, ka si ngba angba ti ro wenengaĩ.

⁷Awere mo gúari tie, ki kuru, ki ngarãsi avururo; bambiko mi zunga he ti rimo Yekova, ya, ka mo akúra nga ya, ni gi yuru re boro anyé nga fuo ro wa sa te. Rago agbérã ti ro ki susi gu nagberẽ ti ro wa mo adu ni parangaro ki da ku awere.”

⁸Bakindo ki guari, ki sungu pa ngbadimo bakporo. I ki gumba ha fu aboro dunduko, ki ya, “Oni ngére, bakindo sungu pa ngbadimo bakporo”; aboro ki ye dunduko ku bara bangiri bakindo. AYisaraere aoro dunduko gu ni ku rogo gani bamburoko.

⁹Aboro dunduko ki nidarĩ kangu he dagba angbatunga aYisaraere, ki ya, “Bakindo anabatasa rani be avurarani, ko ni tiko natuka rani be aFereseto; ono awere ko oro rogo gi ringara re be Abisaroma.

¹⁰Ono Abisaroma nga gu ko ani ambedi ko ki moi ko ku ri rani, ko kpi be vura. Wa du he were, tipagine oni agumba nga pai ti ni ya i yega na bakindo ya?”

¹¹Bakindo Dawidi ki kedi sunge koyo du aSadoka ni na Abiatara nangia aboromotumo, ki ya, “Oni gúmba nga pai fu ga aYudo abaakumba ki ya, ‘Tipagine nye oni koyo ti ni ni yangara aboro he yega na bakindo ku kpuko yo? wa sangba aYisaraere dunduko naima ye koyo du bakindo ni, ya i yéga na ko kina ku kpuko yo.

¹²Oni tigaoni nga awirinami, oni nga amemere na pasiore, tipagine nye oni koyo ni yangara aboro he yega na bakindo berewe?’

¹³Oni ki ya fu Amasa, ‘A nga amemere nga mo na pasiore te? Mbori mángi wo fere, na kura ha a wo, ka mo adú nga ni barutiri rimbasa aborovura bara bangire kindi ku ba Yoaba ya.’ ”

¹⁴Ko ki sa kpoto aboro aYudo yo dunduko, i ki du kpotoyo yo wa kina boro sa. Si du i akedi gi pai ti ni re koyo du bakindo ni niya, “Mo káraga tiro tigamo, na gamo amoyambu dunduko.”

¹⁵Si du bakindo ki karaga tiko, ki da ti ngba Yaradene; aYudo ki da Girigara yo, ka ndu ka gbia bakindo, ki yega na ko ku mbiti Yaradene no.

¹⁶Simi nangia wiri Gera, ni ngbatunga Benyamina naadu Barurima yo, ki ye ni ipo na aboro Yuda ka gbia Bakindo Dawidi;

¹⁷angbatunga Benyamina ki du na ko wa aboro 1,000, Ziba nangia ga ngbatunga Saura moyambu, na awiriko 15 na avuruko 20 a, i ki nisi Yaradene ku bangiri bakindo.

¹⁸I ki sikisi ga bakindo aborokporo na kurungba ki mangi gu pai ko akpi nyemu he. Simi wiri Gera ki ti sande ku bara bangiri bakindo, ho ko asi aYaradene ni.

¹⁹Ko ki ya fu bakindo, “Ka gi gbia gédi nga irairapai kuti re ya, ka mo tingidi nga gu pai vururo amangi ngba waka ni gu uru gi gbia bakindo akuru Yerusarema yo a ya, ka bakindo bérẽ nga pa ha ku kpotoko yo kindi ya.

²⁰Bambiko vururo ini he ya mi tigimi amangi ingapai; si du ye mi ti ni ni bambata boro areme dagba ngbatunga Yosefa yo dunduko ka zorã ka gbia gi gbia nga bakindo.”

²¹Ono Abisai wiri Seruya ki karaga ha ki ya, “Ka i ími Simi aimo tipa gi pai te re? wa ko agberẽ ngbako yo fu ga Yekova mbedimbedi boro?”

²²Ono Dawidi ki ya, “Sa gimi na oni, oni awiri Seruya, oni nikadu ni akitingbangare areme? Ka i imi boro areme dagba aYisaraere? bambiko mi tigimi ini he nga mi nga bakindo aYisaraere areme, te?”

²³Bakindo ki ya fu Simi, “Mo akpí nga te.” Bakindo ki zunga he fu ko.

²⁴Mefibosete tita Saura ki zorõ ka gbia bakindo; ko azunda nga nduko, watadu kpe maingbako a te, ka ko azunda nga gako roko a ya, tona ni gu uru bakindo amerẽ ki da ti gu uru ko ayega zezeredi.

²⁵Ho ko aye ni ku Yerusarema yo ka gbia bakindo, bakindo ki ya fu ko, “Mefibosete, tipagine mo andu nga ti ni na mi ya?”

²⁶Ko ki karaga ha ki ya, “Ako bakindo, gi gbia, gi moyambu anangi re; bambiko ga moyambu aya fu ko, ‘Mo mbákadi dongi, nga gu ru mi ka ora auru ru, ani ndú na bakindo.’ Bambiko gbarĩgbarĩ boro nga ga moyambu.

²⁷Ko ki gumba rimo ga moyambu fu gi gbia nga bakindo. Ono gi gbia nga bakindo wa kina gu maraika nga ga Mbori ko; si du mo mángi kina gu pai ngba bangiro.

²⁸Bambiko ngbatunga buba adu wa kina kangba aboro bara bangiri gi gbia nga bakindo; ono mo amoi ga moyambu dagba agu yo nari riahe auru ga mbisa. Gini pai dũ be re kindi nga gu ka mi kpari pa ha berewe fu bakindo?”

²⁹Bakindo ki ya fu ko, “Tipagine mo agumba pai ti ni berewe tipa gamo apai? Mi aya, oni na Ziba kpáraka ringara.”

³⁰Mefibosete ki ya fu bakindo, “Ako, ko dí he adia dũ, bambiko wa bakindo nayega zezeredi ku kpuko no.”

³¹Baruzirai boro Girada ki ye Rogerima yo; ko ki si Yaradene na bakindo, ka gasa ko.

³²Were Baruzirai angia kuru gbinza kumba, garãko adu 80. Ko naafu ũngba fu bakindo ho ko araka ni Manaima yo; bambiko bakere boro nangia ko.

³³Bakindo ki ya fu Baruzirai, “Ani si na mo ku mbiti yo, mi afú ũngba foro Yerusarema yo.”

³⁴Ono Baruzirai ki ya fu bakindo, “Agarãre waĩ ku mbata yo kindi, ka mi ga na bakindo ku Yerusarema yo?

³⁵Garãre da ku areme nga 80; mi rengbe ka ina wenepai na gu ngba? Ga moyambu rengbe ka ia gu he mi ari watadu gu he mi ambira? Mi rengbe ka gia fugo abayango na anayango berewe? Tipagine ka ga moyambu du ti ni ni ũmbugo fu gi gbia nga bakindo?

³⁶Ga moyambu akpi nyemu ka si kina Yaradene na bakindo. Tipagine ka bakindo tumo fere na ngbatunga mosoro wa gure?

³⁷Mi nakpara foro, mo ídi fu ga moyambu, ko karaga tiko berewe, ya mi kpi kina rogo gi bakporo, pati murã buba na nina. Ono mo ngére, ga moyambu nga Kimama du re; ko sí ku mbiti yo na gi gbia nga bakindo; mo ki mangi gu pai fu ko ka ngba ti ro.”

³⁸Bakindo ki karaga ha ki ya, “Kimama nikasi na mi ku mbiti yo, mi amánga gu pai fu ko nga gu nikangba angba ti ro; gu he mo ka niidi be re, mi animangi gu amanga re foro.”

³⁹Aboro dunduko ki si Yaradene, bakindo ki si a; bakindo ki dungo Baruzirai, ki fu maku fu ko. Ko ki ga ku kpuko yo.

⁴⁰Bakindo ki si ki ndu ku Girigara yo, Kimama ki ndu na ko a. Aboro aYudo dunduko ki gasi bakindo, na bete aboro aYisaraere a.

⁴¹Akumba aYisaraere dunduko ki ye koyo du bakindo ni, ki ya fu bakindo, “Tipagine awirinarani nga akumba aYudo adi ro ti ni, ka yega na bakindo, na gako aborokporo, i si Yaradene, ga Dawidi aboro dunduko na ko a?”

⁴²Akumba aYudo dunduko ki karaga ha fu akumba aYisaraere ki ya, “Bambiko mbedi ngbatunga bakindo ambeda na gaani. Tipagine du oni ti ni na zinga tipa gi pai re? Ani ri gu he ngbe bakindo? Watadu ko fu gamahe fu rani?”

⁴³Akumba aYisaraere ki karaga ha fu akumba aYudo ki ya, “Gaani pai ti bakindo wa apai bawe, ani tigaani du na apa rani rogo Dawidi ki susi roni. Tipagine tie oni apayasi rani ti ni? A nga kina rani nasana he ni bambata ha tipa karaga gaani bakindo, te?” Ono gu pai nangia ga akumba a Yudo adu ni kere he susi ti agu apai nangia ga akumba aYisaraere.