Read zande 2 SAMUERE 2 Bible Online

2 SAMUERE 2 - zande bible

2 SAMUERE 2

¹Fuo gere Dawidi ki sana Yekova ki ya, “Mi andú ku rogo gu bakporo sa nga ga Yuda?” Yekova ki ya fu ko, “Mo ndú koyo.” Dawidi ki ya, “Mi andú ku wari?” Ko ki ya, “Ku Eburone yo.”

²Si du Dawidi ki ndu koyo, na adiako ue a, nangia Ainoama boro Yizerere na Abigaira nangia dekurugbo Nabara boro Karumera.

³Dawidi ki ye na agu akumba naadu na ko, gu ni na kina gani aborokporo; i ki niraki rogo abaakporo Eburone yo.

⁴Aboro Yuda ki ye, i ki mbedi Dawidi yo ni bakindo ku ri ngbatunga Yuda. I ki gumba ha fu Dawidi, ki ya, “Aboro Yabese-girada naakpisidi kangba Saura.”

⁵Dawidi ki kedi asunge koyo du aboro Yabese-girada ni, ki ya fu yo, “Yekova fú maku fu roni, wa oni amangi weneringise fu gaoni gbia nga Saura, ki kpisidi kangbako!

⁶Awere Yekova mangi weneringise fu roni na yososopai! Mi amánga wenengaĩ fu roni a tipa gi weneringise re, bambiko wa oni amangi gi pai re.

⁷Si du beroni nyáki tie, oni dú ni ngangarã aboro; bambiko wa Saura nakpi, nga gaoni gbia, ono ngbatunga Yuda mbedi re ni bakindo ku ri yo.”

⁸Were Abinera nangia wiri Nere, nangia barutiri ga Saura rimbasa aborovura, ko adi Isa-bosete nangia wiri Saura, ki ye na ko ku Manaima yo.

⁹Ko ki moi ko ni bakindo ku ri Girada na aAsuro, na aYizerero, na aEfuraimo, na aBenyamino; na ku ri aYisaraere dunduko.

¹⁰Isa-bosete nangia wiri Saura garãko adu 40 ho ko atona ka zoga aYisaraere ni, ko ki zogo yo tipa garã ue. Ono ngbatunga Yuda ki ra fu Dawidi.

¹¹Ono Dawidi adu ni bakindo Eburone yo ku ri ngbatunga Yuda garã ki du saba na diwi sita.

¹²Abinera wiri Nere aguari Manaima yo ka ndu ku Gibona yo, na avuru Isabosete nangia wiri Saura.

¹³Yoaba wiri Seruya ki ndu na avuru Dawidi, ka gbia yo pangba gu munga du Gibona yo. I ki sungu sande, agu yo pangba munga ku bani, na agu yo ku pangba munga ku bani a.

¹⁴Abinera ki ya fu Yoaba, “Mo ídi fu agu aparanga re, i gúari ka ngi mbaro barangba rani.” Yoaba ki ya, “I gúari.”

¹⁵I ki guari ki si ku mbiti yo ni gedigedi yo, aboro 12 fu Benyamina na Isa-bosete wiri Saura, na avuru Dawidi 12.

¹⁶I ki nizi gayo aboro ni ba sa sa ti riyo, ki nirũpu pavuyo na basape; si du i ki nitiwi ku sande kina sa. Si du i aya ti ni ti gu ba re Erekata-azurima, nga gu nadu Gibona yo.

¹⁷Vura ki du ni kere he ni gu uru re, avuru Dawidi ki di be Abinera na aboro aYisaraere.

¹⁸Agu awiri Seruya naadu biata adu kina yo, Yoaba na Abisai na Asaere, Asaere ki du wa gu boro naora wa gbangbaria.

¹⁹Asaere ki nido fuo Abinera, wa ko ado fuo Abinera ko asa nga tiko ku kumbabe na ku garebe yo te.

²⁰Abinera ki ngere gii ko, ki ya, “Mo du, Asaere?” Ko ki karaga ha ki ya, “Mi du.”

²¹Abinera ki ya fu ko, “Mo ária tiro ku kumbabero watadu ku garebero yo, ki zi paranga sa dagba agu aparanga yo, ki di gani ũvura.” Ono Asaere akpi nga nyemu ka aria tiko ka mbu peka fuo ko te.

²²Abinera Ki ya fu Asaere berewe, “Mo ária tiro ku bani ti peka fuo re; tipagine ka mi imi ro ti ni ku sande? waĩ tie ka mi angera ku kpakpu Yoaba yo nga unvuruamo?”

²³Ono ko ki ka pa aria tiko ku bani, si du Abinera arũ vuko ti ni ni mburu baso, baso ki kuru gii ko yo; ko ki ti sande, ki kpi kina ho. Agu aboro naye ki da ti gu ba Asaere ati ni ku sande ki kpi, i ki ru kina ho zaa.

²⁴Ono aYoaba na Abisai ado fuo Abinera kindi. Uru ki ti ho i ada ni ti gangara Ama, nga gu du barangba Gia ngba gu gene ndu ku ngbakungba Gibona yo.

²⁵ABenyamino ki dungura tiyo fuo Abinera, ki du wa rika sa, ki mbakadi tiyo ki ru ri gangara.

²⁶Abinera ki yambu Yoaba, ki ya, “Basape niri ari kindi? Mo aina nga ha ya si adú ni nirãnirã pai ti digida ha giza te? waĩ rago ka ima tie, mo ki yambu aboro ti do fuo awirinayo?”

²⁷Yoaba ki ya, “Wa du Mbori ni ungako, ka mo nafura nga ya, ni rengo tie ka aboro ima ga wiso, ka boro apeka nga fuo wirinani ya.”

²⁸Si du Yoaba ki vu nambongo; aboro ki ru dunduko zaa, ka i ado nga fuo aYisaraere berewe ya, ka i aso nga vura berewe a ya.

²⁹Abinera na gako aboro dunduko ki ndu ni gu yuru re ku rogo kpasakpasa rago yo; i ki si Yaradene, ki ndu gayo nduge ki da mbata fu bebere uru ku Manaima yo.

³⁰Yoaba ki karaga tiko ngba fuo do Abinera yo; ho ko adungura aboro ni dũ, avuru Dawidi ki kpa 19 na Asaere a.

³¹Ono avura Dawidi aimi ga Benyamina aboro wa 360 naadu na Abinera.

³²I ki tumba Asaere, ki kpisidi ko rogo ga bako murã naadu Betereme yo. Yoaba na gako aboro ki ndu gayo nduge yuru sasasa, rago ki giri yo ku Eburone yo.