Read zande 2 SAMUERE 20 Bible Online

2 SAMUERE 20 - zande bible

2 SAMUERE 20

¹Kumba sa adu yo nga gbegberẽ sino boro, rimoko angia Seba, wiri Bikiri, ni ngbatunga Benyamina. Ko ki vu nambongo, ki ya, “He tipa rani na ga Dawidi kumbo te, a nga mosoro tipa rani be wiri Yisai te; Ako aYisaraere! oni ni ba sa sa gá ku kpuroni yo!”

²Si du akumba aYisaraere dunduko ki ga ti fuo peka Dawidi, ki nipe fuo Seba wiri Bikiri. Ono akumba aYudo ki ka kuti gayo bakindo nyanyaki, tona Yaradene yo ki da ku Yerusarema yo.

³Dawidi ki da ku kpuko yo Yerusarema yo; bakindo ki rogo gu gako adebadia naadu bawe, nga agu yo ko ambu yo i nibanda kporo, ki moi yo ku rogo vuru bambu sa ni bandabanda yo, ki nifu ũngba fu yo, ka ko andu nga koyo du yo ni berewe ya. Si du i akpara yo ti ni koyo dati kina kpioyo, i ki niraki wa adekurugbo.

⁴Bakindo ki ya fu Amasa, “Mo yámbu akumba aYudo fere dunduko rogo uru biata, oni ki du kina erẽ du.”

⁵Si du Amasa ki ndu ka yamba akumba aYudo dunduko; ono ko aima koyo tipa gbanga rago ki susi gu rago i aringbisi he fu ko.

⁶Dawidi ki ya fu Abisai, “Awere Seba wiri Bikiri amánga rani na gbegberẽpai susi gu Abisaroma amangi rani na ni. Mo rogo avuru ga gbia, ka do fuo ko, ko ka dia abaakporo du na ngapa pati he, k, ndu ka merã be rani.”

⁷Ga Yoaba aboro ki ndu fuo Abisai na aKereto na aPereto, na airanyaka dunduko; i ki ndu kuru Yerusarema yo, ka do fuo Seba wiri Bikiri.

⁸Ho i ada ni ti bambia nga gu du Gibona yo, Amasa ki gbia yo. Yoaba ki du na roko vura ti ko nga gu ko avodi tiko na ni, giri dimose ki du auru he na basape ti ni dimoko rogo fukaha, wa ko andu ku mbata yo si ki ti.

⁹Yoaba ki ya fu Amasa, “Mo du zezeredi, tamere?” Yoaba ki zi ko ti maingbako ni kumba beko ki dungo ko.

¹⁰Ono Amasa aberã nga pa gu basape nadu be Yoaba te; si du Yoaba arũ ko na ni ti vuko, ki uka reko auka du ku sande, ka ko aru nga ko ni uehe ya; ko ki kpi. AYoaba na unvuruako nga Abisai ki nido fuo Seba wiri Bikiri.

¹¹Boro aru pati Amasa sa nga ga Yoaba boro, ki ya, “Gu ni nairisa Yoaba, na gu ni du tipa Dawidi, ni péke fuo Yoaba.”

¹²Ono Amasa ki niwaranga rogo kureko bangiri bagene. Ho agu aboro nasusa pati ko abi ko ni, i ki ru zaa, ho gu ko abi he ni ya agu aboro dunduko ru zaa, ko ki tindi Amasa ngba bagene ku ati yo, ki ba roko ku auru ko.

¹³Ho i atindi ko ni ngba bagene, aboro dunduko ki ndu ku mbata yo fuo Yoaba, ka do fuo Seba wiri Bikiri.

¹⁴Seba ki nindu dagba angbatunga aYisaraere dunduko, ki da ku Abere yo, na ku Bete-maka yo; aboro Beri dunduko adungura tiyo adungura, ki nipeke fuo ko.

¹⁵Agu aboro dunduko naadu fuo Yoaba i ki ye ki ru nguru kuti ko Abere Bete-maka yo, i ki ba kanda kuti bakporo, si ki nyakasi ngapa, ka kua ha ku sande.

¹⁶De tatamana ki poi ku ari rogo gu bakporo re, ki ya, “Mi nakpara fu roni, Oni gi he! Oni gi he! Oni yá fu Yoaba, ‘Mo yé kono, mi fura nga na mo.’ ”

¹⁷Ko ki ye ki mbedi na ri, de ki ya, “Mo nga Yoaba?” Ko ki karaga ha ki ya, “Mi nga ko.” Ri ki ya fu ko, “Mo dége turo sa agu apai nga ga ga moyambu.” Ko ki karaga ha ki ya, “Mi nadega ture.”

¹⁸Ri ki ya, “I ainidi ka gumba pai bakuru yo, ki ya, ‘I sana he ni rengo tipa rugapai ku Abere yo’; si du i ki digisi gu pai re.

¹⁹Mi nga boro dagba agu aboro du Yisaraere yo naida pa zereda ki du ni airarengo. Mo nagbata pai ka gbarasa gu bakporo nga na aboro aYisaraere. Tipagine mo akpi nyemu ka nyasa ga Yekova aboro ti ni dunduko?”

²⁰Yoaba ki karaga ha ki ya, “Si arengba nga te, si arengba nga na mi te, nga mi ka nyasa yo watadu gbarasa yo!

²¹Wo du gu pai te re. Ono gu kumba nga ga ringara bagangara Efuraima, i niya ti ko, Seba wiri Bikiri natumba beko kuti Bakindo Dawidi; oni kúsi kina ko, mi nikaguari ti bakporo.” De ki ya fu Yoaba, “Mo ngére, i abá kina riko foro ri ngapa bakporo.”

²²De ki ndu koyo du aboro ni dunduko ni gari tatamana. I ki kati ri Seba wiri Bikiri, ki ba ha fu Yoaba ku zegi yo. Si du ko ki vu nambongo, i ki gbataka bakporo yo, aboro ni ba sa sa kina ku kpuyo yo. Yoaba ki karaga tiko ku Yerusarema yo koyo du bakindo ni.

²³Yoaba adu ku ri rimbasa aborosovura nga ga aYisaraere yo dunduko; Benaya wiri Yoyada adu ku ri aKereto na aPereto;

²⁴Adorama ki du ku ri zizi aborosunge. Yosefata wiri Airuda ki ngia batingidipai;

²⁵Sewa ki ngia bakeapai; aSadoka na Abiatara ki ngia aboromotumo;

²⁶Ira boro Yaira ki du ni boromotumo fu Dawidi.