Read zande 2 SAMUERE 23 Bible Online

2 SAMUERE 23 - zande bible

2 SAMUERE 23

¹Were agi apai re nga ga Dawidi yangara fugo: Dawidi wiri Yisai naya nga gu kumba i akiisi pa ko gbe, nga gu mbedimbedi boro nga ga gu Mbori nga ga Yakoba ko, nga gu bawene babibia tambuahe nga ga aYisaraere ko:

²“Ga Yekova Toro nafurarogo re yo, gako pai dũ ti mirãre.

³Mbori nga ga aYisaraere ko gumba ha, gu Mbia nga ga aYisaraere gumba ha fere: Ho boro nazoga aboro ni ni rurupai, nizogo aboro rogo gunde ti Mbori,

⁴ko du wa gu imarago nga ga wiso, ho uru nakura ni ni gu wiso zanga dubo, ho fogo nvuo nakura ni sende yo be imaima harago fuo na mai.

⁵Ni rengo angbatungare wo fu Mbori, te? Ono ko mangi nyenye zungahe na mi, ni rugurugu he rogo apai dunduko, ni ndikidi he. A nga gi bata na gu pai dunduko mi akpi nyemu he, ka ko kiisi nga pa ha, te?

⁶Ono gbegberẽ sino aboro dunduko adu wa agu akiwe i nabafa ha ku sa yo; bambiko ka i rogo nga yo ni be te;

⁷ono gu boro nazada yo ni ka voda tini na marã na para baso; i nazokoda yo kpakaya na we kina ku rogo gu ba yo.”

⁸Gere nga rimo agu airanyaka nangia ga Dawidi yo: Yoseba-basebeta boro Takemona, ko adu ni barumbatayo fu agu yo 30; kina ko nga Adino boro Esene, ko aimi aboro 800 ni gako baso ni kina gu uru sa.

⁹Fuo ko Erazara ki du nangia wiri Dodo, Dodo ki ngia wiri Awoa. Erazara naadu dagba agu airanyaka biata nadu na Dawidi, ho i apayasi pa aFereseto ni nga agu yo naadungura tiyo sa vura, akumba aYisaraere ki guari ku sa yo.

¹⁰Ko tigako aguari, ki mangi aFereseto daho beko ambu ni, beko ki dika tihe kuti pene basape. Yekova afu bakere diabese fu yo ni gu uru re. Aboro ki karaga tiyo fuo ko ka gbu kina ahe.

¹¹Fuo ko Sama ki du nangia wiri Age boro Arara. AFereseto adungura tiyo ni rikavura ku Rei yo, yo dagba rago adu ni, abakpa arengbe na ni dũ. Aboro ki oro be aFereseto.

¹²Ono ko ki ru kina bebere gu dagba rago yo re, ka banda ha, ki imi aFereseto. Yekova ki fu bakere diabese fu yo.

¹³Abaakumba biata dagba agu abaakumba 30 ki zorõ ki ye koyo du Dawidi ni ti regbo ke ahe sa gu simbia nga Adurama. Gu rikavura nga ga aFereseto ki zi bataya rogo gu ngboongboorago du Refaima yo.

¹⁴Dawidi ki du kina rogo nyanyaki ba, gu gbata abanzengere nga ga aFereseto ki du Betereme yo.

¹⁵Dawidi akpi nyemu ka mbira ime, ko ki ya, “Ako ka boro fu gu ime fere mi mbiri he nga ga guga Betereme, nga gu du pa ngbadimo bakporo!”

¹⁶Si du agu airanyaka biata re ki gbiriwo rogo ga aFereseto rimbasa, ki gbe ime rogo guga Betereme, nga gu naadu pa ngbadimo bakporo, ki di he, ki ye na ni fu Dawidi. Ono ko akpi nga nyemu ka mbira ha te; ko ki uka ha fu kina Yekova.

¹⁷Ko ki ya, “Ako Yekova, si arengba nga fere mi mangi gi pai te re. Mi mbiri kure agu aboro fu ungayo ku ngba pai yo?” Si du ko akpi nga nyemu ka mbira ha ti ni ya. Agi apai re agu airanyaka biata re amangi he.

¹⁸Abisai unvurua Yoaba, nangia wiri Seruya, adu ni barumbatayo fu agu yo naadu biata. Ko ki di gako baso kuti aboro 300 ki imi yo, ko ki du na worimo dagba agu yo naadu biata.

¹⁹Ko adu ni irisiirisi boro dagba yo ki susi agu yo 30, si du i asa ko ti ni ni gayo barutirivura. Ono ko arengba nga na gu bambata yo naadu biata te.

²⁰Benaya wiri Yoyada adu ni eerẽ kumba nangia boro Kabasere, namangi baiiriwo apai, ko aimi agu airanyaka ue nga ga aMoabo yo. Boro ko andu a ki imi bahu due yo rago kere zere.

²¹Ko ki imi boro Ezipeta, ni bawene kumba. Gu boro Ezipeta re adu na baso be ko ono Benaya ki ndu sa ko na kina ngbondo, ko ki gbe baso be boro Ezipeta, ki imi ko na kina gako baso.

²²Agi apai re Benaya wiri Yoyada amangi, ki du na worimo dagba agu airanyaka biata.

²³Ko adu ni irisiirisi boro ki susi dagba agu yo naadu 30, ono ko arengba nga na gu bambata yo naadu biata te. Dawidi ki moi ko ku ri ababandako.

²⁴Asaere tame Yoaba adu dagba agu yo yo naadu 30; na Eranana wiri Dodo boro Betereme;

²⁵na Asama boro Aroda na Erika boro Aroda;

²⁶na Erese boro Parati, na Ira wiri Ikese boro Tekua;

²⁷na Abiezere boro Anatota, na Mebunai boro Usa;

²⁸na Saremona boro Awoa, na Marai boro Netofa;

²⁹na Erebe wiri Bana boro Netofa, na Itai wiri Ribai boro Giba dagba ngbatunga Benyamina yo;

³⁰na Benaya boro Piratona, na Idai nga boro gu ringara wiriadi du Gasayo,

³¹na Abi-arabonaboro Aruba, na Azemaveta boro Baruma;

³²na Eriaba boro Sarebona nangia awiri Yasena, na Yonatana;

³³na Sama boro Arara, na Aiyama wiri Sarara boro Arara,

³⁴na Eriperete wiri Asabai boro Maka, na Eriama wiri Aitofere boro Girona;

³⁵na Esero boro Karumera, na Parai boro Aruba;

³⁶na Yigara wiri Natana boro Soba, na Bani boro Gada;

³⁷na Sereke boro Amona, na Narai boro Berota, nangia ga Yoaba batindi aũvura nangia wiri Seruya;

³⁸na Ira boro Yetere, na Gareba boro Yetere;

³⁹na Uria boro Eto: i dunduko adu wa aboro 37.