Read zande 2 SAMUERE 3 Bible Online

2 SAMUERE 3 - zande bible

2 SAMUERE 3

¹Vura adu ni gbanga ha dagba ngbatunga Saura na ngbatunga Dawidi. Dawidi ki ninyaki anyaka ki susi, ono ngbatunga Saura ki niruna aruna tigayo kindi.

²I abatika akumbagude fu Dawidi Eburone yo: bambata yo nangia Amanona ti gu de nangia Ainoama boro Yizerere;

³gu ue yo nangia Kiraba, ti Abigaira dekurugbo Nabara boro Karumera; biata yo nangia Abisaroma wiri Maka nangia wiri Tarumai bakindo Gezura;

⁴biama yo nangia Adoniya wiri Agita; bisue yo nangia Safataya wiri Abitara;

⁵sita yo nangia Yiterama, ti Egera dia Dawidi. Agi yo re i abatika yo dũ fu Dawidi kina Eburone yo.

⁶Ho vura adu ni dagba ngbatunga Saura na ngbatunga Dawidi, Abinera ki nyakasi tiko tipa ngbatunga Saura.

⁷Were debadia Saura adu ho, rimori angia Risepa, wiri Aya. Isa-bosete ki ya fu Abinera, “Tipagine rimi mo ti ni fuo debadia buba?”

⁸Abinera ki zingi azinga gbe tipa agu apai Isa-bosete agumba, ki ya, “Ri ango nga mi, nga ga Yuda ru? Areme mi nayugo weneringise fu angbatunga Saura nga bamo, na fu awirinako, na fu abadiako, wa mi afu nga ro ku be Dawidi ya; ono mo naruga re kindi na pa gu ingapai du tipa gi de re.

⁹Mbori mángi he wo fu Abinera, na kura ha a, ka mi anyákasa nga gu pai tipa Dawidi ya, wa Yekova azunga he tipa ha fu ko,

¹⁰ka sa ngbi be ngbatunga Saura, ka maa gu mbatabakindo nga ga Dawidi ku ri aYisaraere na ku ri Yuda, tona ti Dana ki da ku Bera-seba yo.”

¹¹Ka Isa-bosete arengba nga ka karaga kura pai fu Abinera ya, bambiko ko agunde agunde be ko.

¹²Abinera ki kedi asunge koyo du Dawidi ni tipa gako pai, ki ya, “Ga da ringara nga gere? Mo mángi mozunga na mi, si du bere adú na mo, ka ye na aYisaraere dunduko foro.”

¹³Dawidi ki ya, “Rengo du, mi tigimi amánga mozunga na mo; ono pai sa mi aída ha be ro, si nga, mo abí nga kpakpure te, kina gu ka mo ye na Mikara wiri Saura nga de, ni gu rago mo ka ye ka bi kpakpure.”

¹⁴Dawidi ki kedi asunge koyo du Isa-bosete ni nangia wiri Saura, ki ya, “Mo kúsi Mikara diare fere, nga gu ri mi apazua ri tipa pito aFereseto 100.”

¹⁵Isabosete ki kedi pai, ki di ri be kumbari, be Paretiere wiri Raisa.

¹⁶Ono kumbari ki ndu na ri, ki nikpari ni aume wa ko andu, ki nipeke ri kindi daku Baurima yo. Abinera ki ya fu ko, “Mo ndú, ki karaga tiro”; ko ki karaga tiko.

¹⁷Abinera ki fura na abaakumba nga ga aYisaraere yo, ki ya, “Ni gu rago nasusi oni agbata Dawidi ko du ni bakindo ku ri roni.

¹⁸Awere oni mángi he tie; bambiko Yekova agumba pa Dawidi niya, ‘Mi abatasa gimi aboro aYisaraere ku be Dawidi, vurube aFereseto, na vurube avurayo dũ.’ ”

¹⁹Abinera ki gumba ha fu aBenyamino a. Abinera ki ndu ka gumba pa ha fu Dawidi ku Eburone yo, nga pa agu apai dunduko aYisaraere dunduko, na ngbatunga Benyamina dunduko agumba pa manga ha.

²⁰Si du Abinera ki ye koyo du Dawidi ni ku Eburone yo, na aboro fuo ko 20. Dawidi ki mangi pumbo fu Abinera na agu aboro ko aye na yo.

²¹Abinera ki ya fu Dawidi, “Mi agúari ki ndu, ki dungura aYisaraere dunduko fu gi gbia nga bakindo, i zunga he foro. Mo ki zogo ahe du wa tororo akpi nyemu he.” Dawidi ki kedi Abinera ku sa yo; ko ki ndu zezeredi.

²²Ni kina gu rago re, avuru Dawidi ki yega gene gbu ahe yo, na Yoaba, ki yega na gbugbu ahe ni bakere he. Ono Abinera adu nga na Dawidi Eburone yo te; bambiko ko akedi ko ku sa yo, ko ki ndu zezeredi.

²³Ho Yoaba aye ni na gu rimbasa aborovura naadu na ko dunduko, i ki gumba ha fu Yoaba ki ya, “Abinera wiri Nere aye kono du bakindo ni, ko ki ima karaga ko, ko ki ga zezeredi.”

²⁴Yoaba ki ye tie koyo du bakindo ni, ki ya, “Gini pai mangi mo ho were? Mo ngére, Abinera aye kono du mo ni; tipagine mo akaraga ko ti ni, ko ga kindi?

²⁵Mo ima ina ha ya Abinera wiri Nere aye ka nanga ro, ka ina pa ga k ura sa pai na pa ga yega, ka ina pa agu apai dunduko mo namanga.”

²⁶Ho Yoaba akuru ni yo du Dawidi ni, ko ki kedi asunge fuo Abinera, i ki yega na ko pati gu guga yo nga ga Sira, ono Dawidi aina nga pa ha te.

²⁷Ho Abinera ayega ni ku Eburone yo, Yoaba ki di ko ki ndu na ko ku bani dagba angbadimo bakporo vo ka fura na ko ni sa ko ni zereda, ono yo ko arũ ko ni ti vuko, ko ki kpi, tipa pa kure kpio wirinako nangia Asaere.

²⁸Ho Dawidi agi he ni giza, ko ki ya, “Pai adu nga ku ri re tigimi na ku ri gi ngbi bangiri Yekova tipa pa kure Abinera wiri Nere nye anye kindi te.

²⁹Si ti ku ri Yoaba, na ku ri angbatunga bako dunduko. Ka ngbatunga Yoaba zánga nga gu boro kpanda naga ti ni ya, watadu gu ni nga boro ngbataka, watadu gu ni nasongoda tini kuti tepe, watadu gu ni kpi be basape, watadu gu ni zingo riahe amanga ni aya!”

³⁰Si du Yoaba na Abisai unvuruako ki imi Abinera, bambiko ko aimi, tameyo nangia Asaere Gibona yo ti vura.

³¹Dawidi ki ya fu Yoaba, na fu agu aboro dunduko naadu na ko, “Oni siri gaoni aremu, ki vo mbuzaroko, ki ta ta ngbaduroni nikpari ni aume tipa Abinera.” Bakindo Dawidi ki nipe yo na kangba raga yo.

³²I ki kpisidi Abinera Eburone yo; bakindo ki poi ku ari ni bakere fugo, ki nikpari ku ri murã Abinera; aboro dunduko ki nikpari ni aume.

³³Bakindo ki kpari kpe tipa Abinera, ki ya, “Abinera ka kpi wa mumungo boro nikpi?

³⁴I avo nga bero avo te, i avo nga nduro na aganziri a te; wa ka boro nikpi ku barangba gbegberẽ aboro wo kpi mo.” Aboro ki nikpari ku ri ko berewe dunduko.

³⁵Aboro ki ye dunduko ka dara Dawidi ko ri he mbata uru nikati; ono Dawidi ki zunga he, ki ya, “Mbori mángi he fere wo, ki susi gure a, ka mi ia kpokuta, watadu gu he berewe, daho uru ka ti ni!”

³⁶Aboro ki ini he dunduko, si ki ngba ti yo. Agu apai dunduko bakindo amangi si ki ngba ti aboro dunduko a.

³⁷Si du aboro dunduko na aYisaraere dunduko a, ki rugu tiyo na gu pai ni gu uru re ya bakindo aida nga pa imo Abinera wiri Nere te.

³⁸Bakindo ki ya fu gako amoyambu, “Oni aina nga ha bazogo ni bakere boro kpi areme ringara aYisaraere, te?

³⁹Ono rungbura mi arungbura tigimi areme, ka i vura mbeda re ni nzeme bakindo vurũ. Agi akumba re nangia awiri Seruya adu ni nyanyaki aboro kuti re. Yekova fú mosoro fu bamangi gbegberẽpai kuti gani gbegberẽpai!”