Read zande 2 SAMUERE 5 Bible Online

2 SAMUERE 5 - zande bible

2 SAMUERE 5

¹Angbatunga aYisaraere ki ye dunduko koyo du Dawidi ni, ku Eburone yo, ki ya, “Mo ngére, ani nga memero na pasioro a.

²Bakuru yo, ho Saura adu ni ni bakindo ku ri rani, mo tigamo nangia gu ko naangbe ku mbata yo fu aYisaraere ki niyega na yo. Yekova ki ya foro, ‘Mo aríga gimi aboro aYisaraere, mo ki du a ni bazogo ku ri aYisaraere.’ ”

³Si du ga aYisaraere abaakumba aye ti ni dunduko koyo du bakindo ni ku Eburone yo; Bakindo Dawidi ki mangi mozunga na yo Eburone yo ku bara bangiri Yekova. I ki mbedi Dawidi ni bakindo ni nzeme, ko du ku ri aYisaraere.

⁴Garã Dawidi adu 30 ho ko atona zoga rago ni, ko ki zogo rago garã ki du 40.

⁵Ko azogo aYudo Eburone yo garã ki du saba na diwi sita; ko ki zogo rago Yerusarema yo garã ki du 33 ku ri aYisaraere dunduko na aYudo a.

⁶Bakindo ki ndu na gako akumba ku Yerusarema yo sa aYebuso, nangia agu aboro nanaraka yo. I ki gumba ha fu Dawidi, ki ya, “Mo ayé nga kono te, kina gu ka mo rogo airavurari na terengeterenge aboro ku sa yo mbata” ― I aberẽ he nga, “Dawidi arengba nga ka ye kono te.”

⁷Wa si avura du wo, Dawidi adi gu nyanyaki gbata nga Siona; kina ha nga ga Dawidi bakporo.

⁸Dawidi ki ya ni kina gu uru re, “Gu boro nikagbarasa aYebuso, ni ndú ku ti ri adi yo, ki imi terengeterenge aboro na airavurari, nga agu yo angba nga mbisimoyo ti Dawidi ya.” Si du i niya ti ni, “Airavurari na terengeterenge aboro ayé nga ku dimo no te.”

⁹Dawidi ki niraki rogo gu nyanyaki gbata re, ko ki ya ti ni ga Dawidi bakporo. Dawidi ki dudua bakporo kirikiri pati Miro na vuruhe yo a.

¹⁰Pa Dawidi ki nyaki anyaka ki susi; bambiko Yekova adu na ko, nga Mbori nga ga arimbasa Ko.

¹¹Irama nangia bakindo Tura akedi asunge koyo du Dawidi ni, na angua kedara, na abaseke angua, na abaseke ambia, i ki dua bambu fu Dawidi.

¹²Dawidi ki ini he ya Yekova nyakasi pa ko ni bakindo ku ri aYisaraere, ki kiisi pa gako ngbi mbiko pa gako aboro nga aYisaraere.

¹³Fuo guari Dawidi Eburone yo ko ki rogo kura ade ni adiako na adebadia a Yerusarema yo. I abatika kura akumbagude fu Dawidi na adegude a.

¹⁴Rimo agu yo i abatika yo Yerusarema yo du re: Sauma, na Sobaba, na Natana, na Soromo,

¹⁵na Yibara, na Erisua, na Nefege, na Yafiya,

¹⁶na Erisama, na Eriyada, na Eriferete.

¹⁷Ho aFereseto agi he ni ya i mbedi Dawidi ni bakindo ku ri aYisaraere, aFereseto dunduko ki ndu ka gbata Dawidi, ono Dawidi ki gi he, ki zorõ ku rogo nyanyaki ba.

¹⁸Were aFereseto ki ye ki kparaka tiyo rogo ngboongboorago Refaima.

¹⁹Dawidi ki sana Yekova, ki ya, “Mi ndú sa aFereseto? Mo afú yo ku be re?” Yekova ki ya fu Dawidi, “Mo ndú; ni rengo mi afú aFereseto ku be ro.”

²⁰Dawidi ki ye ku Bara-perazima yo. Dawidi ki di be yo yo. Ko ki ya, “Yekova kuru sa avurare ki mangi yo barangba re, wa baime nasipa gangoho.” Si du i ayambu rimo gu ba ti ni re nga Bara-perazima.

²¹AFereseto ki mbu gayo kpiaahe kina ho, Dawidi na gako aboro ki ga na ni.

²²AFereseto ki niye kindi, ki ye ki kparaka ngboongboorago Refaima.

²³Ho Dawidi asana Yekova ni, ko ki ya, “Ka mo ndú nga ya; mo ké yo ku gii yo yo, ki ye sa yo yo du agu angua nga barasama ni.

²⁴Ho mo ka gia woro nduge ni dagba angua barasama yo, mo ki guari; bambiko Yekova kuru ku mbata yo foro ka manga gu rimbasa nga ga aFereseto.”

²⁵Dawidi ki mangi he wa Yekova arugu ko na ni, ki mangi aFereseto tona Geba yo ki da ku Gezere yo.