Read zande 2 SAMUERE 6 Bible Online

2 SAMUERE 6 - zande bible

2 SAMUERE 6

¹Dawidi ki dungura ga aYisaraere siasia abaakumba berewe koyo du ko ni, wa aboro 30,000.

²Dawidi ki guari Bare-Yuda yo, na agu aboro naadu na ko dunduko, ki ndu ka dia ga Mbori sanduki yo, nga gu i ayambu rimoko ti ni, nga rimo Yekova nga ga arimbasa Ko nga gu ko nasunga auru akeruba.

³I ki di ga Mbori sanduki tii ga Abinadaba bambu yo, naadu ri gangara, ki moi he ku auru vovo ngbagida; awiri Abinadaba nangia Uza na Ayo ki nindu na gi vovo ngbagida re,

⁴na ga Mbori sanduki auru he. Ayo ki ngbe ku mbata yo fu sanduki.

⁵Dawidi na angba tunga aYisaraere dũ ki nitaki akindondo ku bara bangiri Yekova na dungu ngbatunga woro ahe nga gu i ambakadi he rogo ngua akupuresa. I ataki anzenze na akundi, na agaza, ki nivudi anambongo, ki niwo ti gu sirigi napaa apaa a.

⁶Ho i ada ni ti ga Na kana bataka zende ahe, Uza ki taĩ beko, ki zadi ga Mbori sanduki; bambiko abaabagara akotoko.

⁷Ga Yekova zinga ki rungudi kuti Uza; Mbori ki imi ko kina ho mbiko gako aura; ko ki kpi kina ku pati ga Mbori sanduki.

⁸Si ki gberẽ ti Dawidi gbe wa ga Yekova zinga ati ku ri Uza. Ko ki yambu rimo gu ba re nga Pereze-uza, daku areme.

⁹Dawidi ki gunde ti Yekova, ni gu uru re, ko ki ya, “Ga Yekova sanduki awíra pa da kono du mi ni waĩ?”

¹⁰Si du Dawidi aida nga ka ndu ti ni na ga Yekova sanduki ku rogo ga Dawidi bakporo yo ya. Ono Dawidi ki tindi he ki aria ha ku tii ga Obede-edome bambu yo nangia boro Gata.

¹¹Ga Yekova sanduki ki sungu tii ga Obede-edome bambu yo tipa diwi biata; Yekova ki fu maku fu Obede-edome, na gako aborokporo dunduko.

¹²I ki gumba ha fu Bakindo Dawidi ki ya, “Yekova fu maku fu ngbatunga Obedeedome, na fu gako ahe dunduko a, bambiko ga Mbori sanduki du yo.” Dawidi ki ndu ki di ga Mbori sanduki tii ga Obedeedome bambu yo, ki ga na ni ni ngbarago ku rogo ga Dawidi bakporo.

¹³Si ki du wo, ho agu yo natindi ga Yekova sanduki andu ni wa dagba ndue sita, ko ki tumo ni babagara na wiri bagara nze anze.

¹⁴Dawidi ki nido gbere ku bangiri Yekova na omeko dũ; Dawidi ki vodi tiko na efoda nga tutu roko ni giri nzibi.

¹⁵Si du Dawidi na angbatunga aYisaraere dunduko aye ti ni na ga Yekova sanduki na ngbiko, na woro nambongo a.

¹⁶Ho ga Yekova sanduki ada ni ku rogo ga Dawidi bakporo, Mikara nangia wiri Saura nangia dia Dawidi ki ngere ti bangiri bambu, ki bi Bakindo Dawidi ko niguku nido gbere ku bangiri Yekova; ri ki payasi ko ku kpotori yo.

¹⁷I ki rimisi ga Yekova sanduki, ki moi he ku ba ha yo, ku tii gu bamburoko Dawidi adua ha tipa ha. Dawidi ki tumo ni zozo amotumo na amotumo zereda ku bara bangiri Yekova.

¹⁸Ho Dawidi anyasi tumo ni ni zozo amotumo na amotumo zereda, ko ki fu maku fu aboro ti rimo Yekova nga ga arimbasa Ko.

¹⁹Ko ki gamu udiudi kpokuta ni ba sa sa fu aboro dunduko, nga rimbasa aYisaraere dũ, nga akumba na ade a, na bete pasio, na kpura ugu rindi kakue. Si du aboro ki karaga tiyo dunduko gu ni kina ku rogo gani kporo.

²⁰Dawidi ki karaga tiko tie ka fu maku fu gako aborokporo. Ono Mikara wiri Saura ki kuru ka gbia Dawiai, ki ya, “Bakindo aYisaraere adu ni taataa ko areme, nga gu ko mbu kpotoko areme ku bangiri anagbindi nga gako amoyambu, wa kina gu mumungo aboro adada nga gayo zee ya!”

²¹Dawidi ki ya fu Mikara, “Si nidu wo ku bangiri Yekova, nga gu ko nasia re mi du ku ba bamo, na ku n angbatungako dunduko, ki ringbisi re ku ri aYisaraere ni bazogo ga Yekova aboro. Si du mi akangi ti ni ku bangiri Yekova.

²²Mi apáyasi tire ki susi gere, mi adú ni umbasiumbasi re ku bara bangire a. Ono tipa gu pai nga ga anagbindi mo nigumba pa yo, i nikairisa re airisa.”

²³Ono Mikara nangia wiri Saura abatika nga gude te dati uru kpiori.