Read zande 2 SAMUERE 7 Bible Online

2 SAMUERE 7 - zande bible

2 SAMUERE 7

¹Si ki ta du wa gere, ho bakindo araka ni tii gako bambu yo, Yekova ki fu ongoda fu ko be agu avurako dunduko naadu pati ko kirikiri,

²bakindo ki ya fu Natana nangia nebi, “Mo bí nga, mi tigimi naraka tii bambu ngua kedara yo, ono ga Mbori sanduki naraka kina tii bamburoko yo.”

³Natana ki ya fu bakindo, “Mo ndú, ki mangi gu pai dũ kpotoro yo dũ; oambiko Yekova du na mo.”

⁴Ono ni kina gu yuru re, sangba Yekova ki ye fu Natana, ki ya,

⁵“Mo ndú ki gumba pai fu gi moyambu nga Dawidi, ki ya, ‘Ya Yekova wẽ: Mo adúa bambu adua tipa re mi ka raka rogo ho?

⁶Fuo kusa mi awiri aYisaraere Ezipeta yo, mi naraka nga rogo bambu te dati gi uru re, ono mi nidu kina rogo bamburoko nita ku bani na ku bani na baraka.

⁷Ti agu arago mi anindu rogo ho na awiri aYisaraere dunduko mi agumba pai fu gu ngbatunga aYisaraere nga agu yo mi arugu yo i rigi gimi aboro aYisaraere, ki ya, “Tipagine oni adua nga bambu kedara ti ni fere ya?”’

⁸Awere mo yá fu gi moyambu nga Dawidi wẽ, ‘Ya Yekova nga ga arimbasa ko wẽ, Mi adi ro banambu yo, ti peka fuo akandoro, mo du ni bazogo ku ri gimi aboro, nga aYisaraere

⁹Mi anidu na mo ho mo anindu ku ho ni, ki nirogo avuraro ku sa yo ti ro. Mi asá rimoro ni bakere he, wa kina ga agu yo du ni kikindigi yo auru kpotosende.

¹⁰Mi ayúgo ba fu gimi aboro aYisaraere, ki moi yo yo i niraki rogo gayo arago, ka i afúda nga ho berewe ya. Ka awiri gbegberẽpai arúngosi nga yo berewe wa si adu ti bambata ha ya,

¹¹ti gu rago mi arugu abasapungbanga i du ku ri gimi aboro aYisaraere. Mi afú ongoda foro be avuraro. Ku ri gere ya Yekova foro, Yekova azúgasi ngbatungaro.

¹²Ho ga rame ka nyasa ni mo ki kpi fuo atitaro, mi amáa wiro fuo ro nga gu ko enge ti kina ro, ki nyakasi gako ngbi.

¹³Ko ni tiko nikadua bambu ti rimore, mi anyákasa pa mbatabakindo fu ngbatungako nye anye kindi.

¹⁴Mi adú ni bako, ko ki du ni wire. Ho ka ko mangi irairapai ni, mi atá ko ni ngbondo nga ga akumba, na agu amandoro nga ga wiri aboro;

¹⁵ono mi adía nga gi inapai ti ko te, wa mi adi he mbata ti Saura, nga gu ko mi adi ko ti ro ku sa yo.

¹⁶Ngbatungaro na ga ngbi adú nyanyaki ku bara bangire nye anye kindi. Pa ga mbatabakindo adíga nga te.’ ”

¹⁷Natana agumba pai fu Dawidi kuti kina sangba agi apai re dunduko, na gi yuguyugupai re dũ a.

¹⁸Bakindo Dawidi ki rimi, ki sungu ku bara bangiri Yekova, ki ya, “Ako Gbia MBORI, da nga mi, gini he nga ngbatungare, mo nagasa re ti ni ki da ku awere?

¹⁹Ako Gbia MBORI, gure nangia toni pai bangiro; ono mo gumba pai awere a tipa ngbatunga ga moyambu tipa gu gbanga rago du koyo nikaye, kuti sino aboro, Ako Gbia MBORI!

²⁰Gini pai ka Dawidi gumba ha foro berewe? Ako Gbia MBORI, bambiko mo ni tiro ini kpoto ga moyambu yo!

²¹Bambiko kina kuti pa ga kidohe, na kuti pa gu pai dũ kpotoro yo, mo amangi gi bakere apai re dunduko, ka ida ha fu ga moyambu ko ini he.

²²Si du du mo ti ni ni bahe, Ako Gbia MBORI! A nga boro ho du wa mo a te, a nga kura Mbori ho berewe fuo ro a te, kuti sangba agu apai dũ gi ani ni turani.

²³Gini kura rikaaboro du nga ho auru kpotosende wa gamo aboro nga aYisaraere? nga agu yo Mbori andu ka batasa yo i du ni gako aboro nzunzu, ka maa rimoko ni bakere he, ka amanga bakere baapai fu yo, na iiriwo apai tipa ga ringara, ku bangiri gamo aboro, nga agu yo mo abatasi yo ni gamo yo ni kusa yo Ezipeta yo, be arikaaboro na gayo ambori?

²⁴Mo anyakasi gamo aboro aYisaraere tipa ro, i du ni gamo aboro nye anye kindi; Ako Yekova mo adu ni gayo Mbori.

²⁵Ako Yekova Mbori, awere gu pai gumba mo tipa ga moyambu, na tipa ngbatungako, mo nyákasi he nye anye kindi, ki mangi he wa gumba mo pa ha.

²⁶Rimoro adú ni taasitaasi he nye anye kindi, niya, ‘Yekova nga ga arimbasa ko nga Mbori du ku ri aYisaraere,’ ngbatunga ga moyambu nga Dawidi adú ni nyanyaki he ku bara bangiro.

²⁷Ako Yekova nga ga arimbasa ko, nga ga aYisaraere Mbori, bambiko mo kusi pai fu ga moyambu, ki ya, ‘Mi afú ngbatunga foro’; si ini ga moyambu he ti ni kpotoko yo ka kpara gi kpetambuahe re foro.

²⁸Ako Gbia MBORI, ono mo nga Mbori, gamo apai dũ nga ndikidi apai, mo kido he tipa gi wenepai re fu ga moyambu;

²⁹awere si du ka si ngba ti ro ka fu maku fu ngbatunga ga moyambu, ya i nye anye kindi ku bara bangiro; Ako Gbia MBORI, bambiko mo nagumba ha. Ga maku adú fu angbatunga ga moyambu nye anye kindi.”