Read zande 2 SAMUERE 8 Bible Online

2 SAMUERE 8 - zande bible

2 SAMUERE 8

¹Fuo agi apai re si ki du wa gere, wa Dawidi amangi aFereseto, ki zogo yo, Dawidi ki di gu bakporo nga Metega-ama be aFereseto.

²Ko ki mangi aMoabo, ki ringbisi yo ti gene, ki mangi yo i piki sande. Ko ki ringbisi gene yo ue tipa i imi yo, gene yo sa i nye ni ungayo. AMoabo ki du ni avuru Dawidi, ki niye na rũhe fu ko.

³Dawidi ki mangi Adadezere wiri Robo, nangia bakindo Soba, wa ko andu ka nyakasa pa gako zogarago pavuru Ferata yo.

⁴Dawidi ki zi angbagidavura be ko 1,000 na abanduri afarasi 700, na aborovura ni nduyo wa 20,000. Dawidi ki kafu gbaga ndu afarasi ngbagidavura dunduko, ono ko aka kuti agu ra dagba ra narengbe na angbagidavura 100.

⁵Ho aSurio nga ga Damaseke yo aye ni ka unda Adadezere bakindo Soba, Dawidi ki imi ga aSurio aboro wa 22,000.

⁶Dawidi ki mamoi gbata abanzengere Suria yo nga ga Damaseke; aSurio ki du ni avuru Dawidi, ki niye na rũhe fu ko. Yekova ki nifu diaoese fu Dawidi yo ko anandu ku ho ni.

⁷Dawidi ki rogo agu avurakube du ni dahabu nga gu naadu ti kpoto avuru Adadezere, ki ye na ni ku Yerusarema yo.

⁸Bakindo Dawidi arogo bakere sirigi Beta yo na Berotai yo, nga ga Adadezere abaakporo.

⁹Ho Toi nangia bakindo Amata agi he ni ya Dawidi mangi gu rimbasa aborovura dunduko nga ga Adadezere,

¹⁰Toi ki kedi Yorama nangia wiriko koyo du Bakindo Dawidi ni, ka paa kuti ko ka tambua ko, bambiko ko aso vura na Adadezere ki di be ko; bambiko Adadezere anaso vura aso na Toi. Yorama ki ye na aũsunge ni feda, na ni dahabu, na ga sirigi a.

¹¹Agi ahe re si nga gu Bakindo Dawidi akpara ha fu kina Yekova, wa sa na agu afeda na adahabu nga gu ko arogo be agu arikaaboro ko azoga yo;

¹²ga Suria, na ga Moaba, na ga awiri aAmono, na ga aFereseto, na ga aAmareko, na agu ahe ko agbu he be Adadezere nangia wiri Robo, bakindo Soba.

¹³Rimo Dawidi ki ni wo ho ko ayega ni gene manga aSurio yo rogo Ngboongboorago du na Tikpo, wa ko aimi aboro wa 18,000.

¹⁴Ko ki mamoi gbata abanzengere Edome yo; ko amamoi gbata abanzengere rogo ringara Edome dunduko, aEdomo dunduko ki du ni avuru Dawidi. Yekova ki nifu diabese fu Dawidi yo ko anaandu ko ho ni.

¹⁵Dawidi ki zogo aYisaraere dunduko; Dawidi ki nisari ngbanga nzunzu fu gako aboro na rurupai dunduko.

¹⁶Yoaba wiri Seruya ki du ku ri rimbasa aborovura; Yosafata wiri Airuda ki ngia batingidipai;

¹⁷Sadoka wiri Aituba, na Aimereke wiri Abiatara, i adu ni aboromotumo; Seraya ki ngia bakeapai;

¹⁸Benaya win Yoyada adu ku ri aKereto na aPereto; awiri Dawidi adu wa kina aboromotumo.