Read zande 1 Abakindo 1 Bible Online

1 Abakindo 1 - zande bible

1 Abakindo 1

¹Ono Bakindo Dawidi adu ni gbinza ko, dungu agarã asaki ko gbe. I ki aadi ko na roko, ono kpotoko afaa nga te.

²Si du gako amovambu aya ti ni fu ko, “I gbáta paranga ngasu de tipa gi gbia nga bakindo, ri du pati bakindo, ki nibanda ko. Ri nipi kuti ngbaduro, kpoto gi gbia nga bakindo foi mbiko ri.”

³Si du i agbata bawene paranga de ti ni rogo ringara aYisaraere dunduko. I ki bi Abisaga, nangia boro Sunema, i ki ye na ri koyo du bakindo ni.

⁴Gu paranga de re tamari angba gbe; ri ki nibanda bakindo ki nimangi pa ko; ono bakindo aina nga ri ni de te.

⁵Were Adoniya nangia wiri Agita ki kiisi pa tiko, ki ya, “Mi ni tire adú ni bakindo.” Ko ki mbakadi angbagida upa ko na abanduri afarasi, ki sia akumba 50 i nioro ku mbata yo fu ko.

⁶Bako ambusa nga ko wa ko adu ni ungako te, ki ya “Tipagine mo amanga were ti ni?” Tamako adu ni wene he a. I abatika ko fuo Abisaroma.

⁷Ko ki gumba rondo na Yoaba nangia wiri Seruya, na Abiatara nangia boromotumo. I ki ta peka Adoniya niunda ko.

⁸Ono Sadoka nangia boromotumo, na Benaya nangia wiri Yoyada na Natana nangia nebi na Simi, na Rei, na gu nyanyaki abaakumba nangia ga Dawidi yo, i adu nga na Adoniya te.

⁹Adoniya ki imi akandoro ni amotumo na abaabagara na anyanzeme pati Mbia Zoerete, naadu pati Enerogere. Ko ki yambu awiribako dunduko nangia awiri bakindo, na abaakumba aYudo dunduko naadu ni ga bakindo amoyambu.

¹⁰Ono ko ayamba nga Natana nangia nebi, na Benaya, na gu nyanyaki abaakumba, na Soromo nangia boro wiribako te.

¹¹Natana ki gumba pai fu Bataseba nangia na Soromo, ki ya, “Mo ata gia nga ha ya Adoniya nga wiri Agita du ni bakindo, te? ka Dawidi nga gaani gbia aina nga pa ha ya.

¹²Mi nazungadi ro, mo yé mi rúgu ro, ya mo batasi ungaro na unga wiro nga Soromo a.

¹³Mo ndú ni ba sa koyo du Bakindo Dawidi ni, ki ya fu ko. ‘Gi gbia, nga bakindo, ati mo azunga he fu ga kanga, ki ya, “Ni rengo, Soromo nga wiro nikazoga rago fuo re ki nisungu auru gi mbatabakindo”? Tipagine du Adoniya ti ni ni bakindo?’

¹⁴Mo ngére, mo ata fura na bakindo mi ki ye fuo ro, ki nyakasi gamo apai.”

¹⁵Bataseba ki ndu koyo du bakindo ni ku dimo yo. Ono bakindo adu ni gbinza ko gbe, Abisaga nangia boro Sunema naamanga pa bakindo.

¹⁶Bataseba ki tumusa ku sende, ki irisi bakindo. Bakindo ki ya, “Gini he mo akpi nyemu he?”

¹⁷Ri ki ya fu ko, “Gi gbia, mo azunga he fu ga kanga ti rimo Yekova nga gamo Mbori, ki ya, ‘Ni rengo, Soromo nga wiro nikazoga rago fuo re. Ko nikasunga auru gi mbatabakindo.’

¹⁸Mo ngére, Adoniya du ni bakindo awere; ono mo nga gi gbia nga bakindo, ka mo aina nga pa ha ya.

¹⁹Ko imi abaabagara ni amotumo na anyanzeme na akandoro ni dungu ra, ki yambu awiri bakindo dunduko, na aAbiatara nga boromotumo, na Yoaba nga barutiri aborovura. Ono ko ayamba nga Soromo nga ga moyambu te.

²⁰Ono awere, gi gbia nga bakindo, aYisaraere dunduko namaa bangiriyo kina koyo du mo ni, mo gúmba pa gu ni fu yo nikasunga auru gu mbatabakindo nga ga gi gbia nga bakindo fuo ko.

²¹Ka si adú nga wo ya, ho gi gbia nga bakindo ka kpi ni fuo atitako si adú wa gere, i agéda rani tigaani na wire nga Soromo ni aboro ingapai.”

²²Ho ri afura ni kindi na bakindo, Natana nangia nebi ki rimi.

²³I ki gumba pai fu bakindo, ki ya, “Natana du erẽ nga nebi.” Ho ko ada ni ku bara bangiri bakindo, ko ki vagadi ni kpakpuko ku sande bara bangiri bakindo.

²⁴Natana ki ya, “Gi gbia, nga bakindo, mo aya, ‘Adoniya nikazoga rago fuo re, ki sungu auru gi mbatabakindo’?

²⁵Bambiko ko nizorõ areme, ki imi abaabagara ni amotumo na anyanzeme na akandoro ni dungu ra, ki yambu awiri bakindo dunduko na abaruti rimbasavura na Abiatara nga boromotumo. Mo ngére, i nari he ki nimbiri he ku bara bangiriko, ki niya, ‘Mbori fú gbanga rame fu Bakindo Adoniya!’

²⁶Ono mi tigimi ko ayamba nga re nga ga moyambu te, na Sadoka nga boromotumo, na Benaya nga wiri Yoyada na ga moyambu nga Soromo a te.

²⁷Kina gi gbia nga bakindo narugu he wo? ka mo ayugo nga gu ni fu gamo amoyambu nikasunga auru gu mbatabakindo nga ga gi gbia nga bakindo fuo ko ya?”

²⁸Bakindo Dawidi ki karaga ha ki ya, “Mo yámbu Bataseba, ri ye kono du mi ni.” Ri ki ye koyo du bakindo ni, ki ru bara bangiriko.

²⁹Bakindo ki zunga he, ki ya, “A wa du Yekova ni ungako, nga gu ko natumo mbisimore be imisiri apai dunduko,

³⁰ni rengo, a wa mi azunga he foro ti rimo Yekova nga ga aYisaraere Mbori, niya, ‘Kina Soromo nikazoga rago fuo re ni rengo, nga wiro, ko nikasunga auru gi mbatabakindo ku ba re’; kina wo ni rengo mi nikamanga ha areme.”

³¹Bataseba ki vagadi ni kpakpuri ku sande ki irisi bakindo, ki ya, “Gi gbia nyé anye kindi nga Bakindo Dawidi!”

³²Bakindo Dawidi ki ya, “Mo yámbu Sadoka nga boromotumo, na Natana nga nebi, na Benaya nga wiri Yoyada, i ye kono du mi ni.” I ki ye ku bara bangiri bakindo.

³³Bakindo ki ya fu yo, “Oni ndú na agu amoyambu nga ga gaoni gbia yo, ki moi Soromo nga wire ko ndu auru gi nadongi, ki ndu na ko ku Giyona yo;

³⁴Sadoka nga boromotumo na Natana nga nebi, i mbédi ko yo ni bakindo ku ri aYisaraere. Oni ki vu nambongo, ki ya, ‘Mbori fú gbanga rame fu Bakindo Soromo!’

³⁵Oni ki ye fuo ko, ko ayé ki sungu auru gi mbatabakindo; bambiko ko nikadu ni bakindo ku ba re; mi naasia ko ko du ni bazogo ku ri aYisaraere na ku ri aYudo a.”

³⁶Benaya nangia wiri Yoyada ki karaga ha ki ya fu bakindo, “Si dú wo! Yekova nga Mbori nga ga gi gbia ko, nga bakindo, ko gúmba ha wo.

³⁷A wa Yekova anadu na gi gbia nga bakindo, Kina wo ko nikadu na Soromo a, ki nikiisi pa gako mbatabakindo si kii ki susi gu mbatabakindo nga ga gi gbia nga Bakindo Dawidi.”

³⁸Si du Sadoka nangia boromotumo andu ti ni na Natana nangia nebi, na Benaya nangia wiri Yoyada na aKereto, na aPereto, ki moi Soromo auru ga Bakindo Dawidi nadongi, ko ndu auru ru, i ki da na ko ku Giyona yo.

³⁹Sadoka nangia boromotumo adi gbanga na nzeme bamburoko dungurati yo, ki mbedi Soromo na ni yo. I ki vu nambongo; aboro ki ya dunduko, “Mbori fú gbanga rame fu Bakindo Soromo!”

⁴⁰Aboro ki dungura tiyo dunduko ku pati ko, aboro ki vudi anafiri, ki ningi angi na bakere ngbarago, si du kpotosende asapu ti ni be woro yo.

⁴¹Adoniya na agu agino naadu na ko i agi woroho ho i anyasi ri riahe ni. Ho Yoaba agi woro nambongo ni, ko ki ya, “Tipagine du woro gbarakagbaraka pai ti ni ku bakporo yo were?”

⁴²Si ki du kina ku ngbako, mo ngere, Yonatana nangia wiri Abiatara nangia boromotumo ki ye; Adoniya ki ya, “Mo rimi; bambiko ngangarã boro nga mo niye na wene pangbanga.”

⁴³Yonatana ki karaga ha fu Adoniya, ki ya, “Ai, gaani gbia nga Bakindo Dawidi moi Soromo ni bakindo ni rengo;

⁴⁴bakindo ki kedi Sadoka na ko nga boromotumo, na Natana nga nebi, na Benaya nga wiri Yoyada, na aKereto na aPereto. I moi ko auru ga bakindo nadongi ko ndu auru ru.

⁴⁵Sadoka nga boromotumo na Natana nga nebi i mbedi ko ni bakindo Giyona yo. I guari yo ki ta ye kono ni ngi angi, bakporo ki niwo awo berewe. Gere nga gu woro oni nigi he.

⁴⁶Soromo nasunga auru mbatabakindo.

⁴⁷Gbiakuti gere ga bakindo amoyambu aye ka fu maku fu gaani gbia nga Bakindo Dawidi, niya, ‘Ga Mbori kíisi rimo Soromo bakere ki susi rimoro, ki kiisi gako mbatabakindo bakere ki susi ga mbatabakindo.’ Bakindo ki tumusa kina ri gako barame.

⁴⁸Bakindo ki ya a, ‘Sambuahe fú Yekova, nga ga aYisaraere Mbori, nga gu ko nafu kina ngbatungare ni sungu auru gi mbatabakindo areme, bangire ki bi ni a.’ ”

⁴⁹Ga Adoniya agino ki nikio dunduko, ki mo ku ari, ki niga ngba gayo agene ni ba sa sa.

⁵⁰Adoniya ki nigunde be Soromo; ko ki guari ku ari, ki ndu, ki zi agu agbanga naadu ti bamotumo.

⁵¹I ki gumba ha fu Soromo, ki ya, “Mo ngére, Adoniya nagunde be Bakindo Soromo; bambiko, mo ngére, ko zi agu agbanga du ti bamotumo, ki ya, ‘Bakindo Soromo zúnga he fere areme ya ko aimo nga gako moyambu na basape te.’ ”

⁵²Soromo ki ya, “Ka ko yugu tiko ni ngangarã kumba, a nga mangiriko sa nikati ku sande te. Ono ka i bi gbigbitapai ti ko, ko akpí akpi.”

⁵³Si du Bakindo Soromo akedi sunge ti ni, i ki di ko bamotumo yo, ki ye na ko. Ko ki ye ki vagadi ku sande bara bangiri Bakindo Soromo. Soromo ki ya fu ko, “Mo gá ku kpuro yo.”