Read zande 1 Abakindo 11 Bible Online

1 Abakindo 11 - zande bible

1 Abakindo 11

¹Ono Bakindo Soromo akpi nyemu kungba ade ku pati wiri Faro ni dungu yo: nangia awiri aMoaba, aAmono, aEdomo, aSidono, na aIto,

²dagba ngbatunga agu aboro re nga agu yo Yekova aya fu awiri aYisaraere, “Ka oni kódi nga tironi na yo ya, ka i kódi nga tiyo na oni a ya, bambiko i ka sa kpotoroni yo ni rengo fuo gayo kungba ambori.” Ono Soromo akpi nyemu yo ki ka kuti yo kindi.

³Adiako adu wa ade 700, nangia awiri abazogo, adebadia ki du wa 300; adiako ki sa kpotoko yo ku sa yo.

⁴Si ki ta du wa gere, ho Soromo agbinza ni, adiako ki sa kpotoko yo fuo kura kungba ambori; ka kpotoko yo adu nga berewe ni ziazia ha fu Yekova gako Mbori, wa kpoto bako yo adu nangia Dawidi ya.

⁵Bambiko Soromo anapeka fuo Asetorete, nangia ga aSidono dembori, ki nindu fuo Mirakoma nangia gu gbegberẽ kere he aAmono anairisa ha.

⁶Soromo ki nimangi gu pai nadu ni gbigbita ha bangiri Yekova, ka ko apeka nga Yekova nzunzu, wa bako anamanga nangia Dawidi ya.

⁷Soromo ki dua tumbatumba bairisa fu Kemosa, nangia gu gbegberẽ kere he aMoabo anairisa, ri gu bagangara naadu pati Yerusarema ku uroyo, ki dua gu tipa Moroke, nangia gu gbegberẽ kere he aAmono anairisa ha.

⁸Ko ki mangi he kina wo tipa gu kungba ade nangia adiako dunduko, nangia agu yo nanazo fuõngua ki nitumo fu gayo ambori.

⁹Yekova ki zingi fu Soromo wa ko asa kpotoko yo ti Yekova, nga ga aYisaraere Mbori, nga gu ko nayugu tiko fu ko mbata bara ue,

¹⁰ki nirugu ko tipa agi apai re, ya ka ko sa nga tiko fuo kura kungba ambori ya. Ono ko aka nga kuti sangba Yekova te.

¹¹Si du Yekova aya ti ni fu Soromo, “Wa mangi mo gere, ka mo aka nga kuti gi zungahe na gimi rugapai ya, nga gu mi arugu ro kuti ni, ni rengo mi akpára ga ngbi be ro, ki fu he fu ga moyambu.

¹²Ono wa vura du he wo mi amánga nga ha u ga rago te, mbiko bamo nangia Dawidi, ono mi akpára ha be kina wiro.

¹³Ka si vura du wo mi akpára nga ngbi dunduko te; ono mi afú gu ngbatunga sa fu wiro bambiko Dawidi nangia gi moyambu, na mbiko pa Yerusarema a nga gu mi asia.”

¹⁴Yekova ki zingisi bakitingbanga kuti Soromo, nangia Adada nangia boro Edome; ko adu ni ngbatunga bakindo aEdomo.

¹⁵Bambiko ho Dawidi adu ni Edome yo, Yoaba nangia barutiri rimbasavura ki ndu ka kpisida agu yo nakpiki, ki imi akumba dunduko Edome yo.

¹⁶Bambiko aYoaba anye yo diwi sita na aYisaraere dunduko, daho ko anyasi akumba ni dunduko Edome yo.

¹⁷Ono Adada aoro, ko tigako na agu aEdomo naadu dagba ga bako amoyambu yo na ko a, ka ndu ku Ezipeta yo, ho Adada adu ni ni kina toni gude.

¹⁸I ki guari ringara Midiana yo, ki ndu ku Parana yo, i ki rogo akumba Parana yo ki ndu ku Ezipeta yo, koyo du Faro ni nangia bakindo aEzipeto, ko ki fu bambu fu ko, ki ringbisi pa riahe tipa ko, ki fu rago fu ko.

¹⁹Adada ki ngba bangiri Faro gbe, ko ki fu wirina diako fu ko ni diako, nangia wirina Tapane, Tapane angia nakindo.

²⁰Wirina Tapane ki batika na Adada ni kumbagude rimoko ki ngia Genubata, Tapane andu na Genubata ko ki mbu ha mai ku Faro yo. Genubata ki du na awiri Faro ku Faro yo.

²¹Ho Adada agi he ni Ezipeta yo ya Dawidi kpi fuo atitako, Yoaba nangia barutiri rimbasavura ki kpi a, Adada ki ya fu Faro, “Mo fú gene fere, mi ga ku rogo gi ringara yo.”

²²Ono Faro ki ya fu ko, “Gini he zanga mo ho no du mi ni, mo akpi nyemu ka ga ti ni ku rogo ga ringara?” Ko ki ya, “Mi azanga nga he te; ono mo fú kina gene fere.”

²³Mbori ki zingisi kura bakitingbanga kuti Soromo, nangia Resona wiri Eriada, nangia gu ko naoro be gako gbia nangia Adadezere nangia bakindo Soba.

²⁴Ko ki dungura akumba koyo du ko ni, ki moi tiko ni barutirivura fu rikavura, ho Dawidi aimi aboro Soba ni. I ki ndu ku Damaseke yo, ki nye yo, ko ki zogo rago Damaseke yo.

²⁵Ko adu ni bakitingbanga aYisaraere ti rago Soromo dunduko, nimangi gbigbitapai a wa Adada amangi he. Ko ki sogo aYisaraere ki zogo rago Suria yo.

²⁶Yerobama nangia wiri Nabata, ni boro Efuraima Sereda yo, nangia ga Soromo moyambu, rimo nako nangia Serua, ni dekurugbo, ko azingi kuti bakindo a.

²⁷Ko azingi kuti bakindo mbiko gi pai re, nga: Soromo nadua Miro, ki mbakadi sapusapu pere gu bakporo nga ga bako nangia Dawidi.

²⁸Gu kumba re nangia Yerobama, ko adu ni nyanyaki boro ni ngangarã ko. Ho Soromo abi he ni ya gu paranga re adu ni ngangarã ko, ko ki moi ko ku ri aborosunge nangia ngbatunga Yosefa.

²⁹Si ki ta du wa gere ni gu rago re, ho Verobama akuru ni Yerusarema yo, gu nebi nangia Aiya ni boro Sirona ki bi ko gene. Aiya aukadi kpotoko ni vovo roko; i ue ki du rogo hauiago yo ni sa yo.

³⁰Aiya ki zi gu vovo roko naadu ti kpotoko, ki sipi rogo ho 12.

³¹Ko ki ya fu Yerobama. “Wo rógo gamo Da we; bambiko ya Yekova nga ga aYisaraere Mbori wẽ, ‘Mo ngére, mi nikakpara ngbi be Soromo, ki fu gu ngbatunga bawe foro,

³²ono mi ambú ngbatunga sa fu ko, bambiko Dawidi nangia gi moyambu, na mbiko pa Yerusarema nga gu bakporo mi asia ha dagba angbatunga aYisaraere,

³³bambiko Soromo ambu re, ki niirisi Asetorete nangia ga aSidona dembori, na Kemosa nangia ga aMoabo mbori, na Mirakoma nangia ga awiri aAmono mbori, ka ko apeka nga gimi asino, ka amanga gu pai ru aru bangire, ki ka kuti gimi rugaapai na gimi asarangbanga, a wa Dawidi anamanga ha nangia bako ya.

³⁴Wa vura du he wo mi adia nga ngbi be ko na baha te; ono mi ambú ko ni bakindo wa du ko ni ungako, bambiko Dawidi nangia gi moyambu, nangia gu ko mi asia ko, bambiko ko anaka kuti gimi arugute na gimi rugaapai.

³⁵Ono mi adia ngbi be wiriko, ki fu gu foro nga Yerobama, wa angbatunga bawe.

³⁶Ono mi afú gu ngbatunga sa fu wiri Soromo, ya ga Dawidi imarago nangia gi moyambu du adu kindi bara bangire Yerusarema yo, nga gu bakporo mi asia ha ni gimi ki moi rimore ti ni.

³⁷Mi adia ro, mo ki nizogo agu arago dunduko wa mbisimoro akpi nyemu he, mo ki du ni bakindo ku ri aYisaraere.

³⁸Si adú wo, ka mo gi sangbare dunduko nga gu mi aruga ro kuti ni, ki nipeke gimi asino, ki nimángi agu apai ru aru bangire ki nika kuti gimi rugaapai, na gimi arugute, a wa gi moyambu anamanga nangia Dawidi, si du mi ki du na mo, ki nyakasi ngbatungaro, a wa mi ananyakasa ngbatunga Dawidi, ki fu aYisaraere foro.

³⁹Mi ambúsa ngbatunga Dawidi mbiko gi pai re, ono nye anye kindi te.’ ”

⁴⁰Si du Soromo agbata Yerobama ti ni ka imo ko; ono Yerobama aguari, ki oro ku Ezipeta yo, koyo du Sisaka ni nangia bakindo aEzipeto. Ko ki nye ku Ezipeta yo da kina ho Soromo akpi ni.

⁴¹Were kura ga Soromo apai, na agu apai ko anamanga ha dunduko na pa gako tatamana, ati si ni keke he rogo gu kitabu napeka pa agu apai Soromo anamanga?

⁴²Gu rago Soromo azogo awiri aYisaraere dunduko ti ni Yerusarema yo, si adu wa garã 40.

⁴³Soromo ki kpi fuo atitako, i ki kpisidi ko rogo ga Dawidi bakporo nangia bako; Rabama ki zogo rago ku ba ko nangia wiriko.