Read zande 1 Abakindo 12 Bible Online

1 Abakindo 12 - zande bible

1 Abakindo 12

¹Rabama ki ndu ku Sekeme yo, bambiko aYisaraere dunduko andu ku Sekeme yo ka maa ko ni bakindo.

²Ho Yerobama nangia wiri Nebata agi he ni, bambiko ko adu kina Ezipeta yo kindi, yo ko aoro ku ho ni be bangiri Bakindo Soromo, Yerobama ki yega Ezipeta yo.

³I ki kedi sunge ka yamba ko. Yerobama ki ye na gbuu aYisaraere dunduko, ki gumba pai fu Rabama, niya,

⁴“Bamo amoi gonga ku gorani ni kere he. Awere tie, mo ákpurasi ga bamo kere nyanyaki sunge fu rani, na gu gako rõrõi gonga ko amoi ku gorani, ani nimángi pa ro.”

⁵Ko ki ya fu yo, “Oni gá tipa rame biata, oni ki ye berewe kono du mi ni.” Aboro ki guari ki ga.

⁶Bakindo Rabama ki saki pai na gbinza abaakumba, nangia agu yo nanaru mbata ku bara bangiri bako nangia Soromo ho ko adu ni ni ungako. Rabama ki sana yo ki ya, “Gini rugapai oni akaringbisa fere mi karaga ha fu agi aboro re?”

⁷I ki gumba pai fu ko ki ya, “Ka mo ídi pa du ni moyambu fu agi aboro re areme, ki nimángi pa yo, ki karaga pai fu yo, nigumba wene apai fu yo, i adú ni avururo nye anye kindi.”

⁸Ono ko abasa sangba gbinza abaakumba nga gu i ape fu ko, ki saki pai na kina aparanga nangia agu yo ko asono na yo, naru ku bara bangiriko.

⁹Ko ki ya fu yo, “Gini rugapai oni akaringbisa fere tigaoni, ani karaga ha fu agi aboro re, nga agu yo nagumba pai fere, niya, ‘Mo ákpurasi gu gonga bamo amoi ku gorani’?”

¹⁰Agu aparanga ko asono na yo i ki ta gumba pai fu ko, niya, “Were mo ka gumba ha fu agu yo nagumba pai foro, niya, ‘Bamo amoi rõrõi gonga ku gorani, ono mo tigamo, mo ákpurasi he;’ mo ki ya fu yo wẽ, ‘Tanga wirinzagare kii ti dimo buba.

¹¹Si du wa buba amoi rõrõi gonga ku goroni, mi tigimi arõasa gaoni gonga ki susi. Buba anata roni ni kpudu, ono mi tigimi atá roni ni kina angerembia.’”

¹²Si du Yerobama ki ye na aboro dunduko koyo du Rabama ni ti biata uru, a wa bakindo agumba ha fu yo, niya, “Oni yé kono du mi ni berewe ti biata rame.”

¹³Bakindo ki karaga pai fu aboro bau, ki basa sangba gbinza abaakumba i agumba fu ko,

¹⁴ki gumba pai fu yo kina kuti sangba aparanga, ki ya, “Buba amoi rõrõi gonga ku goroni, mi tigimi arõasa gaoni gonga ki susi; buba anata roni ni kpudu, mi tigimi atá roni ni kina angerembia.”

¹⁵Si du bakindo agia nga fugo aboro te; bambiko si aye be Yekova ya Yekova digisi gu sangbako ko agumba ha ku ngba Aiya nangia boro Sirona fu Yerobama nangia wiri Nebata.

¹⁶Ho aYisaraere abi he ni dunduko ya bakindo agia nga fugoyo te, aboro ki karaga ha fu bakindo ki ya, “Gini he nikadu fu rani rogo kumbo Dawidi? Mosoro be wiri Yisai fu rani te. Ako aYisaraere, oni gúari ka ga ku rogo gaoni abamburoko! Dawidi, kina ro ka banda ngbatungaro.” Si du aYisaraere aga ti ni ku rogo gayo abamburoko.

¹⁷Ono Rabama azogo kina agu awiri aYisaraere naaraka rogo agu abaakporo naadu Yuda yo.

¹⁸Bakindo Rabama ki kedi Adorama naadu ni bakumba ku ri zizi aborosunge, aYisaraere dunduko ki sopo ko na ambia, ko ki kpi. Si du Bakindo Rabama aipisi tiko ti ni ka rima ku rogo gako ngbagidavura, ka ora ku Yerusarema yo.

¹⁹Si du aYisaraere asa mungu ti ni kuti ngbatunga Dawidi, daku areme.

²⁰Ho aYisaraere dunduko agi he ni ya Yerobama yega berewe, i ki kedi sunge fuo ko ko ye koyo du gbuu ni, i ki sa ko ni bakindo ku ri aYisaraere dunduko. A nga boro sa nara fu ngbatunga Dawidi te, kina ngbatunga Yuda sa.

²¹Ho Rabama ada ni ku Yerusarema yo, ko adungura ngbatunga Yuda dunduko, na ngbatunga Benyamina, nangia siasia akumba wa 180,000 nangia aborosovura, i so vura kuti angbatunga aYisaraere, ka karaga ngbi berewe fu Rabama nangia wiri Soromo.

²²Ono sangba Mbori aye koyo du Semaya ni nangia ga Mbori kumba, ki ya:

²³“Mo gúmba pai fu Rabama nga wiri Soromo, nga bakindo aYudo, na fu ngbatunga Yuda na Benyamina, na fu yangara aboro dunduko, ki ya,

²⁴‘Ya Yekova wẽ, Ka oni ndú nga ya, ka oni só nga vura kuti awirinaroni nga awiri aYisaraere a ya. Oni káraga tironi dunduko ku kpuroni yo, bambiko gi pai re ye he be re.’ ” Si du i agi sangba Yekova ti ni, ki karaga tiyo ngba gayo agene, wa Yekova agumba ha.

²⁵Yerobama ki dua Sekeme rogo ringara abaagangara Efuraima, ki niraki yo. Ko ki guari yo, ki dua Penuere.

²⁶Yerobama ki ya ku kpotoko yo, “Pa ngbi nikakaraga tihe berewe fu ngbatunga Dawidi awere;

²⁷ka agi aboro re ndu ka atumo na ũmotumo rogo ga Yekova bambu yo du Yerusarema yo, kpoto agi aboro yo re asá tihe berewe fu gayo gbia, fu kina Rabama bakindo aYudo. I aimo re, ki sa tiyo berewe fuo Rabama bakindo aYudo.”

²⁸Si du bakindo asana he ti ni, ki mbakadi kpia wiri abagara ue ni dahabu. Ko ki ya fu aboro, “Kpakara ndu ku Yerusarema yo akpakara fu roni. Ako aYisaraere, oni bi nga gaoni ambori, nga gu nakusi roni ringara Ezipeta yo.”

²⁹Ko ki moi gu sa Betere yo, ki moi kura ha Dana yo.

³⁰Gi pai re ki ye ka du ni ingapai, bambiko aboro anandu ka fu irisa barangba gu du Betere yo na gu du Dana yo a.

³¹Ko ki dudua abambu nga ga tumbatumba arago, ki nisa gu kungba aboro ni aboromotumo, nangia nga awiri Revi ya.

³²Yerobama ki asia pa pumbo rogo muambi diwi, ti rameru 15, a wa gu pumbo naadu Yuda yo, ko ki fu amotumo ku ri bamotumo; ko ki mangi a wo ku Betere yo, nitumo fu gu kpia wiri abagara ko amangi he. Ko ki moi agu aboromotumo ku Betere yo nangia ga tumbatumba arago yo, ko asa yo.

³³Ko ki ndu ku bamotumo yo nga gu ko ambakadi Betere yo ti gu 15 uru nga ga muambi diwi, nga gu diwi ko aberẽ pa ha ku kpotoko yo ni tiko. Ko ki asia pa pumbo fu awiri aYisaraere, ki ndu ku bamotumo yo ka zo fuõngua.