Read zande 1 Abakindo 14 Bible Online

1 Abakindo 14 - zande bible

1 Abakindo 14

¹Ni gu rago re kaza azi Abiya nangia wiri Yerobama.

²Yerobama ki ya fu diako, “Mi nazungadi ro, mo gúari, ki biriki tiro, ka boro ini nga ya dia Yerobama nga mo ya. Mo ki ndu ku Siroa yo; mo ngére, Aiya nangia nebi du yo, nga gu ko nagumba ha ya mi nikadu ni bakindo ku ri agi aboro re.

³Mo ndú na kpokuta bawe, na udiudi kpokuta, na nzeme anyege rogo kambu, ki ndu koyo du ko ni. Ko agúmba gu pai foro nikamanga gude.”

⁴Dia Yerobama ki mangi wo. Ri ki guari, ki ndu ku Siroa yo, ki da ku Aiya yo. Ono Aiya arengba nga ka ngera te, bambiko bangiriko adu ni tataita ha be gbinza.

⁵Yekova ki ya fu Aiya, “Mo ngére, dia Yerobama naye ka sana ro tipa wiriri; bambiko ko nakaza. Mo yá fu ri were na were.” Ho ri ada ni, ri abiriki tiri ki sa tiri wa kura de akia.

⁶Ono ho Aiya agi woro nduri ni, wa ri arima ti ngbadimo, ko ki ya, “Mo rimi, mo nga dia Yerobama; tipagine biriki mo tiro ti ni ka du wa kura boro akia? Bambiko i kedi re na nyanyaki pangbanga tipa ro.

⁷Mo ndú ki ya fu Yerobama, ‘Ya Yekova nga ga aYisaraere Mbori wẽ: “Wa mi avura kiisa pa ro dagba aboro, ki moi ro ni bazogo ku ri gimi aboro nga aYisaraere,

⁸ki kpara ngbi be ngbatunga Dawidi, ki fu he foro; ono sinoro wa ga gi moyambu nangia Dawidi te, naaka kuti gimi arugute, nipeke re na kpotoko yo dunduko, ki nimangi kina gu pai ngba bangire.

⁹Ono mo mangi gbigbitapai ki susi agu yo dunduko naadu mbata foro, mo andu ki mbakadi kura ambori tipa ro, na kpiahe ni zaragasizaragasi marã, ka gara gi zinga ku ri ro, ki ba re ku gii ro yo.

¹⁰Si du mi ka ye ti ni na gbigbitapai ku ri ngbatunga Yerobama, ki nyasi akumba be Yerobama dunduko, gu ni du ni zogozogo ni, na gu ni ra ni rini a Yisaraere no, ki ba ngbatunga Yerobama aba ku sa yo kpakaya, a wa boro nizo gbegberẽ rago, daho si ka gbi ni dunduko.

¹¹Gu ngbatunga Yerobama nikanikpi bakporo yo, aango nikaniriti ni; gu ni nikanikpi haurago yo, azire ari nikaniriti ni; bambiko Yekova gumba ha wo.”’

¹²Mo gúari tie, ki ga ku kpuro yo. Ho nduro ka rima ni ku bakporo yo, gude akpi.

¹³AYisaraere dunduko nikakpara ko ki nita ngbaduyo ki kpisidi ko; bambiko dagba awiri Yerobama yo kina ko sa nikazorã ku murã yo, bambiko i bi wenepai kpotoko yo koyo du Yekova ni, nga ga aYisaraere Mbori, dagba ngbatunga Yerobama.

¹⁴Gbiakuti gere, kina Yekova nikafu bakindo ku ri aYisaraere ni tiko, nikanyasa ngbatunga Yerobama ni gu rago re.

¹⁵Bambiko Yekova nikata aYisaraere, a wa badumo nawo rogo ime yo, ka amofa aYisaraere amofa rogo gi wene ringara re, nga gu ko afu fu abayo, ki gbandaka yo ku mbiti Ferata yo, bambiko i ambakadi gayo aAsera nga ngbama, ki gara ga Yekova zinga kuti yo.

¹⁶Yekova ambú aYisaraere bambiko ga Yerobama ingaapai, nga gu ko amangi, ki niingisi aYisaraere i niingi pai.”

¹⁷Dia Yerobama ki guari, ki ndu ki da ku Tirusa yo. Ho ri ada ni ti barima ti ngbadimo bambu, gude ki kpi.

¹⁸AYisaraere dunduko ki kpisidi ko ki ta kpara ko, nita ngbaduyo, kuti sangba Yekova, gu ko agumba ku ngba gako moyambu nangia Aiya nangia nebi.

¹⁹Were, kura ga Yerobama mangaapai, wa ko aso vura, na wa ko azogo rago, oni ngére, si du ni keke he rogo gu Kitabu Peka pa agu apai Abakindo aYisaraere anamanga.

²⁰Agu agarã Yerobama azogo rago ti ni adu wa garã 22; ko ki kpi fuo atitako, Nadaba ki zogo rago ku ba ko nangia wiriko.

²¹Rabama ki zogo rago Yuda yo nangia wiri Soromo. Garã Rabama adu 41 ho ko atona ka zoga rago ni. Ko ki zogo rago garã ki du 17 Yerusarema yo, nga gu bakporo Yekova asia ha dagba angbatunga aYisaraere dunduko, ka maa rimoko ti ni. Rimo na Rabama angia Nama ni boro Amona.

²²AYudo ki nimangi gu pai nadu ni gbigbita ha bangiri Yekova, i ki zingisi ko dati deringo na gu gayo ingaapai i anamanga, ki susi gu atitayo anamanga dunduko.

²³Bambiko i ni tiyo adudua tumbatumba arago na kpiaahe, na aAsera nga ngbama ku ri gbangagbanga agangara dunduko, na tii agu angua du na fogo kpehe dunduko.

²⁴Airabari akumba adu rogo ringara a. I anamanga kere gbegberẽapai a wa agu arikaaboro anamanga nga agu yo Yekova ado yo barangba awiri aYisaraere.

²⁵Si adu wa gere, ti bisue garã zogarago nga ga Bakindo Rabama, Sisaka nangia bakindo aEzipeto aye na vura kuti Yerusarema.

²⁶Ko ki rogo gu kikiipaahe naadu rogo ga Yekova bambu, na gu kikiipaahe naadu rogo ga bakindo bambu yo; ko ki ga na ni dunduko. Ko ki rogo agu avurakube du ni dahabu Soromo ambakadi he dunduko.

²⁷Bakindo Rabama ki mbakadi avurakube ni sirigi ku ba ha, ki fu he ku be agu abaakumba naadu ku ri ababandarago, nangia agu yo naabanda ngbadimo ga bakindo bambu.

²⁸Si adu wa gere, wa bakindo anandu ku rogo ga Yekova bambu yo, babandarago aniaka ha ki nigasi he berewe ku rogo ga ababandarago bambu yo.

²⁹Kura ga Rabama apai, na agu apai dunduko ko anamanga, ati si ni keke he rogo gu Kitabu Peka pa agu apai Abakindo aYudo anamanga?

³⁰Vura anye dagba aRabama na Yerobama kindi.

³¹Rabama ki kpi fuo atitako, i ki kpisidi ko fuo atitako rogo gu bakporo nga ga Dawidi. Rimo nako nangia Nama ni boro Amona. Abiyama ki zogo rago ku ba ko nangia wiriko.