Read zande 1 Abakindo 15 Bible Online

1 Abakindo 15 - zande bible

1 Abakindo 15

¹Ti gu 18 garã zogarago nangia ga Bakindo Yerobama nangia wiri Nebata, Abiyama ki tona zoga rago Yuda yo.

²Ko ki zogo rago Yerusarema yo tipa garã biata. Rimo nako angia Maka, nangia wiri Abisaroma.

³Ko ki nimángi pai wa kina ga bako ingaapai dunduko, gu ko ana manga ha mbata; ka kpotoko yo adu nga ziazia koyo du Yekova ni nangia gako Mbori, wa kpoto titako yo adu nangia Dawidi ya.

⁴Ono mbiko Dawidi, Yekova gako Mbori afu imarago fu ko Yerusarema yo, ka maa wiriko fuo ko, na ka nyakasa Yerusarema;

⁵bambiko Dawidi anamanga gu pai naru aru bangiri Yekova, ka ko asa nga tiko ti manga gu pai sa ko arugu ko kuti ni wa ko adu ni ungako ya, ono kina ti gu pai sa nangia pa Uria nangia boro Ito.

⁶Vura anye dagba aRabama na Yerobama ti ragoko dunduko.

⁷Kura ga Abiyama apai, na agu apai dunduko ko anamanga, ati si ni keke he rogo gu Kitabu Peka pa agu apai Abakindo aYudo anamanga? Vura anye dagba aAbiyama na Yerobama.

⁸Abiyama ki kpi fuo atitako; i ki kpisidi ko rogo gu bakporo nga ga Dawidi. Asa ki zogo rago ku ba ko nangia wiriko.

⁹Ti gu 20 gara zogarago nangia ga Yerobama nangia bakindo aYisaraere, Asa ki tona zoga aYudo,

¹⁰ko ki zogo rago Yerusarema yo tipa garã 41. Rimo nako angia Maka nangia wiri Abisaroma.

¹¹Asa ki nimángi gu pai naru aru bangiri Yekova, a wa titako anamanga ha nangia Dawidi.

¹²Ko ki dandi airabari akumba ku sa yo rogo ringara, ki rogo gu kpiaahe ku sa yo atitako amangi he.

¹³Ko ki di nako ku sa yo ti du ni nakindo a nangia Maka, bambiko ri ambakadi gbegberẽ kere kpiahe ni ngbatunga Asera nga ngbama; Asa ki dewe gari kpiahe, ki zo ho pavuru gu wiridi nga Kidirona.

¹⁴Ono ko agbarasa nga tumbatumba arago te. Ono kpoto Asa yo adu ni ziazia ha koyo du Yekova ni ti ragoko dunduko.

¹⁵Ko ki ye na agu ahe bako anakpara ha ku rogo ga Yekova bambu yo, na agu ahe ko ni tiko akpara ha a, nga feda, na dahabu, na aũsunge.

¹⁶Vura ki du dagba aAsa na Basa nangia bakindo aYisaraere ti gayo arago dunduko.

¹⁷Basa nangia bakindo aYisaraere ki ndu kuti Yuda, ki dua Rama, ya ka boro kuru nga watadu rima ka ndu koyo du Asa ni nangia bakindo aYudo ya.

¹⁸Asa ki rogo gu feda nanye rogo baiga kikiipaahe na gu dahabu naadu rogo ga Yekova bambu yo dunduko, na gu kikiipaahe naadu rogo ga bakindo bambu yo a. Ko ki fu he ku be gako amoyambu. Bakindo Asa ki kedi he koyo du Benadada ni nangia bakindo aSurio, nanaraka Damaseke yo, nangia wiri Taburimona, Taburimona angia wiri Eziona. Asa ki ya,

¹⁹“Mozunga dú dagba rani na mo a, wa si adu dagba buba na bamo: mo ngére, mi kedi gamahe koyo du mo ni nga feda na dahabu. Mo ndú, ki mbu gu ga mozunga du dagba roni na Basa nga bakindo aYisaraere, ko guari ti re.”

²⁰Benadada ki gi sangba Bakindo Asa, ki kedi abarutiri gako rimbasa vura kuti ga aYisaraere abaakporo, ki mangi Iyona, na Dana, na Aberebete-maka, na Kinerota dunduko, na ringara Nafatari dunduko ki di be he.

²¹Ho Basa agi he ni, ko ki mbu dua Rama, ki nye Tirusa yo.

²²Bakindo Asa ki ru ndika fu aYudo dunduko, ka ko ambu nga boro wa sa ya, i ki rogo agu ambia naadu Rama yo, na angua bambu du, nangia gu Basa adua ha na ni. Bakindo Asa ki dua Geba na ni ringara Benyamina yo, na Misipa.

²³Kura ga Asa apai, na pa gako ngarã dunduko, na agu apai dunduko ko amangi he, na pa agu abaakporo ko adudua ha, ati si ni keke he rogo gu Kitabu Peka pa agu apai Abakindo aYudo anamanga? Ono ho ko agbinza ni ko akaza ti nduko.

²⁴Asa ki kpi fuo atitako, i ki kpisidi ko fuo atitako rogo ga Dawidi bakporo nangia titako. Yosafata ki zogo rago ku ba ko nangia wiriko.

²⁵Nadaba ki tona zoga aYisaraere nangia wiri Yerobama ti gu ue garã zogarago nangia ga Asa bakindo aYudo. Ko ki zogo aYisaraere tipa garã ue.

²⁶Ko ki nimangi gu pai nadu ni gbigbita ha bangiri Yekova, ki nipeke sino bako, rogo gu gako ingapai ko anaingisa aYisaraere na ni i niingi pai.

²⁷Basa nangia wiri Aiya ni ngbatunga Yisasakara, ki nita bura ko. Basa ki imi ko Gibitona yo, nangia ga aFereseto kporo; bambiko Nadaba aru nguru na aYisaraere dunduko kuti Gibitona.

²⁸Basa aimi Nadaba ni kina gu biata garã zogarago nangia ga Asa bakindo aYudo, ki zogo rago ku ba ko.

²⁹Ho Basa atona ka du ni ni bakindo, ko ki imi angbatunga Yerobama dunduko; ko ambu nga gu ni sa ni ungani fuo Yerobama te, daho ko agbarasi yo ni dunduko, ku sangba ga Yekova gumba pai yo, nga gu ko agumba ku ngba gako moyambu nangia Aiya boro Sirona.

³⁰Si adu wo bambiko ga Yerobama ingaapai nga gu ko anamanga, ki niingisi aYisaraere i niingi pai, na bambiko gako wingba ko agara ga Yekova zinga kuti ko a, nga ga aYisaraere Mbori.

³¹Kura ga Nadaba apai, na agu apai ko amangi he dunduko, ati si ni keke he rogo gu Kitabu Peka pa agu apai Abakindo aYisaraere anamanga?

³²Vura adu dagba aAsa na Basa nangia bakindo aYisaraere ti gayo arago dunduko.

³³Ti gu biata garã zogarago nangia ga Asa bakindo aYudo, Basa nangia wiri Aiya ki tona zoga aYisaraere dunduko Tirusa yo, ko ki zogo rago tipa garã 24.

³⁴Ko ki nimangi gu pai nadu ni gbigbita ha bangiri Yekova, ki nipeke sino Yerobama, rogo gu gako ingapai ko anaingisa aYisaraere na ni i niingi pai.