Read zande 1 Abakindo 18 Bible Online

1 Abakindo 18 - zande bible

1 Abakindo 18

¹Si adu wa gere fuo dungu rame, ti biata garã, sangba Yekova ki ye koyo du Eriya ni, ki ya, “Mo dú, ki yugu tiro fu Aba; mi akéda mai ku auru kpotosende.”

²Eriya ki ndu ka yugo tiko fu Aba. Gberãngbi adu Somorona yo ni kere he.

³Aba ki yambu Obadaya nadu ni bakumba ku ri gako aborokporo. Were Obadaya agunde ti Yekova bakere;

⁴bambiko si adu were, ho Izebere arogo ga Yekova anebi ku sa yo ni, Obadaya andu na anebi 100, ki oko yo ni ba 50 ku rogo siambia yo, ki nirigi yo na riahe na ime a.

⁵Aba ki ya fu Obadaya, “Mo tá rogo ringara ku pati agugaabi yo dunduko, na wiriadi dunduko; si ngia ani abi nvuo yo ka batasa afarasi na adongi na ni ami nye ni ungara, ka anya kpi nga be rani dunduko ya.”

⁶Si du i akparaka ringara ti ni dagba yo ka ta rogo ho; Aba ki ndu ti gako ku bani, Obadaya ki ndu ku bani ni sa ko.

⁷Ho Obadaya adu ni ngba gene, Eriya ki gbia ko. Obadaya ki ini ko, ki vagadi ku sande ni kpakpuko, ki ya, “Mo du nga gi gbia nga Eriya?”

⁸Ko ki karaga ha fu ko ki ya, “Mi du. Mo ndú ki ya fu ga gbia, ‘Mo ngére, Eriya du erẽ.’ ”

⁹Obadaya ki ya, “Gini pai ingi mi rogo ho, mo afu ga moyambu ti ni ku be Aba, ko imi re?

¹⁰Bambiko a wa du Yekova ni ungako nga ga Mbori, a nga ngbatunga aboro watadu ngbi du ho sa, gi gbia ahe keda sunge ka gbata ro rogo ho te. Ho i aya ni, ‘Ko e te re,’ ko aidi gu ngbi na gu ngbatunga aboro re, i zunga he, ya i abi nga ro te.

¹¹Awere ya mo, ‘Mo ndú, ki gumba ha fu ga gbia, “Mo ngére, Eriya du erẽ.” ’

¹²Si adu were, ho mi ka guari ni pati ro, ni ba sa ga Yekova toro andú na mo ku ho mi aina nga ni ya; si du ho mi ka da ni ki gumba ha fu Aba, ka ko abi nga ro ya, ko aimo kina re. Ono mi nga ga moyambu, mi nagunde ti Yekova ho mi adu ni ni parangare daku awere.

¹³I agumba nga gu pai fu gi gbia mi amangi ho Izebere aimi ga Yekova anebi ni, te? wa mi aoko akumba 100 dagba ga Yekova anebi, ni ba 50 ku rogo siambia, ki nirigi yo na riahe na ime a.

¹⁴Awere ya mo, ‘Mo ndú ki ya fu ga gbia, “Mo ngére, Eriya du erẽ” ’; ko aimo re aimo.”

¹⁵Ono Eriya ki ya, “A wa du Yekova ni ungako, nga ga arimbasa ko, nga gu ko ru mi bara bangiriko, mi ayúgo tire fu Aba kina areme.”

¹⁶Si du Obadaya andu ti ni ka gbia Aba, ki gumba ha fu ko; Aba ki ndu ka gbia Eriya.

¹⁷Si adu wa gere, ho Aba abi Eriya ni, Aba ki ya fu ko, “Mo du re nga barungosi aYisaraere?”

¹⁸Eriya ki karaga ha ki ya, “Mi arungosi nga aYisaraere te; ono kina ro, na ga bamo aboro, bambiko oni ambu ga Yekova arugute ki nipeke sino aBara.

¹⁹Awere tie, mo kédi asunge, ki dungura aYisaraere dunduko fere ku ri Bagangara Karumera yo, na agu anebi du 450 nga ga Bara yo, na agu anebi 400 nga ga Asera yo nga ngbama, nga agu yo nari riahe na Izebere ku auru gari mbisa.”

²⁰Si du Aba akedi asunge ti ni fuo awiri aYisaraere dunduko, ki dungura anebi wa sa ku ri Bagangara Karumera yo.

²¹Eriya ki mbedi koyo du aboro ni dunduko, ki ya, “Rago adú waĩ oni nidu na berãpai ue? Ka ngia Yekova nga Mbori, oni péke ko; ka si ngia Bara, oni péke kina ko.” Ka aboro akaraga nga pai fu ko wa sa ya.

²²Eriya ki ya fu aboro, “Mi, kina mi sa, nye ni ga Yekova nebi; ono ga Bara anebi du wa aboro 450.

²³Oni yé na abaabagara ue fu rani tie; i sia gu babagara sa tipa yo, ki yepe ru rukutu, ki moi pasioru ku auru nyake, ka i tigi nga we ku tii he yo ya. Mi tigimi ambákada gu kura babagara, ki moi pasioru ku auru nyake, ka mi atíga nga we ku tii he yo a ya.

²⁴Oni ki kpari ti rimo gaoni mbori, mi tigimi akpára ti rimo Yekova; gu Mbori nikakaraga pai ni fu we, kina ko nga ndikidi Mbori.” Aboro ki karaga ha dunduko ki ya, “Gu pai gumba mo, ngba ha angba ni rengo.”

²⁵Eriya ki ya fu ga Bara anebi, “Oni sia babagara sa tipa roni, ki mbakadi ru mbata, bambiko nge oni ange. Oni ki kpari ti rimo gaoni Mbori, ono ka oni tigi nga we ku tii he yo ya.”

²⁶I ki di gu babagara i afu ru fu yo, ki mbakadi ru, ki nikpari ti rimo Bara tona wiso dati bebere uru, niya, “Ako Bara, mo káraga pai fu rani!” Ono ka i agia nga fugo na karagapai a ya. I ki niguku pati gu bamotumo i amangi.

²⁷Si adu wa gere ti bebere uru, Eriya ki nimomu yo, ki ya, “Oni kpári ni wawa, bambiko mbori nga ko; ka ngia ko nabaka bangiriko, watadu ko merẽ toni, na ko gene nunguro yo, watadu ko nara ara, oni zingisi ko.”

²⁸I ki nikpari ni wawa gbe, nidewe tiyo ni asape na abaso wa sinoyo adu, daho kure agbadi ni ti yo.

²⁹Si adu wa gere, ho bebere uru asusi ni, i ki nigumba pai wa nebi dati kina gu rago i nitumo ni gu motumo nga ga nyemu, ono ka i agia nga fugo ya; na karagapai, na fugo gu ni nai a ya.

³⁰Eriya ki ya fu aboro dunduko, “Oni gbisi kono du mi ni”; aboro ki gbisi koyo du ko ni dunduko. Ko ki mbakadi ga Yekova bamotumo berewe nga gu i aba ha ku sande.

³¹Eriya ki rogo ambia 12, a wa angbatunga awiri Yakoba adu, nangia gu ko sangba Yekova aye koyo du ko ni, ki ya, “I sa rimoro nga Yisaraere.”

³²Ko ki dua bamotumo ni agi ambia re ti rimo Yekova. Ko ki ge due kirikiri pati bamotumo, bakiaha ki rengbe na tunga ahe wa aritere 24 na bebere he a.

³³Ko ki moi nyake ku auru he nzunzu, ki yepe babagara rukutu, ki moi pasioru ku auru nyake. Ko ki ya, “Oni híhisi arunge biama na ime, ki uka ha ku ri zozo motumo na ku ri nyake.”

³⁴Ko ki ya, “Oni mángi he berewe ni ue he”; i ki mangi he ni ue he. Ko ki ya, “Oni mángi he berewe ni biata ha”; i ki mangi he ni biata ha a.

³⁵Ime ki nifu kirikiri pati bamotumo; due ki hi be ime a.

³⁶Si adu wa gere ti gu rago i nitumo ni gu motumo nga ga nyemu, Eriya nangia nebi ki mbedi, ki ya, “Ako Yekova, ga Abarayama Mbori, nga ga Yisaka, nga ga Yisaraere a, i ini he ni gi uru re ya kina mo nga Mbori Yisaraere no, na mi a tigimi nga ga moyambu, na gu pai mangi mi he dunduko si kuti sangbaro.

³⁷Ako Yekova, mo káraga pai fere, mo káraga pai fere, agi aboro re ini ti ni ya mo Yekova nga Mbori, kina mo sa kpotoyo yo berewe.”

³⁸Ga Yekova we ki ti, ki riti zozo motumo, na nyake, na ambia, na nvutu, I nyoto gu ime naadu due yo dunduko.

³⁹Ho aboro abi he ni dunduko, i ki tiwi ku sande ki vagadi ni kpakpuyo. I ki ya, “Yekova, ko nga Mbori; Yekova, kina ko nga Mbori.”

⁴⁰Eriya ki ya fu yo, “Oni zi ga Bara anebi; ka gu ni mérẽ nga sa ya.” I ki zi yo; Eriya ki zorõ na yo ku pangba gu wiridi nga Kisona ki iimi yo yo.

⁴¹Eriya ki ya fu Aba, “Mo gúari, ki ri riahe ki mbiri he; bambiko bamai napuma.”

⁴²Si du Aba ki ndu ka ri riahe ki mbiri he. Eriya ki ndu ku ri Karumera yo; ko ki nugadi ku sende, ki moi riko ku dagba arukusuko yo.

⁴³Ko ki ya fu gako moyambu, “Mo ndú awere, ka ngera ku baime yo.” Ko ki ndu, ki ngere, ki ya, “He yo te.” Eriya ki ya, “Mo ndú berewe bara saba.”

⁴⁴Fuo gere ti saba ha, ko ki ya, “Mo ngére, wiri ndura naguari baime yo, wa kina be boro.” Eriya ki ya, “Mo ndú, ki ya fu Aba, ‘Mo mbákadi ga ngbagidavura, ki zorõ, ka mai dika nga ro ya.’ ”

⁴⁵Fuo ho ngbutuko, ngbangbaturũ ki biri abira be mai na yuge, mai ki na ana kpodorokpodoro. Aba ki ndu rogo gako ngbagidavura ku Yizerere yo.

⁴⁶Be Yekova ki du ku ri Eriya; ko ki sikpa tiko, ki oro ku mbata yo fu Aba dati barima ku Yizerere yo.