Read zande 1 Abakindo 19 Bible Online

1 Abakindo 19 - zande bible

1 Abakindo 19

¹Aba ki gumba agu apai dunduko fu Izebere nga gu Eriya amangi, na wa ko aimi anebi dunduko na basape.

²Izebere ki kedi sunge koyo du Eriya ni, ki ya, “Ka mi amánga nga ungaro gba wiso ti saa wa gere wa unga gu ni dagba agu yo yo ya, ambori mángi kina wo fere, na kura ha ku ri he a.”

³Eriya ki du na gunde, ko ki guari, ki oro ka batasa ungako, ki da ku Bera-saba yo, nangia ga aYudo bakporo. Ko ki mbu gako moyambu kina yo.

⁴Ono ko ki nungu ni sako ku ngbakungba yo wa uru sa, ki da sungu tii ngua nga retama, ko ki sana he Mbori idi he fu ko ko kpi, ko ki ya, “Ako Yekova, pai di be re; mo di ungare ti re awere; bambiko a nga mi ngbatiabubate.”

⁵Ko ki pi sande ki nira tii gu ngua nga retama. Oni ngére, maraika ki zadi ko, ki ya fu ko, “Mo gúari ki ri riahe.”

⁶Ko ki ngereke, oni ngére, wiri kpokuta i azo kingiriwe yo ki du ba riko, na ndukura ime. Ko ki ri riahe ki mbiri he, ki pi sande berewe.

⁷Ga Yekova maraika ki ye berewe ni ue he, ki zadi ko, ki ya, “Mo gúari ki ri riahe; nduge ka susaomero.”

⁸Ko ki guari, ki ri riahe ki mbiri he, ki ndu na kina ome gi riahe re tipa uru 40 na yuru 40 a, ki da ku pavuru Orebe yo nga ga Mbori bagangara.

⁹Ko ki da ku pati simbia yo, ki niraki yo. Oni ngére, sangba Yekova ki ye koyo du ko ni, ko ki ya fu ko, “Gini he mo amanga erẽ, Eriya?”

¹⁰Ko ki ya, “Kpi mi pa Yekova, nga ga arimbasa Mbori; bambiko bangiri awiri aYisaraere go ti gako zungahe, i bafu gamo abamotumo ku sande, ki imi gamo anebi na basape; ono mi, kina re sa nye; i nagbata ungare, ka dia ha ti re.”

¹¹Yekova ki ya, “Mo ndú, ki ru ri bagangara bara ngere Yekova.” Oni ngére, Yekova ki susi pati he, bakere gugugu yuge ki nisapu abaagangara, ki nisapu ambia rukutu ku barangba Yekova yo, ono Yekova adu nga rogo yuge yo te. Fuo yuge bazigizo ki du, ono Yekova adu nga rogo bazigizo yo te.

¹²Fuo bazigizo we ki ye, ono Yekova adu nga rogo we yo te; fuo we wiri toni bayee fugo ki du.

¹³Ho Eriya agi he ni, ko ki dadi kpakpuko na gako gbanga roko, ki kuru ki ru ti ngbadimo simbia. Oni ngére, fugo ki ye koyo du ko ni, ki ya, “Gini he mo amanga erẽ, Eriya?”

¹⁴Ko ki ya, “Kpi mi pa Yekova, nga ga arimbasa Mbori; bambiko bangiri awiri aYisaraere go ti ga zungahe, i bafu gamo abamotumo ku sande, ki imi gamo anebi na basape; ono mi, kina re sa nye; i nagbata ungare, ka dia ha ti re.”

¹⁵Yekova ki ya fu ko, “Mo ndú, ki karaga tiro ngba gene ngbakungba Damaseke. Ho mo ka da ni yo, mo ki mbedi Azaere ni bakindo ku ri aSurio;

¹⁶mo ki mbedi Yeu nga wiri Nimisi ni bakindo ku ri aYisaraere; mo ki mbedi Erisa nga wiri Safata du Aberemora yo ni nebi ku ba ro.

¹⁷Wo si akadu, nga gu ni nikabata be ga Azaere basape, Yeu nikaimo ni; gu ni nikabata be ga Yeu basape, Erisa nikaimo ni.

¹⁸Ono mi ambú aboro wa 7,000 Yisaraere yo ni gimi yo, nga agu yo ninakuka nga ni rukusuyo fu Bara ya, nga agu yo ninanyora nga kpia Bara a ya.”

¹⁹Si du Eriya aguari ti ni, ki bi Erisa nangia wiri Safata, ko nisopo gako bino na abaabagara ni ba ue bara 12, ko ki du na gu yangara ra ue ku sa no. Eriya ki susi pati ko ki ba gako gbanga roko ku auru ko.

²⁰Erisa ki mbu abaabagara, ki oro fuo Eriya, ki ya, “Mi nazungadi ro mo idi he fere, mi pói kuti buba na nina, fuo gure mi ki ye ka peka ro.” Eriya ki ya fu ko, “Mo káraga tiro berewe; bambiko gini pai mangi mi foro?”

²¹Ko ki karaga tiko ti fuo Eriya, ki di abaabagara ue, ki imi ra, ki pasi pasiora ngba gonga abaabagara, ki fu he fu aboro, i ki ri he. Ko ki guari ki ndu fuo Eriya, ki nimangi pako.