Read zande 1 Abakindo 2 Bible Online

1 Abakindo 2 - zande bible

1 Abakindo 2

¹Were ga Dawidi rame ki mbedi ko kpi. Ko ki rugu Soromo nangia wiriko, niya,

²“Mi nikandu ngba gu gene nga ga aboro zegino dunduko. Si du mo dú nyanyaki, ki yugu tiro ni kumba,

³ki nika kuti ga Yekova rugute nga ga Mbori, ka apeka gako asino, ki nika kuti gako rugapai, na gako arugute, na gako asarangbanga, na gako dezireapai, a wa i ake he rogo ga Mose rugute, si mo ka u ti ni rogo agu apai dunduko mo ka amanga ha, na yo mo ka andu ku ho ni a;

⁴ya Yekova nyákasi gu pai ko agumba tipa re, niya, ‘Ka awiro abánda gayo apai, ka ta bara bangire rogo yososopai na kpotoyo yo dunduko na mbisimoyo dunduko, ga aYisaraere mbatabakindo azánga nga bazogo auru he te.’

⁵“Gbiakuti gere, mo ini gu pai Yoaba amangi kuti re a, nga wiri Seruya, na gu pai ko amangi kuti ga aYisaraere abarutiri rikavura ue, nga Abinera nangia wiri Nere, na Amasa nangia wiri Yetere, nga agu yo ko aimi yo, ki uka kure vura ti rago zereda, kure vura ki du ti gako giri dimose, na ti gu rakata naadu nduko yo.

⁶Si du mo mángi pai tipa ha ku sangba ga tatamana yo, ono ka mo ídi nga ko zorõ na nvue ku murã yo zezeredi ya.

⁷Ono mo yúgu weneringise fu awiri Baruzirai nga boro Girada, i ki du dagba agu yo nari riahe pati ga mbisa; bambiko wa i ayugu weneringise fere ho I aye ni kono du mi ni ho mi aoro ni be Abisaroma nangia wiribamo.

⁸Mo ngére, Simi du na mo a, nga wiri Gera, ni ngbatunga Benyamina, naadu Baurima yo, nga gu ko naatiwa re ni bakere motiwa ni gu rago mi andu ku Manaima yo. Ono ho ko aye ni ku Yaradene yo ka ngbisa re, mi azunga he fu ko ti rimo Yekova, ki ya, ‘Mi aimo nga ro ni basape te.’

⁹Si du ka mo mbu nga ko ti ni awere ya, bambiko boro tatamana nga mo tigamo. Mo aina gu pai mo ka manga ha kuti ko, mo ki ye na ko na nvue ku murã yo na kure.”

¹⁰Dawidi ki kpi fuo atitako, i ki kpisidi kangbako rogo gu bakporo nga ga Dawidi.

¹¹Dawidi azogo aYisaraere tipa garã 40 dunduko. Ko azogo yo Eburone yo tipa garã saba, ki zogo yo Yerusarema yo tipa garã 33.

¹²Soromo ki sungu auru ga bako mbatabakindo nangia Dawidi; gako ngbi ki nyaki anyaka gbe.

¹³Adoniya nangia wiri Agita ki ye koyo du Bataseba ni nangia na Soromo. Ri ki ya, “Ye mo na pa zereda?” Ko ki ya, “Na pa zereda.”

¹⁴Ko ki ya fu ri, “Pai ngbare mi aka gumba ha foro.” Ri ki ya, “Mo gúmba ha.”

¹⁵Ko ki ya, “Mo ini he tigamo ya ngbi adu ni gimi, aYisaraere dunduko ki ningere kono du mi ni, mi zogo yo; ono i asa apai, ngbi ki du ni ga wiribuba bambiko Yekova.

¹⁶Kina mi sana ro tipa pai sa awere, ka mo ká nga na ni be re ya.” Ri ki ya, “Mo gúmba pa ha.”

¹⁷Ko ki ya, “Mi nakpara foro, mo gúmba pai fu Bakindo Soromo bambiko ko abéngeta nga ro te ko fu Abisaga fere ni diare nga boro Sunema.”

¹⁸Bataseba ki ya, “Mi idi he; mi agúmba pa ha fu bakindo tipa ro.”

¹⁹Si du Bataseba andu ti ni koyo du Soromo ni, ka gumba pa ga Adoniya pai fu ko. Bakindo ki mo ku ari ka ngbisa ri, ki tumusa ku sende bata bangiriri. Fuo gure ko ki sungu auru gako mbatabakindo, ki rugu yo i moi mbatanakindo tipa na bakindo; ri ki sungu ku kumba beko yo.

²⁰Ri ki ya, “Mi nasana ro tipa pai sa, ni kina toni he; ka mo béngete nga re na ni ya.” Bakindo ki ya fu ri, “Mo sána he tipa ha, nina; bambiko mi abéngeta nga ro na ni te.”

²¹Ri ki ya, “I fú Abisaga nga boro Sunema fu Adoniya nga wiribamo, ri du ni diako.”

²²Bakindo Soromo ki karaga ha fu nako ki ya, “Tipagine mo asana he tipa Abisaga ti ni fu Adoniya? Ka mo sána he tipa ngbi a tipa ko; bambiko ko nga unvuruami, Abiatara nga boromotumo, na Yoaba nga wiri Seruya, i du gayo pai tipa ko a.”

²³Bakindo Soromo ki zunga he ti rimo Yekova, ki ya, “Mbori mángi he fere, na gu ku ri he a, si ngia Adoniya agumba gi pai re kuti kina ungako!

²⁴Were wa du Yekova ni ungako, nga gu ko nanyakasi re, ki moi re auru ga buba mbatabakindo nangia Dawidi, ki zugasi ngbatungare, a wa ko akido he tipa ha, ni rengo i aimo Adoniya ni kina gi uru re.”

²⁵Bakindo Soromo ki kedi pai be Benaya nangia wiri Yoyada; ko ki fo ko ku sande, ko ki kpi.

²⁶Bakindo ki ya fu Abiatara nangia boromotumo, “Mo ndú ku Anatota yo, ku rogo ga ringara; bambiko mo re na kpio. Ono mi aimo nga ro ni gi rago te re, bambiko mo aaka ga Gbia MBORI sanduki ku barangba Dawidi nangia buba, na bambiko i arungosi ro na agu apai i arungosi buba na ni a.”

²⁷Si du Soromo adi Abiatara ti ni ku sa yo ti du ni boromotumo fu Yekova; ko digisi ga Yekova pai nga gu ko agumba ha tipa ngbatunga Eri Siro yo.

²⁸Ho pangbanga agi apai re aye ni koyo du Yoaba ni ― bambiko Yoaba asongodi pa Adoniya, ono ko asongoda nga pa Abisaroma te Yoaba ki oro ku rogo gu bamburoko dungurati yo nga ga Yekova, ki zi agu agbanga naadu ti bamotumo.

²⁹I ki gumba ha fu Bakindo Soromo, ki ya, “Yoaba oro ku rogo gu bamburoko dungurati yo nga ga Yekova, mo ngére, ko du pati bamotumo.” Soromo ki kedi Benaya nangia wiri Yoyada, ki ya, “Mo ndú, ki fo ko ku sande.”

³⁰Benaya ki ndu ku rogo gu bamburoko dungurati yo nga ga Yekova, ki ya fu Yoaba, “Ya bakindo we, ‘Mo kúru.’ ” Ono Yoaba ki ya, “Ai; ono mi akpi kina erẽ.” Benaya ki ye berewe ki gumba pai fu bakindo, ki ya, “Yoaba agumba pai wa gere ko ki karaga pai fere wa gere a.”

³¹Bakindo ki ya fu ko, “Mo mángi he wa ko agumba ha, ki fo ko ku sande, ki kpisidi ko; ka dia gu kure ku sa yo ti re na ti ngbatunga buba, nga gu Yoaba auka ha zanga ndupai.

³²Yekova akáraga kure gako mangapai ku ri ko, bambiko ko ati ku mini akumba ue naadu ni ruru yo ki susi ko, naadu ni wene yo ki susi ko a. Ko ki imi yo ni basape, ka buba nangia Dawidi aina nga ha ya, i nga Abinera nangia wiri Nere, ga aYisaraere barutiri rimbasavura, na Amasa nangia wiri Yetere, ga Yuda barutiri rimbasavura.

³³Si du kureyo akáraga tihe ku ri Yoaba, na ku ri angbatungako nye anye kindi. Ono zereda nikadu be Yekova fu Dawidi, na fu angbatungako, na fu atitako, na fu gako mbatabakindo nye anye kindi.”

³⁴Benaya nangia wiri Yoyada ki ndu ki fo Yoaba ku sande, ki imi ko. I ki kpisidi ko rogo gako bambu ngbakungba yo.

³⁵Bakindo ki moi Benaya nangia wiri Yoyada ku ri rimbasavura ku ba Yoaba, bakindo ki moi Sadoka nangia boromotumo ku ba Abiatara.

³⁶Bakindo ki kedi sunge ki yambu Simi, ki ya fu ko, “Mo dúa bambu Yerusarema no tipa ro, ki sungu no, ka mo gúari nga no ka ndu ku rogo kura rago wa sa ya.

³⁷Bambiko ni gu rago mo ka kura, ki si gu di nga Kidirona, mo ini he ni rengo ya mo akpí akpi. Kurero ki du kina ku ri ro.”

³⁸Simi ki ya fu bakindo, “Ngba gu pai angba gumba mo; a wa gi gbia agumba ha nga bakindo ga moyambu amánga ha kina wo.” Simi ki nye Yerusarema yo tipa dungu arame.

³⁹Ono si adu wa gere ti digida garã biata, ga Simi akanga ue aoro koyo du Akisa ni, nangia wiri Maka nga bakindo Gata. I ki gumba pai fu Simi, ki ya, “Mo ngére, gamo akanga du Gata yo.”

⁴⁰Simi ki guari, ki mbakadi basunga ku auru gako nadongi, ki ndu ku Gata yo koyo du Akisa ni ka gbata gako akanga Simi ki ndu ki yega na gako akanga Gata yo.

⁴¹I ki gumba ha fu Soromo ya Simi guari Yerusarema yo ki ndu ku Gata yo, ki yega berewe.

⁴²Bakindo ki kedi sunge ki yambu Simi, ki ya fu ko, “Ati mi agumba ha foro mo zunga he ti rimo Yekova, mi ki za ro, ki ya, ‘Mo ini he ni rengo, ya ni gu rago mo ka kura yo, ki nita ku bani na ku bani, mo akpí akpi ni rengo’? Mo ki ya fere, ‘Gu pai gumba mo ngba ha angba; mi gi sangbaro.’

⁴³Tipagine mo aka nga kuti ga Yekova zungahe ti ni, na gu rugute mi arugu ro kuti ni ya?”

⁴⁴Bakindo ki ya fu Simi berewe, “Mo ini gu gbigbitaapai dunduko du ngbaduro yo, nga gu mo amangi he kuti Dawidi nangia buba; si du Yekova akaraga ga gbigbitapai ki ri ro.

⁴⁵Ono i afú maku fu Bakindo Soromo, ga Dawidi mbatabakindo adú ni nyakasinyakasi he ku bara bangiri Yekova nye anye kindi.”

⁴⁶Si du bakindo arugu Benaya ti ni nangia wiri Yoyada; ko ki kuru, ki fo ko ku sande, ko ki kpi. Ngbi ki du ni nyakasinyakasi he ku be Soromo.