Read zande 1 Abakindo 21 Bible Online

1 Abakindo 21 - zande bible

1 Abakindo 21

¹Nabota nangia boro Yizerere adu na ati bakakue nga gu naadu Yizerere yo, mbembedi na ga Aba bambu nangia bakindo aSomorono.

²Aba ki gumba pai fu Nabota ki ya, “Mo fú ga ati bakakue fere, si du ni ati kpepasio fere, bambiko si mbembedi na gi bambu. Mi afú ati bakakue foro ngba ki susi he; ka si ngba ti ro, watadu fu mi genoho foro ni marã.”

³Ono Nabota ki ya fu Aba, “Yekova za re ti ni, ya ka mi fu nga gu ukumbo nangia ga abuba foro ya.”

⁴Were Aba ki rimi ku rogo gako bambu na kina gberãrago ti ko na erã bambiko gu pai Nabota agumba ha fu ko nangia boro Yizerere, bambiko ko aya, “Ka mi fú nga gu ukumbo nangia ga abuba foro te.” Aba ki pi auru gako barame, ki sa kpakpuko ku gii ba yo, ka ko ari nga riahe ya.

⁵Izebere nangia diako ki ye koyo du ko ni, ki ya fu ko, “Tipagine du tororo ti ni na rungo, ka mo ari nga riahe ya?”

⁶Ko ki ya fu ri, “Bambiko mi sana Nabota nga boro Yizerere, ki ya fu ko, ‘Mo fú ga ati bakakue fere tipa marã; ka si ngba ti ro, mi ki fu kura ati bakakue foro ku ba ha’; ko ki karaga ha fere ki ya, ‘Mi afú nga gi ati bakakue foro te.’”

⁷Izebere nangia diako ki ya fu ko, “A nga mo zogo gu ngbi nga ga aYisaraere awere te? Mo gúari, ki ri riahe, kpotoro yo ki du pusiapusia. Mi afú gu ati bakakue foro nga ga Nabota boro Yizerere.”

⁸Si du ri ake awaraga ti ni ni rimo Aba, ki dika ha na gako tongo ido, ki kedi agi awaraga re fu abaakumba na airaakporo naraka rogo bakporo sa na Nabota.

⁹Ri ake pai ku waraga yo, ki ya, “Oni táki pande pa gina riahe, ki moi Nabota ni irisiirisi ko dagba aboro.

¹⁰Oni ki moi akumba ue nga awiri gbegberẽ sino aboro bara kpakpuko, i du ni adezire kuti ko, niya, ‘Mo agberẽ ngbaro yo fu Mbori na fu bakindo a.’ Oni ki tindi ko tie ku zegi yo, ki sopo ko ni ambia, ko kpi.”

¹¹Were agu aboro nadu rogo gako bakporo, nangia abaakumba na airaakporo naraka rogo kporo sa na Nabota, i ki mangi he a wa Izebere agumba ha fu yo, kuti sangba agu awaraga ri ake he ki kedi he fu yo.

¹²I ki taki pande pa gina riahe, ki moi Nabota ni irisiirisi ko dagba aboro.

¹³Si du agu akumba ue re ki ye ku dimo yo, nangia awiri gbegberẽ sino aboro, ki sungu bara kpakpu Nabota. Agu awiri gbegberẽ sino aboro re ki du ni adezire kuti ko kuti kina Nabota ku bangiri aboro, ki ya, “Nabota agberẽ ngbako yo fu Mbori na fu bakindo a.” I ki tindi ko bakporo yo ku zegi yo, ki sopo ko ni ambia, ko ki kpi.

¹⁴I ki kedi sunge koyo du Izebere ni, ki ya, “I sopo Nabota ni ambia; ko kpi.”

¹⁵Si adu wa gere, ho Izebere agi he ni ya i sopo Nabota ni ambia ko ima kpi, Izebere ki ya fu Aba, “Mo gúari, ki di gu ati bakakue nga ga Nabota boro Yizerere ni gamo, nga gu ko aka pa baga ha foro tipa marã; bambiko Nabota ni ungako te, ono ko kpi.”

¹⁶Ho Aba agi he ni ya Nabota kpi, Aba ki guari ki ndu ku ati bakakue yo nangia ga Nabota ni boro Yizerere, ka dia ha ni gako.

¹⁷Sangba Yekova ki ye koyo du Eriya ni nangia boro Tesebe, ki ya,

¹⁸“Mo gúari, ki ndu ka ngbisa Aba bakindo aYisaraere, nga gu ko du Somorona yo; mo ngere, ko du rogo gá Nabota ati bakakue, ko ndu koyo ka dia ha ni gako.

¹⁹Mo ki gumba pai fu ko, ki ya, ‘Wo poi Yekova re, “Mo aimi boro, ki di it ni ni gamo?” ’ Mo ki gumba pai fu ko berewe, ki ya, ‘Wo poi Yekova re: “Gu ba aango asiri kure Nabota rogo, kina ho aango ka sira kurero ni, kina boro kurero.” ’ ”

²⁰Aba ki ya fu Eriya, “Ako vurare, mo gbata re ki bi re?” Eriya ki karaga ha ki ya, “Mi gbata ro ki bi ro, bambiko mo afu tiro ka manga gu pai nadu ni gbigbita ha bangiri Yekova.

²¹Mo ngére, mi ayé na gbigbitapai sa ro; mi abá tungaro kpakaya, ki nyasi akumba be ro nga Aba dunduko, gu ni du ni zogozogo ni na gu ni ra ni rini Yisaraere no a.

²²Mi asá ngbatungaro wa ngbatunga Yerobama nangia wiri Nebata, na wa ngbatunga Basa nangia wiri Aiya, bambiko gu wingba nga gu mo amangi re na ni ki gara gi zinga kuti ro, ki mangi aYisaraere i ingi pai.

²³Yekova ki gumba pai tipa Izebere a, ki ya, ‘Aango ari Izebere pati gu ngapa bakporo Yizerere.’

²⁴Gu ni nga ngbatunga Aba nikanikpi bakporo yo, aango nikaniriti ni; gu ni nikanikpi ati yo azire ari nikaniriti ni a.”

²⁵Ono a nga kura boro nadu ho sa wa Aba te, nafu tiko ka manga gu pai nadu ni gbigbita ha bangiri Yekova, nga gu ko diako azingisi ko nangia Izebere.

²⁶Ko ki mangi gbegberẽpai ki susi, ni peka ko kpiaahe, a wa aAmoro anamanga, nga agu yo Yekova adandi yo barangba awiri aYisaraere.

²⁷Si adu wa gere, ho Aba agi agi apai ni re, ko ki siri gako aroko, ki ukadi mbuzaroko ti kpotoko, ki gina riahe, ki dadi tiko ni kina mbuzaroko, ki nindu yee.

²⁸Sangba Yekova ki ye koyo du Eriya ni nangia boro Tesebe, ki ya,

²⁹“Mo nabi he wa Aba naumbasi tiko ku bara bangire? Bambiko wa ko naumbasi tiko ku bara bangire, mi ayé nga na gu gbigbitapai re ti ragoko te; ono ti gu rago nga ga wiriko, mi ayé na gbigbitapai ku ri ngbatungako.”