Read zande 1 Abakindo 22 Bible Online

1 Abakindo 22 - zande bible

1 Abakindo 22

¹Vura adu nga dagba aSurio na aYisaraere tipa garã biata te.

²Ono ti biata garã, Yosafata nangia bakindo aYudo ki ndu koyo du bakindo aYisaraere ni.

³Bakindo aYisaraere ki ya fu avuruko, “Oni aina nga ha ya Ramota-girada nga gaani te? wa ru ani aru zaa, ka ani adia nga ha be bakindo aSurio ya?”

⁴Ko ki ya fu Yosafata, “Ani andú na mo sa vura kuti Ramota-girada?” Yosafata ki ya fu bakindo aYisaraere, “Mi wa kina ro, gimi aboro wa kina gamo aboro, gimi afarasi wa kina gamo afarasi a.”

⁵Yosafata ki ya fu bakindo aYisaraere, “Mi nazungadi ro, mo sána he tipa sangba Yekova mbata areme.”

⁶Si du bakindo aYisaraere adungura anebi ti ni wa aboro 400, ki ya fu yo, “Mi ndú ka so vura kuti Ramota-girada, watadu mi nyé?” I ki ya, “Mo ndú; bambiko Yekova nikafu he ku be bakindo.”

⁷Ono Yosafata ki ya, “A nga kura ga Yekova nebi ho, ka ani sana ko ti ni te?”

⁸Bakindo aYisaraere ki ya fu Yosafata, “Boro koyo sa ka ani sana Yekova ku ngbani, nga Mikaya wiri Yimera; ono mi nasoga ko, bambiko ko nagumba nga wenepai tipa re te, kina gbigbitapai.” Yosafata ki ya, “Ka bakindo gúmba nga ha wo ya.”

⁹Bakindo aYisaraere ki yambu vuruko sa, ki ya, “Mo yé na Mikaya ni ipo nga wiri Yimera.”

¹⁰Were bakindo aYisaraere asungu auru gako mbatabakindo, Yosafata nangia bakindo aYudo ki sungu auru gako mbatabakindo, ni ukadiukadi tiyo na gayo aroko, rogo gu bataka zende ahe naadu ti ngbadimo bakporo Somorona. Anebi dunduko ki nigumba pai ku bara bangiriyo.

¹¹Sedekiya nangia wiri Kenana ki mbakadi agbanga ni marã tipa tiko, ki ya, “Wo poi Yekova re, ‘Mo atúra aSurio na agi ahe re, daho mo ka ba tungayo ni kpakaya,’ ”

¹²Anebi dunduko ki gumba pai kina wo, ki ya, “Mo ndú ku Ramota-girada yo, ki u; bambiko Yekova afú he ku be bakindo.”

¹³Gu sunge nandu ka yamba Mikaya ki gumba pai fu ko, ki ya, “Mo ngére, agu apai anebi apeka si kusi wenepai fu bakindo wa pai ku ngba boro sa. Mi nazungadi ro, sangbaro dú wa kina sangba gu ni sa dagba yo, mo gúmba kina wenepai a.”

¹⁴Ono Mikaya ki ya, “Wa du Yekova ni ungako, gu pai Yekova nikagumba fere, kina ha mi ka gumba.”

¹⁵Ho ko ada ni koyo du bakindo ni, bakindo ki ya fu ko, “Mikaya, ani ndú ku Ramota-girada yo ka so vura, watadu ani nyé?” Ko ki karaga ha fu ko, ki ya, “Mo ndú, ki u; Yekova afú he ku be bakindo.”

¹⁶Bakindo ki ya fu ko, “Mi tigimi, mi arúga ro bara waĩ, mo gúmba kina rengo fere ni rimo Yekova?”

¹⁷Mikaya ki ya, “Mi abi aYisaraere ni gbandakagbandaka yo dunduko ri abaagangara, a wa agu akandoro adu nga babandara ti ra ya. Yekova ki ya, ‘Agi yo re adu nga na bairayo ti ni ya, i gá ku kpuyo yo dunduko ngba zereda.’ ”

¹⁸Bakindo aYisaraere ki ya fu Yosafata, “Mi nagumba nga ha foro te, ya ko agumba nga wenepai tipa re te, kina gbigbitapai?”

¹⁹Mikaya ki ya, “Ono mo gi sangba Yekova tie: mi abi Yekova ko nisungu auru gako mbatabakindo, gu rimbasa dunduko nga ga ngbangbaturũ yo ki ru ku kumbabeko na ku garebeko yo;

²⁰Yekova ki ya, ‘Da nikananga Aba, ko ndu ku Ramota-girada yo ka kpi yo?’ Gu ni ki gumba ha were, gu kura ni ki gumba pai were.

²¹Toro ki ye ki ru bara bangiri Yekova, ki ya, ‘Mi tigimi nikananga ko.’

²²Yekova ki ya fu ko, ‘Ni gini pai?’ Ko ki ya, ‘Mi andú ki du wa irazire toro ku ngba gako anebi yo dunduko.’ Yekova ki ya, ‘Mo anánga ko, si ki di be ko; mo ndú, ki mangi he kina wo.’

²³Mo ngére, si du Yekova moi irazire toro ku ngba gi gamo anebi re yo dunduko; Yekova gumba pa gbigbitapai tipa ro.”

²⁴Sedekiya nangia wiri Kenana ki mbedi, ki nari pangba Mikaya, ki ya, “Ga Yekova Toro aguari ti re waĩ ka gumba pai foro?”

²⁵Mikaya ki ya, “Mo ngére, mo abi he ni gu rago mo ka ndu ku vuru bambu yo ka oka tiro.”

²⁶Bakindo aYisaraere ki ya, “Oni zi Mikaya, ki ndu na ko berewe koyo du Amona ni nga bazogo bakporo, na koyo du Yoasa ni nga wiri bakindo;

²⁷ki ya, ‘Ya bakindo wẽ, “Oni moi gi boro re ku bambukisa yo, ki nirigi ko na gu riahe nga ga rungosi na gu ime nga ga rungosi, daho mi ka yega ni zezeredi.” ’ ”

²⁸Mikaya ki ya, “Ka mo yega zezeredi, si ngia Yekova agumba nga pai ku ngbare te.” Ko ki ya. “Aboro, oni gi he wa du oni dunduko!”

²⁹Si du bakindo aYisaraere andu ti ni na Yosafata nangia bakindo aYudo kuti Ramota-girada.

³⁰Bakindo aYisaraere ki ya fu Yosafata, “Mi abirika tire ki ndu sa vura, ono mo úkadi tiro na gamo aroko bakindo.” Bakindo aYisaraere ki biriki tiko, ki ndu sa vura.

³¹Were bakindo aSurio arugu gako abarutiri angbagidavura nadu 32, ki ya, “Ka oni só nga vura na umba boro watadu bakere boro a ya, kpara kina bakindo aYisaraere sa.”

³²Si adu wa gere ho abarutiri angbagidavura abi Yosafata ni, i ki ya, “Ndikidi bakindo aYisaraere du re rengo.” I ki sa tiyo fuo ko ka so vura kuti ko; Yosafata ki poi ku ari.

³³Si ki ta du wa gere, ho abarutiri angbagidavura aini he ni ya bakindo aYisaraere nga ko te, i ki karaga tiyo ngba fuo ko.

³⁴Ono gu boro ki gbe gani mboto ki ba ha ni baringbangba gbua, ki no bakindo aYisaraere dagba ngbazunga uvura na marãngbaduse Si du bakindo aya ti ni fu barugu gako ngbagidavura, “Mo sá tiro, ki tindi re ku sa yo dagba rimbasa, bambiko mi ho aho ni kere he.”

³⁵Vura ki moi pai ni gu uru re, i ki songodi bakindo ku rogo gako ngbagidavura ko nibi aSurio, nyemu ko ki kpi; kureko ki ga bangiri oro yo ku mburu ngbagidavura yo.

³⁶Tatangba ki nindu dagba rimbasa yo ho uru ati ni, niya, “Aboro gá dunduko, gu ni kina ku rogo gani bakporo, gu ni kina ku rogo gani ringara!”

³⁷Si du bakindo ki kpi, i ki ndu na ko ku Somorona yo. I ki kpisidi ko Somorona yo.

³⁸I ki zundu ngbagida pati munga Somorona yo, aango ki nisiri kureko, anatakurari anazunda tiyo kina rogo; ku sangba gu pai yo Yekova agumba.

³⁹Were kura ga Aba apai, na agu apai dunduko ko amangi, na pa gu bambu ko adua ha na rindi ambarã, na pa agu abaakporo ko adudua, ati si ni keke he rogo gu Kitabu Peka pa agu apai Abakindo aYisaraere anamanga?

⁴⁰Si du Aba ki kpi fuo atitako; Azaya ki zogo rago ku ba ko nangia wiriko.

⁴¹Yosafata nangia wiri Asa atona zoga aYudo ti gu biama garã zogarago nangia ga Aba bakindo aYisaraere.

⁴²Garã Yosafata adu 35 ho ko atona zoga rago ni, ko ki zogo rago Yerusarema yo garã ki du 25. Rimo nako nangia Azuba nangia wiri Siri.

⁴³Ko apeka kina sino bako dunduko nangia Asa; ko aguari nga ti ni te, ki nimangi gu pai naru aru bangiri Yekova. Ono i aroga nga tumbatumba arago ku sa yo te, aboro atumo ni amotumo ki nizo fuõngua ti ri tumbatumba arago kindi.

⁴⁴Yosafata ki moi zereda dagba ko na bakindo aYisaraere.

⁴⁵Were kura ga Yosafata apai, na pa gu tandu ko ayugu he, na wa ko aso vura, ati si ni keke he rogo gu Kitabu Peka pa agu apai Abakindo aYudo anamanga?

⁴⁶Gu yangara airabari akumba, nga agu yo nanye ti rago bako nangia Asa, ko akusi yo rogo ringara.

⁴⁷Bakindo adu nga ho Edome yo te; i amoi boro ni bazogo ku ba bakindo.

⁴⁸Yosafata akedi agu abaakurungba nangia ga Tarusisa ku Ofira yo tipa dahabu. Ono si ada nga yo te, bambiko abaakurungba agberẽ Eziona-gebere yo.

⁴⁹Azaya nangia wiri Aba ki ya fu Yosafata, “Mo idi he fu avurure i ndu na avururo rogo abaakurungba.” Ono Yosafata aida nga ha fu ko te.

⁵⁰Yosafata ki kpi fuo atitako, i ki kpisidi ko rogo gu bakporo nga ga Dawidi nangia titako; Yorama ki zogo rago ku ba ko nangia wiriko.

⁵¹Azaya ki tona zoga aYisaraere Somorona yo nangia wiri Aba ti gu 17 garã zogarago nangia ga Yosafata bakindo aYudo, ko ki zogo aYisaraere garã ki du ue.

⁵²Ko ki nimangi gu pai nadu ni gbigbita ha bangiri Yekova, ki nipeke kina sino bako, na sino nako, na sino Yerobama nangia wiri Nebata, nga gu ko anaingisa aYisaraere i niingi pai.

⁵³Ko ki nimangi pa Bara ki niirisi he, ki nigara ga Yekova zinga kuti ko nga ga aYisaraere Mbori, a wa bako anamanga mbata.