Read zande 1 Abakindo 3 Bible Online

1 Abakindo 3 - zande bible

1 Abakindo 3

¹Soromo ki kpamia tiko kuti Faro nangia bakindo aEzipeto; ki di wiri Faro ni diako, ki yega na ri ku rogo ga Dawidi bakporo, ki da ho ko anyasi dua gako bambu ni, na ga Yekova bambu a, na ngapa pati Yerusarema kirikiri.

²Ono aboro anatumo kina ri tumbatumba arago, bambiko i ata dua nga bambu tipa rimo Yekova ti agu arago te re.

³Soromo akpi nyemu Yekova gbe nipeke ga bako rugaapai nangia Dawidi. Ono ko anatumo ri tumbatumba arago ki nizo fuõngua a.

⁴Bakindo ki ndu ka fu motumo Gibona yo; bambiko yo gu tumbatumba rago adu ni ni bakumba aba. Soromo ki nitumo yo ni zozo amotumo wa 1,000 auru gu bamotumo re.

⁵Yekova ayugu tiko yuru rogo musumo fu Soromo Gibobona yo. Mbori ki ya, “Mo sána he tipa gu he mi ka fu foro.”

⁶Soromo ki ya, “Mo ayugu bakere weneringise fu buba nangia Dawidi ga moyambu, a wa ko anata rogo rengo, na rurupai ku bara bangiro, na ruru kpotoko yo foro; mo ki nika kuti gi bakere weneringise re bambiko ko, ki fu wiriko ko sungu auru gako mbatabakindo, a wa du he areme.

⁷Ako Yekova gi Mbori, awere kina mo namoi ga moyambu ni bakindo ku ba Dawidi nangia buba, zavura wa du mi ni toni gude mi aina nga waĩ ka mi kuru sa pai ki niyega a te.

⁸Ga moyambu du dagba gamo aboro nga agu yo mo asia yo, nga ngenge aboro, ka i arengba nga na ringbisa yo ki gedi yo a ya tipa nge yo.

⁹Si du ka mo fu rugatinapai ti ni ku kpoto ga moyambu yo ko nisápu ngbanga dagba gamo aboro, mi niíni kpara rurupai ti gbegberẽpai; bambiko da rengbe na sapa ngbanga dagba gi gamo aboro du ni badungu yo re?”

¹⁰Gi gumba pai re ki ngba ti Gbia, wa Soromo nisana he tipa gere.

¹¹Mbori ki ya fu ko, “Bambiko wa mo nisana he tipa gi pai re, ka mo asana nga he tipa ungaro si du ni gbanga ha ya; mo asana nga he tipa ũkumuko tipa ro a te, ka mo asana nga he tipa unga avuraro a ya; ono mo nisana he tipa kina rugatinapai ka asapa ngbanga ru ruru he;

¹²mo ngére, mi mangi he wa gumba mo ho. Were, mi fu tatamana ku kpotoro yo na rugatinapai; boro adu nga wa mo mbata te, boro adú nga fuo ro wa mo a te.

¹³Mi fu gu he foro nga gu mo nasana nga he tipa ha a ya, nga kumuko na irisa a, wa du mo ni ungaro, boro adú nga dagba abakindo yo nikarengba na mo te.

¹⁴Ka mo apéka gimi asino, ki nika kuti gimi rugaapai na gimi arugute, a wa bamo anapeka ha nangia Dawidi, mi agízasi ramero tie.”

¹⁵Soromo ki zingi be rame, atikawari, musumo nidu. Ko ki ndu ku Yerusarema yo, ki ru barangba ga Yekova sanduki mokido ki tumo ni zozo amotumo na amotumo zereda, ki mbakadi pumbo fu avuruko dunduko.

¹⁶Ade ki ye ue, ni anatakuari, koyo du bakindo ni, ki ru bara bangiriko.

¹⁷Gu de sa ki ya, “Ako gi gbia, ani naaraka rogo bambu sa na gi de re; mi ki batika gude ri ki du kina dimo yo.

¹⁸Si adu wa gere, rame biata fuo batika mi, gi de re ki batika a; ani ki du sa na ri. Kura boro adu nga fuo rani dimo yo te, kina rani naadu dimo yo ue na ri.

¹⁹Wiri gi de re ki kpi yuru bambiko ri api auru ru.

²⁰Ri ki zingi bebere yuru, ki di wire pati re, ho mi adu ni na rame nga ga moyambu, ki pigi ru kuti ngbaduri, ki pigi kangba wiriri kuti ngbadure.

²¹Ho mi azingi ni wiso ka aga wire, mo ngére, u naima kpi. Ono ho mi akparia ru ni wiso, mo ngére, ka u adu nga ni wire, nga gu ru mi abatika ru ya.”

²²Gu kura de ki ya, “Ai, gu gude du ni ungaru, u nga wire, ono gu ru kpi, u nga wiro.” Gu ri ki ya, “Oó; gu ru kpi nga wiro, gu ru du ni ungaru nga wire.” Wo i agumba pai bara bangiri bakindo.

²³Bakindo ki ya, “Gu ri sa niya, ‘Wire du ni ungaru, wiro gu nikpi’; gu ri ki ya, ‘Oó; wiro gu nikpi, wire du ni ungaru.’”

²⁴Bakindo ki ya, “Oni yé na basape fere.” I ki ye na basarie fu bakindo.

²⁵Bakindo ki ya, “Oni kpáraka rogo gu gude du ni ungaru ue, ki fu gu ngbagurugu gu ru fu gu ri sa, ki fu gu a sa fu gu ri.”

²⁶Gu de nangia ndikidi na gu gude naadu ni ungaru ki gumba pai fu bakindo, bambiko nunga wiriri amangi ri gbe, ri ki ya, “Ako gi gbia, mo fú gu gude du ni ungaru fu ri, ka mo imi nga ru ya.” Ono gu kura ri ki ya, “I kpáraka rogo ru; ani ki zanga ru na mo.”

²⁷Bakindo ki karaga ha ki ya, “I fú gu gude du ni ungaru fu gu de niza he ka i ími nga ru ya; bambiko ri nga ndikidi nagude ni rengo.”

²⁸AYisaraere dunduko agi pa gu sapangbanga bakindo asapu he; i ki nigunde ti bakindo bambiko i abi he ya ga Mbori tatamana du kpotoko yo, ka asapa ngbanga ni ruru he.