Read zande 1 Abakindo 6 Bible Online

1 Abakindo 6 - zande bible

1 Abakindo 6

¹Si adu wa gere, fuo kura awiri aYisaraere ringara Ezipeta yo earã asaki yo wa 480, Soromo ki tona ka dua ga Yekova bambu, rogo biama garã zoga ko rago ku ri aYisaraere, rogo gu diwi nga Ziu, nga ue diwi

²Gu bambu Bakindo Soromo adua ha tipa Yekova bagizaha adu wa bagiza mbiribe 60, patihe ki du wa bagiza mbiribe 20, basonaha ki du wa bagiza mbiribe 30.

³Gu mbaraza naadu barangba gu ziazia ba nga ga bambu, bagizaha adu wa bagiza mbiribe 20, a wa i aringbisi he kuti bakia pati bambu; patihe adu wa bagiza mbiribe bawe barangba bambu.

⁴Ko ambakadi bangiri bambu na ngua ni haha bangirihe.

⁵Kuti vuro bambu kirikiri ko adua he ku ari ni kparakakparaka he kuti vuro bambu rogo gu nga ga yekaru na rogo gu kparakpara ziazia ba susi a. Ko ki mbakadi adimo pati he kirikiri.

⁶Gu vuruhe naadu ku sende patihe adu wa bagiza mbiribe bisue, gu vuruhe naadu ku ri he ni ue ne, patihe adu wa bagiza mbiribe saba. Ko adua asongoro ti pavuru bambu kirikiri zegi yo, ka angbongbo azada nga pavuru bambu ya.

⁷Ho i adua gi bambu ni re, i adua ha na agu ambia i ambakadi he kina bagetaka ha yo; si du i agia nga woro bande na mangua na kura marã sunge ti ni wa i adua ha ya.

⁸Ngbadimo gu vuru bambu naadu ni bambata ha, si adu ti gu pavuru bambu naadu ku kumbabe; i ki nidakpa ti kengerakengera babita ki rimi ku rogo gu vuruhe naadu ni ue he, i ki kuru rogo ue he ki ndu ku rogo gu vuruhe yo naadu ku ri he ni biata ha.

⁹Ko ki dua gi bambu re, ki nyasi he; ki kisi rihe yo na ngbongbo na kpakparikpa angua kedara.

¹⁰Ko ki dua agu avuru bambu gu naadu ku ri kura ha ti bambu dunduko, basona avuruhe ni ba sa sa ki du wa bagiza mbiribe bisue; si Ki sungu kuti bambu na ngua kedara.

¹¹Sangba Yekova ki ye koyo du Soromo ni, ki ya,

¹²“Tipa gu bambu mo adua ha, ka mo apéka fuo gimi rugaapai, ki nisari gimi ruru angbanga, ki nika kuti gimi arugute dunduko, ki nita rogo ho; mi anyákasa gi pai na mo, nga gu mi agumba pa ha fu bamo nangia Dawidi.

¹³Mi ki nye dagba awiri aYisaraere, ka mi ambú nga gimi aboro aYisaraere ya.”

¹⁴Si du Soromo adua bambu ti ni ki nyasi he.

¹⁵Ko adadi vuro bambu vuru he yo na angua kedara; tona ti vuru bambu yo kusende na pavuruhe na ri he a, ko adadi he na ngua. Ko ki dadi vuru bambu yo sande na gu ngua nga kupuresa.

¹⁶Ko ki mbakadi vuru bambu ku gii bambu yo wa bagiza mbiribe 20, ki nyasi he na agu angua nga kedara, tona ku sende ka ndu ku ari a; ko adua ha vuruhe yo tipa ziazia ba, nangia kina gu kparakpara ziazia ba naadu ni ziazia ha susi.

¹⁷Gu bambu nangia gu yekaru naadu barangba ziazia ba, bagizaha adu wa bagiza mbiribe 40.

¹⁸Gu ngua kedara du ti vuro bambu i aseke he ni kpiahe wa inga na kpia zarazara mbumbuda; kina ngua kedara ki du dunduko; ka i abi nga mbia ya.

¹⁹Ko ki mbakadi ziazia ba bebere gu vuru bambu yo re ka maa ga Yekova sanduki mokido ku rogo ho.

²⁰Bakia ziazia ba adu wa bagiza mbiribe 20, patihe ki du wa bagiza mbiribe 20, basonaha ki du wa bagiza mbiribe 20 a; ko ki dadi he ni ndikidi dahabu. Ko ki dadi bamotumo na ngua kedara.

²¹Si du Soromo adadi vuro bambu ti ni ni ndikidi dahabu. Ko ki moi azogbo ni dahabu barangba ziazia ba, ko ki dadi he ni dahabu.

²²Ko ki dadi vuro bambu dunduko ni kina dahabu, si du bambu ki nyasi dunduko. Gu bamotumo naadu rogo ziazia ba, ko ki dadi he ni kina dahabu dunduko a.

²³Ko ki mbakadi kpia akeruba ue rogo ngua nzeme tipa ziazia ba, basonaha wa du he ue ki du wa bagiza mbiribe bawe.

²⁴Bagiza pupo keruba sa adu wa bagiza mbiribe bisue, bagiza gu kura pupoho ki du wa bagiza mbiribe bisue a; tona ti mburu pupoho sa dati digida gu ue he adu wa bagiza mbiribe bawe.

²⁵Bagiza kura keruba ki du wa bagiza mbiribe bawe. Bagiza akeruba ue adu wa sa, kpiaha ki du wa sa a.

²⁶Basona gu keruba ki du wa bagiza mbiribe bawe, kura keruba ki du wa kina ha a.

²⁷Ko ki moi akeruba ku rogo gu pa vuru Dambu yo du ku mbata yo; pupo akeruba ki du ni zarazara ha, si du pupo keruba sa ada ti vuro bambu sa, pupo kura keruba ki da ti vuro bambu ku bani; apupoho ki gbia tihe bebere bambu yo.

²⁸Ko ki dadi agi akeruba re ni dahabu a.

²⁹Ko ki seke vuro bambu kirikiri dunduko ni kpia sekeseke ahe wa akeruba na asikisa na zarazara mbumbuda, ti gu vuruhe du dimo yo na gu vuruhe du ku zegi yo a.

³⁰Ko ki dadi vuru bambu sande ni dahabu a, na gu vuruhe du dimoyo na gu vuruhe du ku zegi yo a.

³¹Ko ki mbakadi akpuguru ni ngua nzeme tipa ngbadimo ziazia ba. Gu ngua naadu ni wagiwagi he ri ngbadimo na agu angua naadu pa ngbadimo si adi ba wa sa dagba bisue he ti pavuru bambu.

³²Ko ambakadi akpuguru ue na ngua nzeme, ki seke kpiaahe ti ni wa akeruba na asikisa na zarazara mbumbuda, ki dadi he ni dahabu; ko ki dadi akeruba ni dahabu na asikisa a.

³³Ko ki mbakadi angua pangbadimo ni ngua nzeme tipa ngbadimo yekaru a, bakia baha ki di sa dagba biama ha ti pavuru bambu,

³⁴na akpuguru ue ni ngua akupuresa; ngbadimo sa ki du ni zunguzungu he ue, ho i aura ha ni si ki nimina tihe kuti kura ha, kura ngbadimo adu kina wo a.

³⁵Ko ki seke kpiaahe ti ni wa akeruba na asikisa na zarazara mbumbuda, ko ki dadi he ni dahabu ni kpasakpasa ha si ki zi tihe kuti sekeseke he.

³⁶Ko ki mbakadi ndugu gu vurukporo naadu ku vuru he yo na sekeseke ambia genehe ki du biata, na genehe sa ni ngbongbo ni ngua kedara.

³⁷Ti biama garã ko atona mburu ga Yekova bambu, ti gu diwi nangia Ziu.

³⁸Rogo 11 garã, ti gu diwi nga Buru, nga muambi diwi, pa dua bambu ki nyasi dunduko, a wa i aringbisi pa ha. Ko ki du pati sunge duaha tipa garã saba.