Read zande 1 Abakindo 8 Bible Online

1 Abakindo 8 - zande bible

1 Abakindo 8

¹Soromo ki dungura ga aYisaraere abaakumba dunduko, na abarukuri angbatunga aboro, na abazogo angbatunga awiri aYisaraere, ku Yerusarema yo, koyo du Bakindo Soromo ni, ya i ye na ga Yekova sanduki mokido rogo gu bakporo nga ga Dawidi du Siona yo.

²Akumba aYisaraere dunduko ki dungura tiyo koyo du Bakindo Soromo ni ti rago pumbo ni gu diwi nga Etana, nga saba diwi.

³Ga aYisaraere abaakumba ki ye dunduko, aboromotumo ki tumba ga Yekova sanduki.

⁴I ki ye na ga Yekova sanduki, na bamburoko dungurati na gu ziazia aubambu naadu bamburoko yo; kina ha aboromotumo na aRevi aye na ni.

⁵Bakindo Soromo na gbuu aYisaraere dunduko, nga agu yo nadungura tiyo koyo du ko ni, i adu na ko barangba sanduki, ki nitumo ni akandoro na abaabagara, ka i arengba nga na geda ra tipa pa nge ra ya.

⁶Aboromotumo ki ye na ga Yekova sanduki mokido ki moi he ku rogo baha vuru bambu yo, rogo kparakpara ziazia ba susi, tii pupo akeruba yo.

⁷Bambiko akeruba azara apupoho ku ri gu ba sanduki adu ni, si du akeruba ki dadi sanduki na agu angbongbo naadu ti ni.

⁸Wo pa giza angbongbo adu, i abi digida ha kina ziazia ba yo barangba gu kparakpara ziazia ba; ono i abi nga ha zegi yo te; si kina yo daku areme.

⁹Sanduki adu nga na he rogo ho te, kina agu ambia ue Mose amoi he ku rogo ho Orebe yo, ho Yekova aru ndika ni dagba ko na awiri aYisaraere, ho i akuru ni ringara Ezipeta yo.

¹⁰Si adu wa gere, ho aboromotumo akuru ni ku zegi yo rogo kparakpara ziazia ba yo, dubo ki hisi ga Yekova bambu,

¹¹ka si adu nga wa ka aboromotumo ru ka manga sunge be dubo ya; bambiko gu taarimo nga ga Yekova ahisi ga Yekova bambu.

¹²Soromo ki ya, “Yekova aya ko araka rogo tikatika bitimo.

¹³Mi adua bambu banye tipa ro ni rengo, nga gu ba mo ka nye rogo ho kindi.”

¹⁴Bakindo ki aria kpakpuko ki fu maku fu gbuu aYisaraere, gbuu aYisaraere dunduko ki ru ku ari.

¹⁵Ko ki ya, “I sámbua Yekova, ga aYisaraere Mbori, nga gu ko naagumba pai ni ngbako fu buba nangia Dawidi, ko ki digisi he ni beko, niya,

¹⁶‘Fuo kusa mi gimi aboro aYisaraere Ezipeta yo, mi asia nga bakporo dagba angbatunga Yisaraere yo dunduko ka dua bambu rogo, ya rimore du ti ni dati gi rago re te, ono mi asia Dawidi ko zogo gimi aboro aYisaraere.’

¹⁷Were si adu kpoto Dawidi yo nangia buba ka dua bambu tipa rimo Yekova, ga aYisaraere Mbori.

¹⁸Ono Yekova aya fu buba nangia Dawidi, ‘Wa du he nga si adu kpotoro yo ka dua bambu tipa rimore, mo amangi he wenengaĩ wa si adu kpotoro yo;

¹⁹ono boro mo adúa nga gu bambu te re; ono gu wiro mo ka vunga ko, ko nikadua bambu tipa rimore.’

²⁰Si du Yekova adigisi gu gako pai ko agumba; bambiko mi du awere ku ba buba nangia Dawidi, ki nisungu auru ga aYisaraere mbatabakindo, a wa Yekova akido pa ha, ki dua bambu tipa rimo Yekova, nga ga aYisaraere Mbori.

²¹Mi ki moi ba rogo ho tipa sanduki, nga gu du ga Yekova mokido rogo no, nga gu ko akido he fu abarani, ho ko akusi yo ni ringara Ezipeta yo.”

²²Soromo ki ru barangba ga Yekova bamotumo ku bangiri gbuu aYisaraere dunduko, ki tumba abeko ni zarazara ha ku ngbangbaturũ yo.

²³Ko ki ya, “Ako Yekova, ga aYisaraere Mbori, a nga Mbori ho du wa mo te, ari yo, watadu auru kpotosende no du tii ngbangbaturũ a te; nga gu ko ninaka kuti gako zungahe fu gako amoyambu na inapai, nga agu yo ninata ku bara bangiro na kpotoyo yo dunduko.

²⁴Mo naka kuti gu pai mo akido pa ha fu ga moyambu nangia buba nangia Dawidi. Ii, mo agumba pai ni ngbaro, ki digisi he ni bero a, wa du he areme re.

²⁵Ako Yekova, ga aYisaraere Mbori, awere tie, mo ká kuti gu pai mo akido pa ha fu ga moyambu nangia buba, nangia Dawidi, niya, ‘Mo azánga nga boro ku bangire nikasunga auru ga aYisaraere mbatabakindo te; ka awiro akparia pa gayo apai, ka ata bara bangire wa mo anata bara bangire a.’

²⁶Ako ga aYisaraere Mbori, awere tie, ga pai dú ni digisidigisi he, nga gu mo agumba pa ha fu ga moyambu nangia buba nangia Dawidi.

²⁷“Mbori aráka auru kpotosende no ni rengo? oni ngére, ngbangbaturũ na gu ngbangbaturũ du ku ari yo gbe si arengba nga na mo te; waĩ tie ka gi bambu rengbe na mo dua mi he re!

²⁸Ako Yekova gi Mbori, ono mo irisi gu kpetambuahe nga ga gamo moyambu, na gako kpesarawati, ki gi fugore na gi kpetambuahe nga gu ga moyambu akpara foro bara bangiro ni gi uru re;

²⁹bangiro dú ti gi bambu re yuru na uru, nga gu ba mo aya ti ni, ‘Rimore adú ti ni,’ ki gi gu kpetambuahe ga moyambu ka akpara ningere kono du gi ba ni re.

³⁰Mo nigi gu kpesarawati nga ga ga moyambu, na ga gamo aboro aYisaraere, ho i ka akpara ni ningere kono du gi ba ni re; ii, mo nigi he ngbangbaturũ yo nga ga banye; ho mo ka nigi he ni, mo ki vu yo.

³¹“Ka boro ingi pai kuti kurani, i ki sosodi ni, ni zungahe, ni ki ye ka zunga he barangba ga bamotumo, rogo gi bambu re;

³²mo gí he ngbangbaturũ yo, ki mangi pai, ki sapu ngbanga dagba gamo amoyambu, ki kiti ngbanga gbegberẽ boro, ki sa gani apai kina ku ri ni; ki di pai ri ruru boro, ki fu he fu ni rengbe na gani rurupai.

³³“Ho avura gamo aboro aYisaraere ka adia be yo ni, bambiko i aingi pai kuti ro; ka i sa tiyo berewe koyo du mo ni, ki kusi rimoro, ki kpari ki nizungadi ro rogo gi bambu re;

³⁴mo gí he ngbangbaturũ yo, ki vu gamo aboro aYisaraere ti gayo ingapai, ki ye na yo berewe ku rogo gu ringara mo afu he fu atitayo.

³⁵“Ho ngbangbaturũ ka du ni ni kisikisi he, ka mai ana nga ya, bambiko i aingi pai kuti ro; ka i kpari ki ningere kono du gi ba ni re, ki kusi rimoro, ki sa tiyo ti gayo ingapai, ho mo ka ambusa yo ni;

³⁶mo gí he ngbangbaturũ yo, ki vu gamo amoyambu ti gayo ingapai, nga gamo aboro aYisaraere, no mo ka ayugo wenepai ni fu yo nga gu ka i apeka fuo ho; mo ki nikedi mai ku auru ga ringara, nga gu mo afu ni ũkumuko fu gamo aboro.

³⁷“Ka gberãngbi ati ku rogo ringara, ka tata kaza gberãngbi adu ho watadu auati ngbiimi, si ngia kuko, ka ayere ye watadu asangba; ka avura aYisaraere aru nguru kuti abaakporo rogo gayo ringara; si ngia gini gberãngo ka du ho, si ngia gini kaza;

³⁸gu kpetambuahe na gu kpesarawati gu boro ka kpara, watadu gamo aboro aYisaraere dunduko, nga agu yo ka ini pa gayo gberãngbi ni ba sa sa du kpotoyo yo, i ki zara beyo kono du gi bambu re ni;

³⁹mo gí he ngbangbaturũ yo nga ga banye, ki vu yo, ki mangi pai ki nifu he fu aboro dunduko rengbe na gayo apai, nga agu yo ini mo pa kpotoyo yo, bambiko mo, kina ro, ini gu pai dũ kpoto wiri aboro yo dunduko;

⁴⁰ya i gúnde ti ro wa du yo ni ungayo rogo gu ringara mo afu he fu atitarani.

⁴¹“Na tipa gu kungba boro a, nga gu ni angia nga ga gamo aboro aYisaraere ni ya, ho ni ka niye ni gii ngbi yo tipa wo rimoro;

⁴²bambiko aboro agia pa kia pa rimoro, na pa nyanyaki bero, na taĩtaĩbero, ho gu ni ka niye ni ka akpara ningere kono du gi bambu re ni;

⁴³mo gí he ngbangbaturũ yo nga ga banye, ki mangi he dunduko wa ka gu kungba boro zúngadi ro tipa ha; ya angbatunga aboro dunduko du auru kpotosende i ini pa rimoro, ka agunde ti ro, a wa gamo aboro aYisaraere agunde ti ro, i ki ini ya gi bambu re dua mi he, i yambu he ti rimoro.

⁴⁴“Ka gamo aboro kuru ka ndu sa vura kuti avurayo, ngba gini gene mo ka keda yo ni, i ki nikpari fu Yekova, kono du gi bakporo re ni mo asia ha, kono du gi bambu re ni mi adua ha tipa rimoro;

⁴⁵mo gí gayo kpetambuahe na gayo kpesarawati ngbangbaturũ yo ki mbakadi gayo apai.

⁴⁶“Ka i ingi pai kuti ro bambiko a nga boro ho sa zanga manga ingapai te mo ki zingi kuti yo, ki fu yo ku be avurayo i ki ga na yo ni zizi yo ku rogo ga avurayo ringara, ka ngia tuturu watadu mbembedi;

⁴⁷ono ka i baki bangiriyo kpotoyo yo rogo gu ringara zi yo yo ku rogo, i ki ya, ‘Ani ingi pai, ki mangi pai ni waka, ni gbegberẽ he;’

⁴⁸ka i sa gayo berã koyo du mo ni berewe, na kpotoyo yo dunduko na mbisimoyo dunduko, wa du yo rogo ga avurayo ringara, nga agu yo naga na yo ni zizi yo, i ki kpari foro kono du gayo ringara ni, nga gu mo afu he fu atitayo, na kono du gi bakporo re ni mo asia ha, na gi bambu re dua mi he tipa rimoro;

⁴⁹mo gí gayo kpetambuahe na gayo kpesarawati ngbangbaturũ yo nga ga banye, ki mbakadi gayo apai;

⁵⁰ki vu gamo aboro namangi ingapai kuti ro, na tipa pa gayo samungu dunduko nga gu i asa ha kuti ro; mo ki yugu inapai fu yo ku bangiri agu yo naga na yo ni zizi yo, ya i yugu inapai fu yo,

⁵¹bambiko i nga gamo aboro, nga ndikidi gamo yo, nga agu yo mo akusi yo Ezipeta yo, rogo gbigiwi we marã yo.

⁵²Bangiro dú ti gu kpesarawati nga ga ga moyambu, na gu kpesarawati nga ga gamo aboro aYisaraere, ka gia fugoyo ho i ka akpara ni foro.

⁵³Bambiko mo akpara yo dagba angbatunga aboro zegino dunduko, i du ni ndikidi gamo yo, a wa mo agumba ha ku ngba Mose nangia ga moyambu, ho mo akusi atitarani ni Ezipeta yo, Ako Gbia MBORI.”

⁵⁴Si ki ta du wa gere, ho Soromo anyasi gi kpetambuahe re ni dunduko na kpesarawati fu Yekova, ko ki mo ku ari barangba ga Yekova bamotumo, ho ko akuku ni ngba rukusuko na beko ni taĩtaĩ he ku ngbangbaturũ yo.

⁵⁵Ko ki ru, ki poi ku ari ki fu maku fu gbuu aYisaraere, niya,

⁵⁶“Sambuahe dú fu Yekova, nga gu ko nafu ongoda fu gako aboro aYisaraere, a wa ko akido pa ha fu yo dunduko; a nga pai sa kpa ti gako wene akidohe dunduko wa sa te, nga gu ko akido pa ha ku ngba Mose nangia gako moyambu.

⁵⁷Yekova gaani Mbori dú na ani, a wa ko adu na atitarani; ka ko mbú nga rani ki guari pati rani a ya;

⁵⁸ko sa ngbadurani yo koyo du ko ni ani nitá kina rogo gako apai, ki nika kuti gako arugute, na gako rugaapai, na gako asarangbanga, nga gu ko arugu atitarani kuti ni.

⁵⁹Gi eimi apai re, nga gu mi azungadi pa ha bara bangiri Yekova, si dú mbembedi na Yekova gaani Mbori uru na yuru, ya ko mbakadi gu pai nga ga gako moyambu, na gu pai nga ga gako aboro aYisaraere, a wa rengbe he na uru;

⁶⁰ya angbatunga aboro zegino dunduko ini he ya Yekova, ko nga Mbori; kura mbori ho te.

⁶¹Kpotoroni yo dú ziazia fu Yekova gaani Mbori, ka ata rogo gako rugaapai, ki nika kuti gako arugute, wa du he areme.”

⁶²Bakindo na aYisaraere dunduko ki mongo tumo ni motumo ku bara bangiri Yekova.

⁶³Agu amotumo Soromo atumo na ni fu Yekova ni amotumo zereda adu wa abaabagara 22,000, na akandoro 120,000. Si du bakindo na awiri aYisaraere dunduko ki kpara ga Yekova bambu.

⁶⁴Ti kina gu uru re bakindo akpara gu rago du bebere gu vurukporo naadu barangba ga Yekova bambu; yo ko atumo ni na zozo motumo, na motumo riahe, na nzeme amotumo zereda; bambiko gu bamotumo sirigi naadu bara bangiri Yekova arengba nga ka dia zozo motumo, na motumo riahe, na nzeme amotumo zereda dunduko te.

⁶⁵Si du Soromo amangi pumbo ti ni ti gu rago re tipa uru saba, ku bara bangiri Yekova gaani Mbori na aYisaraere dunduko wa sa na ko. Si adu ni bakere gbuu, tona ti bangbanda Amata ki da ti gu Wiridi du Ezipeta yo.

⁶⁶Ti muambi uru ko ki ya aboro ga, i ki ta sambua bakindo, ki niga ku rogo gayo abamburoko yo na wasa, ki ningi ngbaduyo yo tipa pa ga Yekova weneringise dunduko, nga gu ko anayugo fu gako moyambu nangia Dawidi, na fu aYisaraere, nga gako aboro.