Read zande 2 Abakindo 1 Bible Online

2 Abakindo 1 - zande bible

2 Abakindo 1

¹Fuo kpio Aba Moaba ki sa mungu kuti aYisaraere.

²Azaya ki ti ti gu bangiri gako bambu naadu ku ari nga gu naadu Somorona yo, ko ki du na kaza. Ko ki kedi asunge ki ya fu yo, “Oni ndú, ki sana Bara-zebuba nga ga Ekurone mbori si ngia mi ahú be gi kaza re.”

³Ono ga Yekova maraika ki ya fu Eriya nangia boro Tesebe, “Mo gúari, ki ndu ka gbia ga bakindo aSomorono asunge, ki ya fu yo, ‘A nga Mbori ringara aYisaraere no te? si du oni andú ti ni tigaoni ka sana he be Bara-zebuba nga gu mbori nga ga Ekurone he?’

⁴Si du ya Yekova wẽ, ‘Mo agúari nga auru gu barame pi mo auru he te, ono ni rengo mo akpí akpi.’ ” Eriya ki guari pati yo.

⁵Asunge ki karaga tiyo koyo du bakindo ni, ko ki ya fu yo, “Tipagine karaga oni tironi ti ni?”

⁶I ki ya fu ko, “Kumba niye ki gbia rani, ki ya fu rani, ‘Oni ga, oni káraga tironi berewe koyo du bakindo ni nakedi roni, ki ya fu ko, Ya Yekova wẽ, A nga Mbori ringara aYisaraere no te? si du mo asana he ti ni be Bara-zebuba nga gu mbori nga ga Ekurone he? Si du mo agúari nga auru gu barame pi mo auru he te, ono ni rengo, mo akpí akpi.’ ”

⁷Ko ki ya fu yo, “Gini ngbatunga kumba ningia gu ko niye ka gbia roni, ki gumba agi apai re fu roni?”

⁸I ki karaga ha ki ya fu ko, “Ko nidu ni boro niukadi amuamu roko, ki vo giri dimose nga kpoto dimoko.” Ko ki ya, “Eriya du nga boro Tesebe.”

⁹Bakindo ki kedi barutirivura nga ga 50 yo na gako aboro 50 fuo ko. Ko ki ndu koyo du Eriya ni, wa ko asungu ri gangara yo. Ko ki ya fu ko, “Ako ga Mbori kumba, ya bakindo wẽ, ‘Mo zórõ.’ ”

¹⁰Ono Eriya ki karaga ha fu gu barutirivura nga ga 50 aboro, “Ka mi du ni ga Mbori kumba rengo, we zórõ ngbangbaturũ yo, ki riti ro na gamo aboro 50.” We ki zorõ ngbangbaturũ yo, ki riti ko na gako aboro 50.

¹¹Bakindo ki kedi kura barutirivura koyo du ko ni, nga ga 50 yo, na gako aboro 50. Ko ki karaga ha ki ya fu Eriya, “Ako ga Mbori kumba, ya bakindo wẽ, ‘Mo zórõ nga ni ipo!’ ”

¹²Ono Eriya ki karaga ha ki ya fu yo, “Ka mi du ni ga Mbori kumba rengo, we zórõ ngbangbaturũ yo, ki riti ro na gamo aboro 50.” Ga Mbori we ki zorõ ngbangbaturũ yo, ki riti ko na gako aboro 50.

¹³Bakindo ki kedi biata barutirivura berewe nga ga 50 yo, na gako aboro 50. Gu biata barutirivura re nga ga 50 yo ki ndu, ki ye ki ti ngba rukusuko ku bara bangiri Eriya, ki nizungadi ko, ki ya fu ko, “Ako ga Mbori kumba, mi nakpara foro, ungare dú ni kikiipa ha bangiro na unga agi avururo re du 50 a.

¹⁴Mo ngére, we azorõ ngbangbaturũ yo, ki riti gu bambata abarutirivura ue naadu mbata, nga ga 50 yo na gayo aboro 50. Ono awere mo ídi he ungare dú adu ni kikiipa ha bangiro.”

¹⁵Si du ga Yekova maraika ki ya fu Eriya, “Mo ndú na ko. Ka mo gúnde nga be ko ya.” Ko ki guari, ki ndu na ko koyo du bakindo ni.

¹⁶Eriya ki ya fu bakindo, “Ya Yekova wẽ, ‘Bambiko wa mo akedi asunge ka sana he be Bara-zebuba gu mbori nga ga Ekurone he, ― si adu wo bambiko Mbori adu nga ringara aYisaraere no ka mo sana ko tipa pai te? si du mo agúari nga auru gu ba pi mo auru he te, ono ni rengo mo akpí akpi.’ ”

¹⁷Si du ko ki kpi kina kuti sangba Yekova wa gu pai Eriya agumba. Yorama atona zoga rago ku ba ko ti gu ue garã zogarago nga ga Yorama nangia wiri Yosafata nangia bakindo aYudo; bambiko Azaya abatika nga kumbagude te.

¹⁸Were kura ga Azaya apai nga gu ko amangi he, ati si ni keke he rogo gu Kitabu Peka pa agu apai Abakindo aYisaraere anamanga?