Read zande 2 Abakindo 10 Bible Online

2 Abakindo 10 - zande bible

2 Abakindo 10

¹Were awiri Aba ni akumba adu Somorona yo wa 70. Yeu ki ke awaraga, ki kekedi he ku Somorona yo fu agu abazogo nga ga Yizerere yo, fu kina abaakumba, na fu agu yo nabanda awiri Aba, ki ya,

²“Wa gi waraga re ka da koyo du oni ni, wa du awiri bairaroni na kina roni, angbagidavura na afarasi ki du kina yo a, na bakporo ngapa a, na auvura,

³oni sia gu bawene ni nga gu ni ngba dagba awiri bairaroni yo, ki moi ni ku auru ga bani mbatabakindo. Oni ki so vura tipa ngbatunga bairaroni.”

⁴Ono i agunde agunde ki susi, ki ya, “Oni ngére, wa abakindo ue aru nga barangba ko ya: ani awira pa ru waĩ?”

⁵Gu ko nadu ri ga bakindo aborokporo, na gu ko nadu ku ri bakporo, na abaakumba, na agu yo nabanda awiri Aba a, i ki kedi sunge koyo du Yeu ni, ki ya, “Ani nga gamo amoyambu, ani amánga kina agu apai dunduko mo aya ani mángi he. Ani amáa nga boro ni bakindo te. Mo mángi gu pai ngba bangiro.”

⁶Yeu ki ke waraga fu yo ni ue he, ki ya, “Ka oni du ni gimi aboro, ka oni idi ka gia sangbare a, oni káfu ri awiri bairaroni ti yo, ki ye kono du mi ni ku Yizerere no gba ti saa wa gere.” Were agu awiri bakindo re naadu 70, i adu ku bakindigi aboro yo nangia ga bakporo yo, nga agu yo namou ti yo.

⁷Si adu wa gere, ho waraga aye ni fu yo, i ki rogo awiri bakindo, ki imi yo, wa aboro 70, ki mamoi ariyo ku rogo abaga, ki kedi he fu Yeu ku Yizerere yo.

⁸Ho sunge aye ni, ki gumba ha fu ko, ki ya, “I ye na ri awiri bakindo,” Yeu ki ya, “Oni moi he ni guguda ue pa ngbadimo bakporo yo ki da ku wiso.”

⁹Si adu wa gere wiso, ko ki kuru, ki ru, ki ya fu aboro dunduko, “Bape ku ri roni te. Mi ni tire ata bura kuti bairare, ki imi ko; ono da imi agi yo re dunduko?

¹⁰Oni ini he awere ya a nga wiri pai ho sa nga ga Yekova nikati ku sande gbua te, nga gu pai Yekova agumba tipa ngbatunga Aba; bambiko Yekova mangi gu pai ko agumba ku ngba gako moyambu nangia Eriya.”

¹¹Si du Yeu aimi agu aboro ti ni dunduko nanye nga ngbatunga Aba Yizerere yo, na gako bakindigi aboro du na abadiako, na gako aboromotumo, daho ko ambu nga gu ni ni sa ya.

¹²Yeu ki tona ka ndu ku Somorona yo. Wa ko andu ngba gako gene ko ki gbia tiko na awirina Azaya nangia bakindo aYudo, pati Bambu Kpemangeanya nga ga Ababanda akandoro. Ko ki ya fu yo, “Ada nga oni?” I ki karaga ha ki ya, “Ani nga awirina Azaya. Ani nandu ka paa kuti awiri bakindo na awiri nakindo.”

¹⁴Ko ki ya, “Oni zi yo ni ungayo.” I ki zi yo ni ungayo, ki imi yo pati gu due nga ga Bambu Kpemangeanya, wa aboro 42. Ko abatasa nga gu ni sa te.

¹⁵Fuo euari ko ho, ko ki gbia Yonadada nangia wiri Rekaba naaye ka gbia ko. Ko ki poi kuti ko, ki ya fu ko, “Berãro kono du mi ni nzunzu, wa du berãre koyo du mo ni?” Yonadada ki karaga ha ki ya, “Wo du he.” Yeu ki ya, “Ka si du wo, mo táĩ bero kono.” Ko ki taĩ beko koyo du Yeu ni, Yeu ki gbe ko fuo ko ku ngbagidavura yo.

¹⁶Ko ki ya, “Ani ndú na mo, mo bi gi nyemuse fu Yekova.” Si du i ki oro na ko rogo gako ngbagidavura.

¹⁷Ho ko ada ni Somorona yo, ko ki imi agu aboro dunduko nga ga Aba yo nanye Somorona yo, daho ko agbarasi yo ni dunduko, kuti sangba Yekova, nga gu ko agumba ha fu Eriya.

¹⁸Yeu ki dungura aboro dunduko, ki ya fu yo, “Aba amangi pa Bara toni; ono Yeu nikamanga pa ha bakere.

¹⁹Si du oni yambu agu anebi du nga ga Bara yo kono du mi ni na airisi he dunduko, na gaha aboromotumo dunduko. Ka boro kpá nga wa sa ya, bambiko mi du na bakere motumo ka manga ha fu Bara. Gu boro ka nye koyo, ni anyé nga ni ungani te.” Ono Yeu amangi he ni biriki, tipa gu pai nga ko gbarasi airisi Bara dunduko.

²⁰Yeu ki ya, “Oni yámbu irisiirisi gbuu tipa Bara.” I ki taki pande he.

²¹Yeu ki kedi asunge ku rogo ringara aYisaraere yo dunduko. Airisi Bara ki ye dunduko. Si du boro anye nga sa nga irisi Bara te. I ki rimi ku rogo ga Bara bambu yo. Ga Bara bambu ki hi ahi tona bani ki da ti digida ha ku bani.

²²Yeu ki ya fu gu ko nadu ku ri bambu igaroko, “Mo yé na aroko fu airisi Bara dunduko.” Ko ki kusi aroko fu yo.

²³Yeu ki ndu na Yonadaba wiri Rekaba, ku dimo yo ku rogo ga Bara bambu yo. Ko ki ya fu airisi Bara, “Oni ngére nga ka bi nga, si ngia gu ni sa erẽ nga vuru Yekova, ono kina airisi Bara.”

²⁴I ki rimi ka tumo ni amotumo na zozo amotumo. Were Yeu aringbisi abóro ku zegi yo wa 80, ki ya fu yo, “Ka gu boro sa merẽ dagba agu yo fu mi yo ku be roni, gu ni ka mbu ni ni ga, i aimo kina ni ku ba ni.”

²⁵Si adu wa gere, wa ko adigisi pa manga motumo na zozo motumo, Yeu ki ya fu ababandarago na fu abarutirivura, “Oni rimi, ka imo yo. Ka boro bati nga sa ya.” I ki imi yo ni basape. Ababandarago na abarutirivura ki nibafu yo ku zegi yo, ki ndu sa gu bakporo ga Bara bambu adu rogo.

²⁶I ki kusi gu duadua kpiaahe nadu rogo ga Bara bambu yo, ki zokodi he.

²⁷I ki kuadi gu duadua mbia nga ga Bara, ki kuadi ga Bara bambu ku sande, si ki du ni gbogorogbi ki da ku awere.

²⁸Wo Yeu agbarasi ga Bara pai dagba aYisaraere.

²⁹Ono Yeu ambu nga peka gu ingaapai nga ga Yerobama wiri Nebata, nga gu ko anaingisa aYisaraere na ni i niingi pai te, nga gu kpia wiri abagara naadu ni dahabu, gu ku Betere yo na gu ku Dana yo a.

³⁰Yekova ki ya fu Yeu “Bambiko wa mo namangi agu apai dunduko wenengaĩ ru aru bangire, ki mangi apai dunduko fu ngbatunga Aba wa si adu kpotore yo, gu rika awiro nga biama ha nikasunga auru ga aYisaraere mbatabakindo.”

³¹Ono Yeu abanda nga tiko ka apeka sangba ga Yekova arugute nga ga aYisaraere Mbori na kpotoko yo dunduko te. Ko ambu nga peka gu ingaapai nga ga Yerobama te, nga gu ko anaingisa aYisaraere na ni i niingi pai.

³²Yekova ki tona ka umbasi ringara aYisaraere ni gu rago re. Azaere ki mangi yo ti abangbanda arago dunduko nga ga aYisaraere;

³³tona Yaradene yo ku uroyo, na gu ringara dunduko nga ga Girada, na ga aGado, na ga aRubeno, na ga aManase, tona Aroere yo naadu pati ngboongboorago Arunona yo, nga Girada na Basana.

³⁴Were kura ga Yeu apai na agu apai dunduko ko amangi, na pa gako ngarã dunduko, ati si ni keke he rogo gu Kitabu Peka pa agu apai Abakindo aYisaraere anamanga?

³⁵Yeu ki kpi fuo atitako. I ki kpisidi ko Somorona yo. Yoaza nangia wiriko ki zogo rago ku ba ko.

³⁶Yeu azogo aYisaraere Somorona yo tipa agarã 28.