Read zande 2 Abakindo 18 Bible Online

2 Abakindo 18 - zande bible

2 Abakindo 18

¹Si adu wa gere ti gu biata garã zogarago nangia ga Osea wiri Era nangia bakindo aYisaraere, Izikiya nangia wiri Aza bakindo aYudo ki tona zoga rago.

²Garãko adu 25 ho ko atona zoga rago ni. Ko ki zogo rago tipa garã 29 Yerusarema yo. Rimo nako nangia Abi ni wiri Zekaraya.

³Ko ki nimangi gu pai naru aru bangiri Yekova, wa kina gu pai dunduko Dawidi anamanga nangia titako.

⁴Ko ki rogo gu tumbatumba arago ku sa yo, ki kuadi duadua ambia, ki dewe aAsera nga ngbama. Ko ki futuka gu sesekpia wo Mose ambakadi he; bambiko awiri aYisaraere anazokoda fuõngua barangba ha dati gu rago re. Ko ki ya ti ni Neusetana.

⁵Ko anakida kuti Yekova, nga ga aYisaraere Mbori. Fuo ko bakindo adu nga ho dagba abakindo aYudo wa ko te, dagba agu yo naadu mbata fu ko a te.

⁶Bambiko ko aka kuti Yekova. Ko ambu nga peka ko a te, ono ko aka kuti agu arugute Yekova arugu Mose na ni.

⁷Yekova adu na ko kindi. Ho Izikiya anindu ku ho ni, ko ki niu au yo. Ko asa mungu kuti bakindo aAsuro, ka ko ara nga fu ko ya.

⁸Ko ki mangi aFereseto daku Gaza yo na agu ababandarago nga gaha, tona ngbaho ga babandarago bambu yo sa bakporo ngapa.

⁹Si adu wa gere ti gu biama garã zogarago nangia ga Bakindo Izikiya, nga gu nangia saba garã zogarago nangia ga Osea wiri Era bakindo aYisaraere, Saramanesere bakindo aAsuro ki ye ka so vura kuti Somorona, ki ru nguru kuti ni.

¹⁰Ti digida biata garã ko adi he. I adi Somorona ti gu sita garã zogarago nangia ga Izikiya, nga gu nangia ribua garã zogarago nangia ga Osea bakindo aYisaraere.

¹¹Bakindo aAsuro ki ga na aYisaraere ku Asura yo, ki moi yo ku Ara yo, na ku pavuru gu di nga Abora, ringara Gozana yo, na rogo ga aMadai abaakporo,

¹²bambiko i agia nga sangba Yekova nga gayo Mbori te. Ono i agu auru ndika gako mokido, nga agu apai dunduko Mose ga Yekova moyambu arugu he, ka i akpi nga nyemu ka gia ha ya, ka amanga ha a ya.

¹³Were ti gu 14 garã zogarago nangia ga Bakindo Izikiya, Saneriba nangia bakindo aAsuro aye na vura kuti agu abaakporo ngapa dunduko nga ga aYudo, ki rogo ho.

¹⁴Izikiya bakindo aYudo ki kedi sunge koyo du bakindo aAsuro ni ku Rakisa yo, ki ya, “Mi mangi irairaapai; mo guari ti re. Agu apai mo ka maa ha ku ri re mi amanga ha amanga.” Bakindo aAsuro ki ringbisi ataranda feda 300 fu Izikiya na ataranda dahabu 30.

¹⁵Izikiya ki fu gu feda nadu rogo ga Yekova bambu fu ko dú, na gu nadu rogo gu baiga kikiipaahe yo du tii ga bakindo bambu yo.

¹⁶Ti gu rago re Izikiya arogo gu dahabu nadu ti angbadimo ga Yekova yekaru, na ti angua pangbadimo nga gu Izikiya bakindo aYudo adadi he na ni, ko ki fu he fu bakindo aAsuro.

¹⁷Bakindo aAsuro akedi aTaratana na Raba-sarisa na Rabasake Rakisa yo koyo du Bakindo Izikiya ni na bakere rimbasa aborosovura ku Yerusarema yo. I ki ndu ki da ku Yerusarema yo. Ho i ada ni, i ki da rundu pati gene fukusa naadu ku ngbi yo naadu ngba bagene ku Bavurusiremu yo.

¹⁸Ho i ayambu bakindo ni, aEriyakima nangia wiri Erekiya ki kuru fuo yo, naadu ku ri aborokporo, na Sebena nangia bakeapai, na Yoa wiri Asafa nangia batingidipai.

¹⁹Rabasake ki ya fu yo, “Oni gúmba ha fu Izikiya awere ki ya, ‘Ya bakere bakindo, nga bakindo aAsuro wẽ: Gini pai dũ ho idi mo pa ha nga gu mo nakida kuti ni?

²⁰Ya mo tigamo, kina rugapai gbua rengbe na fu ome tipa sovura? Da mo nakida kuti ni, wa sa mo mungu kuti re?

²¹Mo ngere, mo nakida awere kuti gu kitiri nganzi re, nga Ezipeta; nga gu ka boro songodi tini kuti ni, si ki rúpu beni arúpa. Wo du pa Faro nga bakindo aEzipeto fu agu yo dunduko nakida kuti ko.

²²Ono ka oni ya fere, “Ani nakida kuti Yekova gaani Mbori.” A nga ko du Izikiya agbataka gako tumbatumba arago ku sa yo, na abamotumo, te? ki ya fu aYudo na fu Yerusarema, “Oni afu irisa barangba gi bamotumo re du Yerusarema no.”

²³Si du awere tie, mi nakpara foro, mo fu ngbaanga fu bairare nga bakindo aAsuro, mi ki fu afarasi foro 2,000, ka mo rengbe ka maa abandurira ku ri ra.

²⁴Waĩ tie rengbe mo ka ka fu kina gu umba barutirivura dagba ga bairare amoyambu yo? ni kida kuti Ezipeta tipa angbagidavura na tipa abanduri afarasi?

²⁵Ku ri gere, a nga mi naye awere mbiko Yekova kuti gi bakporo re ka gbarasa ha, te? Yekova aya fere, Mo ndu kuti gu ringara re ki gbarasi he.’ ”

²⁶Si du Eriyakima wiri Erikiya, na Sebena, na Yoa, ki ya fu Rabasake. “Ani nakpara foro, mo gumba pai fu avururo rogo pa aArama yo; bambiko ani ini ne a. Ka mo fu nga na ani rogo pa aYudo, ku tu agu aboro yo du auru ngapa bakporo yo ya.”

²⁷Ono Rabasake ki ya fu yo, “Bairare akedi re mi gumba agi apai re fu bairaroni wa sa na oni a? Ko akedi re fuo agu akumba nasunga ri ngapa bakporo yo, nari kina boro regboyo, ki nimbiri kina ime tii vuyo wa sa na oni, te?”

²⁸Rabasake ki ru, ki nipoi ku ari ni bakere fugo rogo pa aYudo yo, ki ya, “Oni gi sangba bakere bakindo, nga bakindo aAsuro!

²⁹Ya bakindo wẽ, ‘Ka oni idi nga ha fu Izikiya ko nangi roni ya, bambiko ko arengba nga ka batasa roni be re te.

³⁰Ka oni idi nga ha fu Izikiya ko sosoai roni oni kida kuti Yekova a ya, wa ya ko, Ni rengo Yekova nikabatasa rani, i afu nga gi bakporo re ku be bakindo aAsuro te.’

³¹Ka oni dege nga turoni fu Izikiya ya; mbiko wo poi bakindo aAsuro, ‘Oni mbakadi pa zereda na mi, ki ra fere. Si du oni ari kina gaoni bakakue wa du oni ni ba sa sa, na aboro ni ba sa sa ari gayo vurumo, aboro ni ba sa sa ambíra ime rogo gayo due ime;

³²daho mi ka ye ni ka roga roni ku rogo ringara du wa kina gaoni ringara, nga ringara zende ahe na imekakue, nga ringara kpokuta na aati bakakue, ringara nzeme aeraya na anyege. Oni ki nye ni ungaroni, ka oni akpíka nga ya. Ka oni dége nga turoni fu Izikiya ya, ho ko nazomia roni ni, niya, Yekova abátasa rani.

³³Ga kura ngbatunga arikaaboro ambori abatasi gayo ringara be bakindo aAsuro?

³⁴Ga Anata ambori wari? na ga Arupada yo? ga Sefarawayima ambori wari? na ga Ena yo, na ga Iva ye? I abatasi Somorona be re?

³⁵Gini ambori dagba agu ambori dunduko nga ga agu aringara re, nabatasi gayo ringara be re ka Yekova batasi kina Yerusarema be re ti ni?’”

³⁶Ono aboro ki ongo kii, ka i akaraga nga wiri pai fu ko wa sa ya, bambiko ga bakindo rugute adu, nga, “Ka oni karaga nga pai fu ko ya.”

³⁷Si du Eriyakima nangia wiri Erekiya, naadu ku ri aborokporo aye ti ni koyo du Izikiya ni, na Sebena nangia bakeapai, na Yoa nangia wiri Asafa ni batingidipai, na gayo aroko ni sipisipi he, i ki gumba ga Rabasake apai fu ko.