Read zande 2 Abakindo 19 Bible Online

2 Abakindo 19 - zande bible

2 Abakindo 19

¹Ho Bakindo Izikiya agi he ni, ko ki siri gako aroko, ki ukadi tiko ni mbuzaroko, ki ndu ku tii ga Yekova bambu yo.

²Ko ki kedi Eriyakima nadu ku ri aborokporo na Sebena nangia bakeapai, na abaakumba aboromotumo ni ukadiukadi tiyo na mbuzaroko, koyo du Yesaya ni nangia nebi nangia wiri Amosa.

³I ki ya fu Yesaya, “Ya Izikiya wẽ, Gi uru re nga uru fudifudipai ni uru zapai, na uru gbarasarimo; bambiko rogo batika agude du, ono ome ho ka batika yo te.

⁴Ka ngia Yekova nga ga Mbori agía agu apai nga ga Rabasake, gu ko bairako akedi ko nga bakindo aAsuro ko gbarasi rimo unga Mbori. Agu apai Yekova agi he nga ga Mbori, si ngia ko aza ha. Si du mo kpari kpe tipa gu yangara aboro na nye.”

⁵Si du ga Bakindo Izikiya amoyambu aye ti ni koyo du Yesaya ni.

⁶Yesaya ki ya fu yo, “Oni aya fu bairaroni wé, ‘Ya Yekova wẽ; Ka mo gúnde nga be agu apai gi mo ho, nga gu ga bakindo aAsuro amoyambu agberẽ ngbayo yo na ni fere ya.

⁷Mo ngere, mi amaa toro ku rogo ko yo, ko agía mboimboi pai. Ko akaraga tiko kina ku rogo gako ringara. Mi afu ko ko ti ngba basape kina rogo gako ringara.’ ”

⁸Si du Rabasake akaraga tiko ti ni, ki da bi bakindo aAsuro ko niso vura kuti Ribina; bambiko ko agi he ya bakindo guari Rakisa yo.

⁹Ho bakindo agi gu pai ni re nga gu i agumba tipa Tiraka nangia bakindo aEtiopia, naya, “Mo ngére, ko ye ka so vura kuti ro,” bakindo aAsuro ki kedi asunge berewe koyo du Izikiya ni, ki ya,

¹⁰“Oni gúmba pai fu Izikiya bakindo aYudo, ki ya, ‘Ka mo idi nga fu ga Mbori ko nangi ro ya, nga gu ko mo nakida kuti ko, naaya, i afu nga Yerusarema ku be bakindo aAsuro te.

¹¹Mo ngere, mo agi pa agu apai abakindo aAsuro anamanga fu aringara dunduko, wa i agbarasi he kpakaya. Waĩ mo ka bata tigamo?

¹²Agu angbatunga arikaaboro atitare agbarasi yo, gayo ambo abatasi yo nga Gozana, na Arana, na Rezefe, na awiri Edene naadu Terasara yo?

¹³Wari du bakindo Amata ni? na bakindo Arupada na agu abakindo nga ga agu abaakporo nga Sefarawayima? na Ena na Iva a?’ ”

¹⁴Izikiya ki di gu waraga re be asunge ki gedi he. Izikiya ki ndu ku tii ga Yekova bambu yo, ki zara ha ku bara bangiri Yekova.

¹⁵Izikiya ki kpari fu Yekova, ki ya, “Ako Yekova ga aYisaraere Mbori, ninasunga ri akeruba, mo nga Mbori, kina mo sa, du ri angbi dunduko nga ga kpotosende. Kina ro namangi ngbangbaturũ na kpotosende a.

¹⁶Ako Yekova, mo ye turo, ki gi pai. Ako Yekova, mo za bangiro, ki bi pai; mo gi agu apai Saneriba akedi he ka gbarasa rimo unga Mbori.

¹⁷Ako Yekova, rengo nga ha, ya abakindo aAsuro anaba tunga arikaaboro na gayo aringara,

¹⁸ki nibafu gayo ambori ku we yo; bambiko ndikidi ambori nangia yo te, ono kina sabe aboro naadu, nga ngua na mbia, si du i agbarasi yo ti ni.

¹⁹Ako Yekova gaani Mbori, si du awere, mi nazungadi ro, mo batasi rani be ko tie, ya angbi dunduko auru kpotosende ini he ya mo nga Yekova nga ndikidi Mbori, kina mo du sa.”

²⁰Yesaya nangia wiri Amosa ki kedi sunge koyo du Izikiya ni, ki ya, “Ya Yekova nga ga aYisaraere Mbori wẽ: Wa kpari mo fere tipa ga Saneriba pai nga bakindo aAsuro, mi gi ga kpe.

²¹Gere nga gu pai gumba Yekova tipa ko: “Aboro Siona― i payasi ro ki sira ro rogo mongo; na aboro Yerusarema,― i pikipo riyo ti ro giiro yo.

²²“Da nga gu ni mo agbarasi rimoni, ki gberẽ ngbaro yo fu ni? Mo atuka fugo ni ngbaro kuti da nizara bangiro ni enda? Kina kuti ga Yisaraere Ziazia Ko!

²³Mo agbarasi rimo Gbia ku ngba gamo amoyambu, mo aya, ‘Mi niye na rimbasa gimi angbagidavura ku ri gbangagbanga abaagangara yo, sa gu tuturu papara rago kina boro bebere Rebanona yo; mi adewe gaha gbangagbanga akedara, na gaha bawene siasia ngua nga kupuresa a, mi arimi da ku rogo gaha bangbandarago du tuturu, nga bire gaha idiidi zuzu ahe.

²⁴Mi ageteke due ime ki mbiri ime, mi augudisi adi Ezipeta yo dunduko ni kina kpandure.’

²⁵“Mo agia nga pa ha wa mi amangi he bakuru yo te? Gu pai mi abere pa manga ha ti agu arago naadu bakuru yo; kina ha mi namanga ha wa du rago re, nga, mo agbarasa agu abaakporo ngapa, si ki du ni baguguda gbarasigbarasi ahe,

²⁶wa du ome araki yo ni umba ha, i ayungura, zee ki mangi yo, i ki du wa rúkuruku ahe ati yo, wa fogo kpepasio, wa nvuo ri abambu yo, wa zende ahe niwara mbata fu nyaka ha.

²⁷“Ono mi ini pa ga sunga, na pa ga kura ku zegi yo, na pa ga rima ku dimo yo a, na pa ga zinga kuti re.

²⁸Bambiko wa du mo na zinga kuti re na wa pa ga kiisa pa tiro ye da ku ture yo, si du mi ka maa gi kombe ti ni ku õro yo, na gi marã rugangba ku ngbaro yo, mi akaraga ro kina ngba gu gene mo aye ngba ha.

²⁹“Gere adu ni yuguyugupai foro: oni ari kina futuhe ni gi garã re, na ti ue garã gu nikakura ti fuo ho; ti biata garã oni aru he, ki ke he, ki rúku bakakue aati yo, ki niri zuzu he.

³⁰Gu yangara ngbatunga aYudo naoati tarayo aríma berewe ku sende yo, ki nisono ki nizuku ku ari.

³¹Bambiko Yerusarema yo yangara yo ka kura ni, agu yo bati i akura Bagangara Siona yo. Gu kenapai nga ga Yekova nikamanga gere.

³²“Si du wo poi Yekova tĩna bakindo aAsuro. Ko aye nga ku rogo gi bakporo re te, ko abá nga guanza koyo a te, ko aye nga sa ni na vurakuhe a te, watadu ba kanda kuti ni a te

³³Ngba gu gene yo ko aye ni, ko akaraga tiko kina ngba ha, ko aye nga ku rogo gi bakporo re te, wo poi Yekova.

³⁴Bambiko mi abanda gi bakporo re ka batasa ha, mbiko kina gimi pai na mbiko ga gi moyainbu pai nga Dawidi.”

³⁵Si adu wa gere ni gu yuru re, ga Yekova maraika ki kuru, ki imi aAsuro rogo gayo bataya wa aboro 185,000. Ho aboro azingi ni ngbatutu wiso, oni ngere, agu yo re ki du ni kina ku kangba aboro dunduko.

³⁶Si du Saneriba nangia bakindo aAsuro aguari ti ni, ki ga ki niraki Nineve yo.

³⁷Si ki ta du wa gere, wa ko afu irisa rogo ga Niseroka bambu yo nangia gako mbori, aAduramereke na Saresere nangia awiriko ki imi ko ni basape. I ki mere ku ringara Ararata yo. Esaradona ki zogo rago ku ba ko nangia wiriko.