Read zande 2 Abakindo 2 Bible Online

2 Abakindo 2 - zande bible

2 Abakindo 2

¹Si adu wa gere, ho Yekova aida ka tuka Eriya ni ku ngbangbaturũ yo rogo bakamikami yuge, Eriya ki guari Girigara yo na Erisa.

²Eriya ki ya fu Erisa, “Mi nakpara foro, mo nyé erẽ; bambiko Yekova nakeda re mi ndu da ku Betere yo.” Ono Erisa ki ya, “A wa du Yekova ni ungako, mbisimoro ki du ni ungaha a, mi ambú nga ro te.” Si du i andu ti ni ku Betere yo.

³Agu awiri anebi naadu Betere yo, i ki kuru fuo Erisa, ki ya fu ko, “Mo ini he ya Yekova nikatuka bairaro ku ari yo areme?” Ko ki ya, “Ii, mi ini he. Oni óngo.”

⁴Eriya ki ya fu ko, “Erisa, mi nakpara foro, mo nyé kina erẽ; bambiko Yekova nakeda re ku Yereo yo.” Ono Erisa ki ya, “A wa du Yekova ni ungako, mbisimoro ki du ni ungaha a, mi ambú nga ro te.” Si du i ada ti ni ku Yereo yo.

⁵Agu awiri anebi naadu Yereo yo, i ki mbedi na Erisa, ki ya fu ko, “Mo ini he ya Yekova nikatuka bairaro ku ari yo areme?” Ko ki karaga ha ki ya, “Ii mi ini he. Oni óngo.”

⁶Eriya ki ya fu ko, “Mi nakpara foro, mo nyé kina erẽ, bambiko Yekova nakeda re ku Yaradene yo.” Ono Erisa ki ya, “A wa du Yekova ni ungako, mbisimoro ki du ni ungaha a, mi ambú nga ro te.” I ue ki susi ku mbata yo.

⁷Aboro 50 dagba awiri anebi ki ndu a, ki rundu tuturu ti yo. I ue ki ru pati Yaradene.

⁸Eriya ki di gako gbanga roko, ki kaĩ he, ki ya wa ime na ni. Si ki kparaka rogo, gu ki ta ne ku bani gu nine ku bani, si du i asi ti ni ue ku mbiti yo kina auru ugusende.

⁹Ho i asi ni ku mbiti yo, Eriya ki ya fu Erisa, “Mo sána re tipa gu he mi ka manga foro, mbata i nikadia re be ro.” Erisa ki ya, “Mi nakpara foro, mo ídi he tandu ga toro ye ku ri re ni bakere he wa bara ue.”

¹⁰Ko ki ya, “Mo nasana he tipa kpakarakpakara pai; ono wa vura du he wo, ka mo bi re ho i ka tuka re ni be ro, si adú adu wo foro. Ono ka mo abi nga re ya, si adú nga wo foro te.”

¹¹Si adu wa gere, wa i andu kindi ni fura, oni ngére, ngbagidavura nga ga we ki kuru, na agu afarasi nga ga we ra, si ki kati dagba yo kpa. Eriya ki ga ku ngbangbaturũ yo rogo bakamikami yuge.

¹²Erisa ki bi he, ko ki kpari ku ari ki ya, “Buba, buba, ga aYisaraere angbagidavura na gaha abanduri afarasi!” Ka ko abi nga ko berewe ya. Ko ki zi gako aroko, ki siri rogo ho ue.

¹³Ko ki di ga Eriya gbanga roko nga gu naati ti kpotoko, ki karaga tiko, ki ru pangba Yaradene.

¹⁴Ko ki di ga Eriya gbanga roko nga gu naati ti kpotoko, ki yawa ime na ni, ki ya, “Wari du Yekova ni, nga ga Eriya Mbori?” Were ho ko ayawa ime ni, si ki kparaka rogo, gu ki ta ne ku bani gu nine ku bani. Erisa ki si ku mbiti yo.

¹⁵Ho agu awiri anebi naarundu ka ngere ku Yereo yo abi ko ni, i ki ya, “Ga Eriya toro nye ri Erisa awere.” I ki ye ki gbia ko, ki tumusa ku sende bara bangiriko.

¹⁶I ki ya fu ko, “Mo ngere, awere, nyanyaki aboro du na avururo wa akumba 50; ani nakpara foro, i ndú ka gbata bairaro. Si ngia ga Yekova toro tuka ko ku ari yo, ki zogo ko ku ri gu kura bagangara, watadu ku rogo gu ngboongboorago.” Erisa ki ya, “Ka oni kédi nga yo ya.”

¹⁷Ho i azungia ko ni gbe, daho zee azi ko ni, ko ki ya, “Oni kédi aboro.” Si du i akedi aboro ti ni 50. I ki gbata ko tipa rame biata, ono ka i abi nga ko ya.

¹⁸I ki yega koyo du Erisa ni, ho ko asungu ni Yereo yo. Ko ki ya fu yo, “Ati mi agumba ha fu roni, ya, Ka oni ndú nga ya?”

¹⁹Akumba bakporo ki ya fu Erisa, “Mo ngére, gu rago du gi bakporo re rogo, ngba ha angba ni rengo, wa gaani gbia abi he; ono ngba nga ime te, sende ni kina kpatakpari a.”

²⁰Ko ki ya, “Oni yé na vovo kurungbu fere, ki uka tikpo ku rogo ho.” I ki ye na ni fu ko.

²¹Ko ki kuru ki ndu ku pati gugaabi yo, ki uka tikpo ku rogo ho, ki ya, “Ya Yekova wẽ, Mi zeresi gi ime re. Kpio adú nga berewe be gi ime re te, watadu kpatakpari a te.”

²²Si du ime ki ngba angba du, ki da ku areme, ku sangba gu pai yo Erisa agumba.

²³Ko ki guari yo ki ndu ku Betere yo. Ho ko andu ni gene, aparanga ki kuru bakporo yo, ki nisawia ko, ki ya fu ko, “Mo súsi, mo boro kpatakpa! Mo súsi, mo boro kpatakpa!”

²⁴Ko ki ngere ku gii ko yo ki bi yo, ki tiwa yo ti rimo Yekova. Anya nga aurisi ki kuru ue ni anara bire yo, ki sipi agu aparanga dagba yo wa aboro 42.

²⁵Ko ki guari yo ki ndu ku Bagangara Efuraima yo. Ko ki guari yo ki karaga tiko ku Somorona yo.