Read zande 2 Abakindo 21 Bible Online

2 Abakindo 21 - zande bible

2 Abakindo 21

¹Garã Manase adu 12 ho ko atona zoga rago ni. Ko ki zogo rago tipa garã 55 Yerusarema yo. Rimo nako nangia Efesiba.

²Ko ki nimangi gu pai nadu ni gbigbita ha bangiri Yekova, ni gu kere gbegberẽ sino nangia ga arikaaboro, nangia agu yo Yekova ado yo ku sa yo barangba awiri aYisaraere.

³Bambiko ko adudua gu tumbatumba arago berewe nangia gu Izikiya nangia bakindo aYudo agbarasi he. Ko ki dudua abamotumo tipa Bara, ki mangi Asera nga ngbama a wa Aba amangi nangia bakindo aYisaraere. Ko ki irisi rimbasa aũngbangbaturũ, ki nimangi pa ha.

⁴Ko ki dudua abamotumo rogo ga Yekova bambu yo, nga gu Yekova aya tipa ha, “Yerusarema yo mi ka maa rimore ni.”

⁵Ko ki dudua abamotumo tipa rimbasa aungbangbaturũ dunduko rogo gu vurukporo naadu pati ga Yekova bambu.

⁶Ko amangi wiriko ko susi rogo we, ki nimangi angua na asoroka, ki nisana agumba sangbaatoro, na abinza. Ko amangi gbigbitapai ni dungu he ku bangiri Yekova, ka gara zinga kuti ko.

⁷Ko ki moi gu sese kpiahe nga ga Asera nga ngbama ko amangi he, ku rogo gu bambu nga gu Yekova aya fu Dawidi tipa ha na fu Soromo nangia wiriko, “Rogo gi bambu re, na Yerusarema yo, nga gu sia mi dagba angbatunga aYisaraere, Mi amáa rimore yo nye anye kindi.

⁸Mi amerẽsa nga awiri aYisaraere i nimerẽ berewe ti gu ringara nga gu mi afu fu atitayo te; kina gu ka i amanga agu apai dunduko mi arugu yo kuti ni, na kuti agu arugute dunduko gi moyambu nga Mose arugu yo na ni.”

⁹Ono i adega nga tuyo te. Manase ki ingisi yo i mangi gu pai nadu ni gbigbita ha ki susi gu pai arikaaboro anamanga nga agu yo Yekova agbarasi yo barangba awiri aYisaraere.

¹⁰Yekova ki gumba pai ku ngba gako amoyambu nangia anebi, ki ya,

¹¹“Bambiko Manase bakindo aYudo amangi gi gbigbitaapai re, ki mangi pai ni gbegberẽ he ki susi gu aAmoro amangi, nga agu yo naadu mbata fu ko, ki ingisi aYudo a i niingi pai mbiko gako kpiaahe;

¹²si du ya Yekova ti ni, nga ga aYisaraere Mbori, Oni ngere, Mi nikaye na ngbatunga gbigbitapai ku ri Yerusarema na ku ri Yuda, ya gu ni ka gi he, tuni yo akperenga akperenga.

¹³Mi ataa ga Somorona giri ringbisahe ku ri Yerusarema, na gu úringbisahe nga ga ngbatunga Aba, mi awéga Yerusarema wa boro nawega saani, ki ta wega ha nisaki he ku sende.

¹⁴Mi abafa yangara gimi aboro ku sa yo, ki fu yo ku be avurayo. I adu ni úmozi ni úgbugbu ahe fu avurayo dunduko;

¹⁵bambiko i mangi gu pai nadu ni gbigbita ha bangire, ki gara gi zinga kuti yo, tona kina ni gu uru atitayo akuru Ezipeta yo, daku areme a.”

¹⁶Manase ki mangi gu a nga uka kure aboro wenesa gbe, daho ko nahisi Yerusarema ni, tona bani da kuti digidaha ku bani; ku ri gu pai nga gu ko aingisi aYudo na ni, i niingi pai, ni manga gu pai nadu ni gbigbita ha bangiri Yekova.

¹⁷Were pa kura ga Manase apai, na agu apai dunduko ko amangi, na gako ingapai ko amangi, ati si ni keke he rogo gu Kitabu Peka pa agu apai Abakindo aYudo anamanga?

¹⁸Manase ki kpi fuo atitako. I ki kpisidi ko kina ati kpuko yo, ati ku Uza yo. Amona ki zogo rago ku ba ko nangia wiriko.

¹⁹Gará Amona adu 22 ho ko atona zoga rago ni. Ko ki zogo rago tipa garã ue Yerusarema yo. Rimo nako nangia Mesuremata nangia wiri Arusa boro Yoteba.

²⁰Ko amangi gu pai nadu ni gbigbita ha bangiri Yekova, wa Manase amangi nangia bako.

²¹Ko ki nipeke kina agu apai bako anapeka ha, ki nimangi pa kpiaahe wa bako anamanga pa ha, ki niirisi he.

²²Ko ki mbu Yekova nga ga atitako Mbori, ko ka apeka nga gu pai nga ga Yekova ya.

²³Ga Amona amoyambu ki ta bura ko, ki imi bakindo kina dimo kpuko yo.

²⁴Onoaboro gu ringara re ki imi agu aboro dunduko nata bura Bakindo Amona. Aboro gu ringara re ki moi Yosiya nangia wiri Amosa ni bakindo ku ba ko.

²⁵Were kura ga Amona apai nga gu ko amangi, ati si ni keke he rogo gu Kitabu Peka pa agu apai Abakindo aYudo anamanga?

²⁶I ki kpisidi ko kina rogo gako murá rogo ga Uza ati. Yosiya ki zogo rago ku ba ko nangia wiriko.