Read zande 2 Abakindo 24 Bible Online

2 Abakindo 24 - zande bible

2 Abakindo 24

¹Ti gako rago Nebukadenesara bakindo aBabero aye. Yoyakima ki du ni gako zogo garã ki du biata. Ko ki sa gako pai, ki sa mungu kuti ko.

²Yekova ki kedi arikavura nga ga aKasado yo, na arikavura nga ga aSurio yo, na arikavura nga ga aMoabo yo, na arikavura nga ga aAmono yo, ki kedi yo kuti Yuda i gbarasi he, kuti gu sangba Yekova ko agumba ha ku ngba gako amoyambu nangia anebi.

³Agi apai re aye ku ri aYudo ni rengo be sangba Yekova, ka roga yo ku sa yo bara bangiriko, bambiko gu ingaapai nga ga Manase, kina kuti agu apai ko amangi dunduko;

⁴na tipa gu kure aboro wenesa ko auka gbua. Bambiko ko ahisi Yerusarema na kure aboro wenesa. Ka Yekova aida nga ka vu ko ti ni ya.

⁵Were, kura ga Yoyakima apai, na agu apai ko amangi dú, ati si ni keke he rogo gu Kitabu Peka pa agu apai Abakindo aYudo anamanga?

⁶Yoyakima ki kpi fuo atitako. Yoyakina ki zogo rago ku ba ko nangia wiriko.

⁷Ka bakindo aEzipeto akura nga berewe rogo ringara Ezipeta ya, bambiko bakindo aBabero arogo agu ahe dunduko nga ga bakindo aEzipeto tona ti gu Di nga ga Ezipeta sa gu di nga Ferata.

⁸Garã Yoyakina adu 18 ho ko atona zoga rago ni. Ko azogo rago Yerusarema yo tipa diwi biata. Rimo nako nangia Neuseta, wiri Erenatana boro Yerusarema.

⁹Ko ki nimangi gu pai nadu ni gbigbita ha bangiri Yekova, a wa bako anamanga ha dunduko.

¹⁰Ti gu rago re avuru Nebukadenesara bakindo aBabero aye kuti Yerusarema, ki ru nguru pati bakporo.

¹¹Nebukadenesara bakindo aBabero ki ye ku bakporo yo, ho avuruko aru nguru ni kuti ni.

¹²Yoyakina bakindo aYudo ki kuru ka ndu koyo du bakindo aBabero ni, ko na nako a, na avuruko, na gako abazogo, na gako abarumbatayo a. Bakindo aBabero ki ga na ko ni zizi ko ho garã gako zogarago adu ni muambi.

¹³Ko ki ga na gu kikiipaahe dunduko naadu rogo ga Yekova bambu, na gu kikiipaahe naadu rogo ga bakindo bambu, ki dewe agu aũsunge rukutu du ni dahabu dunduko, naadu rogo ga Yekova yekaru yo, Soromo bakindo aYisaraere amangi he, a wa Yekova agumba ha mbata.

¹⁴Ko ki rogo aboro dunduko Yerusarema yo, na abazogo dunduko, na gu ngangarã aboro du, ni zizi yo, wa aboro 10,000, na abangbasia birĩ sunge na apangu dunduko. Boro anye nga yo wa sa te, kpara kina gu ngbatunga rungorungo aboro rungo arungo ki susi, nga ga ringara yo.

¹⁵Ko ki ye na Yoyakina ku Babera yo; na na bakindo, na adia bakindo, na gako abarumbatayo, nga ngangarã aboro ringara. Ko azi yo ni zizi yo Yerusarema yo, ki ga na yo ku Babera yo.

¹⁶Bakindo aBabero ki ndu na ngangarã aboro dunduko ni zizi yo ku Babera yo, wa aboro 7,000, na abangbasia birĩ sunge na apangu wa 1,000, nga agu yo naadu dunduko ni nyanyaki aboro rengbe tipa so vura.

¹⁷Bakindo aBabero ki moi Matania ni bakindo nangia tame Yoyakina ku ba ko, ki sa rimoko nga Sedekiya.

¹⁸Garã Sedekiya adu 21 ho ko atona zoga rago ni. Ko ki zogo rago Yerusarema yo tipa garã 11. Rimo nako nangia Amutara wiri Yeremaya boro Ribina.

¹⁹Ko ki nimangi gu pai nadu ni gbigbita ha bangiri Yekova, a wa Yoyakima anamanga ha dunduko.

²⁰Bambiko pai aye ku Yerusarema yo na ku Y uda yo be ga Yekova zinga, daho ko abafu yo ni ku sa yo bara bangiriko. Sedekiya ki sa mungu kuti bakindo aBabero.