Read zande 2 Abakindo 25 Bible Online

2 Abakindo 25 - zande bible

2 Abakindo 25

¹Si adu wa gere ti ribua garã gako zogarago, ti bawe diwi, ti rameru bawe, Nebukadenesara ki ye nangia bakindo aBabero, ko ni tiko na gako rimbasa aborosovura dunduko, kuti Yerusarema, ki zi bataya pati he. I ki dua gbata pati he kirikiri.

²Si du i aru nguru kuti bakporo dati gu 11 garã zogarago nangia ga Bakindo Sedekiya.

³Ti gu ribua rame nga ga biama diwi gberãngbi ki moi pai gbe bakporo yo, ka riahe adu nga ho be aboro gu ringara re wa sa ya.

⁴Aboro ki siri ngapa bakporo, aborovura ki oro yuru ngba gu gene ngbadimo naadu dagba angapa bakporo ue, naakuru pati ga bakindo ati. Ono aKasado adu pati bakporo kirikiri. Bakindo ki ndu ngba gene ku kpasakpasa rago yo.

⁵Ono ga aKasado rimbasa aborosovura ado fuo bakindo, ki dusia ko ku rogo kpasakpasa rago Yereo yo. Gako rimbasa aborosovura ki gbandaka pati ko dunduko.

⁶Si du i azi bakindo, ki ndu na ko koyo du bakindo aBabero ni, ku Ribera yo. Ko ki gbarasi ngbanga fu Sedekiya.

⁷I ki imi awiri Sedekiya kina ku bangiriko, ki imi bangiri Sedekiya, ki vo ko ni azogbo, ki ga na ko ku Babera yo.

⁸Ni bisue diwi, ti rameru saba nangia 19 garã zogarago nga ga Nebukadenesara, nangia bakindo aBabero Nebuzaradana ki ye ku Yerusarema yo, nangia baira ababandarago, nangia vuru bakindo aBabero.

⁹Ko azokodi ga Yekova bambu, na ga bakindo bambu, na abambu Yerusarema yo dunduko; ko ki zokodi bakikindigi abambu dunduko.

¹⁰Gu rimbasa aborosovura nangia ga aKasado dunduko, nga agu yo naadu na baira ababandarago, i ki kuadi ngapa bakporo pati Yerusarema kirikiri.

¹¹Nebuzaradana baira ababandarago aga na gu yangara aboro nga agu yo nanye bakporo yo ni zizi yo, na agu yo naoro koyo du bakindo aBabero ni na gu yangara rimbasa aboro a.

¹²Ono baira ababandarago ki mbu gu rungorungo aboro ringara, rungo arungo ki susi, i du ni abakombira bakakue ni ababanda aati a.

¹³Agu adangba bambu du ni sirigi naadu rogo ga Yekova bambu, na abamaaasaani na gu bazundati du ni sirigi nga gu naadu rogo ga Yekova bambu, aKasado ki kuadi he akuadi rukutu, ki ga na kina gu nga sirigi ku Babera yo.

¹⁴I aga na aakoro na aúndukuda ahe, na aubisawe na abaarikare, na agu aúsunge dunduko du ni sirigi nga gu i anamanga sunge na ni yekaru yo,

¹⁵na aúkpanawe, na akurungbu. Gu naadu ni dahabu baira ababandarago aga na ni, wa si adu ni dahabu, na gu naadu ni feda, wa si adu ni feda.

¹⁶Agu adangba bambu ue, na bazundati na abamaaasaani, nga gu Soromo amangi he tipa ga Yekova bambu; gu sirigi du ti agi aúsunge re, baroãha agasi ba ringbisaha.

¹⁷Basona gu dangba sa adu wa bagiza mbiribe 18, kpakpari sirigi ki sungu ku ri he; basona kpakpari adu wa bagiza mbiribe biata, kpia zuzu he wa ndavu adu ti kpakparihe kirikiri dunduko, na arambaaramba he dunduko adu ni sirigi. Gu ue dangba re ki du na arambaaramba sirigi a wo.

¹⁸Baira ababandarago ki zi Seraya nangia baira aboromotumo, na Sefanya gu ue boromotumo, na agu ababanda ngbadimo naadu biata.

¹⁹Ko ki zi barumbatayo sa bakporo yo nga gu ko naadu ku ri aborosovura; na aboro bisue dagba agu yo nanabi kpakpu bakindo, ko abi yo bakporo yo; na bakeapai nangia ga barutiri rimbasa aborosovura naadungura aboro ringara, na akumba ringara wa aboro 60, ko abi yo bakporo yo a.

²⁰Nebuzaradana nga baira ababandarago ki ga na agi yo re, ki ye na yo fu bakindo aBabero ku Ribera yo.

²¹Bakindo aBabero ki ta yo, ki imi yo Ribera yo ringara Amata yo. Si du i aga na aYudo ti ni ni zizi yo rogo gayo ringara.

²²Ono tipa agu aboro nanye Yuda yo, nangia agu yo Nebukadenesara bakindo aBabero ambu yo, ko ki moi Gedaria wiri Aikama ku ri yo, nangia baira abazogorago, Aikama nangia wiri Safana.

²³Were ho abarutiri rimbasa aborosovura agi he ni, ya bakindo aBabero moi Gedaria ni baira abazogorago, i na gayo aboro, i ki ye koyo du Gedaria ni ku Mizepa yo. Rimoyo du re: Yisamaere wiri Netania, Yoanana wiri Karea, Seraya wiri Tanumeta boro Netofa, Yazanaya wiri boro Maka a. I aye na gayo aboro a.

²⁴Gedaria ki zunga he fu yo na fu gayo aboro, ki ya fu yo, “Ka oni gúnde nga be avuru aKasado ya. Oni r ki rogo gi ringara re, ki nimangi pa bakindo aBabero, oni ki du zezeredi.”

²⁵Ono si adu wa gere ti saba diwi, Yisamaere ki ye nangia wiri Netania, Netania nangia wiri Erisama, Erisama nangia ngbatunga abakindo, ko na aboro bawe fuo ko, ki so vura na Gedaria, ki imi ko, ko na agu aEbere na aKasado naadu na ko Mizepa yo.

²⁶Aboro dunduko ki guari ki ndu ku Ezipeta yo, umba pa yo na bakikingidi pa yo, abarutiri rimbasa aborosovura a, bambiko i adu na gunde be aKasado.

²⁷Si adu wa gere, ti gu 37 garã Yoyakina adu ni zizi ko ti ni, nangia bakindo aYudo, ti 12 diwi, ti rameru 27, Evira-merodeka bakindo aBabero ambu Yoyakina bakindo aYudo ko kuru bambukisa yo; ti kina gu garã Evira-merodaka atona zoga rago ti ni.

²⁸Ko ki nifura na ko wenengaĩ, ki moi gako mbatabakindo ku ri agu ambatabakindo nga ga agu abakindo naadu na ko Babera yo.

²⁹Si du Yoyakina auru gako aremu bambukisa. Ko ki niri riahe bara bangiri bakindo dedede, a wa ko adu ni ungako.

³⁰Ono tipa gako úngba, kura ahe adu kina ho bakindo anafu fu ko kindi, rengbe tipa uru fu ko dedede, a wa ko adu ni ungako.