Read zande 2 Abakindo 3 Bible Online

2 Abakindo 3 - zande bible

2 Abakindo 3

¹Ono Yorama nangia wiri Aba atona zoga aYisaraere Somorona yo ti gu 18 garã zogarago nga ga Yosafata bakindo aYudo. Ko ki zogo yo garã ki du 12.

²Ko ki nimangi gu pai nadu ni gbigbita ha bangiri Yekova; ono wa bako te, na wa nako a te; bambiko ko adi kpia Bara ku sa yo nga gu bako adua.

³Wa si avura du wo ko aka kuti gu ingaapai nangia ga Yerobama nangia wiri Nebata kindi, nga gu ko anaingisa aYisaraere na ni i niingi pai. Ko ambu nga ha te.

⁴Mesa nangia bakindo aMoabo adu ni bazogo dungu akandoro. Ko anafu awiri akandoro fu bakindo aYisaraere wa 100,000 na mange abaakandoro wa 100,000 a.

⁵Ono ho Aba akpi ni, bakindo aMoabo ki sa mungu kuti bakindo aYisaraere.

⁶Si du Bakindo Yorama ki kuru Somorona yo ni gu rago re, ki dungura aYisaraere dunduko.

⁷Ko ki kedi sunge koyo du Yosafata ni nangia bakindo aYudo, ki ya, “Bakindo aMoabo sa mungu kuti re. Oni andú na mi na vura kuti Moaba?” Yosafata ki ya, “Mi andú andu. Mi wa kina ro, gimi aboro wa kina gamo yo, gimi afarasi wa kina gamo ra.”

⁸Ko ki ya, “Ani andú ngba gini gene?” Yorama ki karaga ha ki ya, “Ngba gene ngbakungba Edome.”

⁹Si du bakindo aYisaraere andu ti ni, na bakindo aYudo, na bakindo aEdome a. Ho i ake rago ni kirikiri tipa rame saba, ka ime adu nga tipa rimbasa aborosovura na tipa agu anya naadu fuo yo a ya.

¹⁰Bakindo aYisaraere ki ya, “Ako! si bambiko Yekova ayambu agi abakindo biata re ka fu yo ku be aMoabo.”

¹¹Ono Yosafata ki ya, “Ga Yekova nebi e te rẽ, ka sana Yekova tipa rani?” Ga bakindo aYisaraere moyambu sa ki karaga ha ki ya, “Erisa kina erẽ nga wiri Safata, nga gu ko nanauka ime ti be Eriya.”

¹²Yosafata ki ya, “Ga Yekova pai kina rogo ko yo.” Si du bakindo aYisaraere ki ndu koyo du Erisa ni na Yosafata na bakindo aEdome.

¹³Erisa ki ya fu bakindo aYisaraere, “Sa gimi na mo? Mo ndú fuo ga bamo anebi, na koyo du ga namo anebi ni.” Ono bakindo aYisaraere ki ya fu ko, “Ai; bambiko si wa Yekova yambu agi abakindo biata re ka fu yo ku be aMoabo.”

¹⁴Erisa ki ya, “Wa du Yekova nga ga arimbasa ko ni ungako, nga gu ko mi naru bara bangiriko, ka si naadu nga nga pa Yosafata bakindo aYudo du bangire ya, ka mi ngere nga koyo du mo ni te, ka mi bi nga ro a te.

¹⁵Ono awere mo yé na bataki kundi kono du mi ni.” Si ki ta du wa gere, ho bataki kundi ataka kundi ni, be Yekova ki ye ku ri Erisa.

¹⁶Ko ki ya, “Ya Yekova wẽ, ‘Mi asá gi ugudi wiridi re si hi be ime.’

¹⁷Bambiko ya Yekova wẽ, ‘Oni abi nga yuge te, watadu mai a te, ono gi ugudi wiridi re ahí be ime. Oni ambíra ha, oni na gaoni zogozogo anya na gaoni anya a.’

¹⁸Gere nga kina tataa pai bangiri Yekova. Ko afú aMoabo ku be roni a.

¹⁹Oni amánga abaakporo ngapa dunduko, na baawene abaakporo dunduko a. Oni adéwa wene angua du, ki kisi agugaabi, ki gbarasi wene mbudu sende dunduko na ambia.”

²⁰Si ki ta du wa gere wiso, ti saa tumo na motumo, oni ngere, ime aye ngba gene Edome yo, ki fu ku rogo ringara dunduko.

²¹Were, ho aMoabo agi he ni ya abakindo aye ka so vura kuti yo, i ki dungura tiyo, agu yo dunduko narengbe ka ukadi tiyo na uvura, tona ti gu paranga yo ki da ti kuru yo, i ki ru bangbandarago.

²²Ho i aguari ni ngbatutu wiso, uru ki nikĩ akĩ bangiri ime, aMoabo ki bi gu ime re ku barangba yo yo ni zamba ha wa kina kure.

²³I ki ya, “Kuredu yore; abakindo so vura ni rengo, ki imi kina tiyo dagba yo. Si du awere, aMoabo, ani ndú kagbuahe!”

²⁴Ono ho i ada ni ku rogo ga aYisaraere bataya, aYisaraere ki guari ka imo aMoabo, daho i aoro ni be yo. I ki nindu ku mbata yo ku ringara yo ki niimi aMoabo wa i andu kindi.

²⁵I ki kuadi abaakporo ku sande; aboro ni ba sa sa ki nibafu ambia ku auru wene mbudu sende dunduko, daho si adadi he ni dunduko. I ki kikisi agugaabi dunduko, ki dewe wene angua dunduko; daho kina ambia anye ni Kiraresete yo. Ono ababarioko ake pati he kirikiri, ki gbarasi he.

²⁶Ho bakindo aMoabo abi he ni ya vura fu ko ni kere he, ko ki rogo aboro basape fuo ko wa 700, i kua gbata sa bakindo aEdome; ono i arengba nga na ni te.

²⁷Ko ki di bambata wiriko nga gu ko ka azoga rago ku ba ko, ki tumo na ko ni zozo motumo auru ngapa bakporo. Bakere zinga ki du ku ri aYisaraere. I ki guari ti ko, ki karaga tiyo ku rogo gayo ringara.