Read zande 2 Abakindo 7 Bible Online

2 Abakindo 7 - zande bible

2 Abakindo 7

¹Ono Erisa ki ya, “Oni gi sangba Yekova: Ya Yekova wẽ, Gba ti saa wa gere i abága fufuru ngungo wa aritere 12 tipa sekere sa, na he wa mapunga wa aritere 24 na bebere he tipa sekere sa a, ngbadimo Somorona yo.”

²Gu barutirivura bakindo anasongoda tiko ku beko ki karaga ha fu ga Mbori kumba, ki ya, “Kina gu ka Yekova za ngbadimo ngbangbaturũ, si ka gi pai mangi ti ni re.” Ono Erisa ki ya fu ko, “Mo abi he ni kina bangiro, ono mo ari nga hate.”

³Were aboro ngbataka adu biama pati barima ti ngbadimo bakporo. I ki ya dagba yo wẽ, “Tipagine sungu ani ti ni erẽ daho ani ka kpika ni?

⁴Ka ani ya, Ani rimi ku bakporo yo, ngbongi kina bakporo yo, ani ki kpiki akpika yo a. Ka ani sungu erẽ kindi, ani akpíka akpika a. Si du oni ye awere, ani ndú ka fu tirani ku be rimbasavura nga ga aSurio. Ka i batasi rani ni ungarani, ani anyé ni ungarani. Ka i imi rani, ani ki kpiki a.”

⁵I ki guari nzinzii rago, ka ndu ku rogo ga aSurio bataya yo. Ho i ada ni ti bangbanda ga aSurio bataya, oni ngere, boro adu nga yo wa sa te.

⁶Bambiko Yekova aza tu gu rimbasavura nga ga aSurio i gi woro angbagidavura, na woro afarasi, wa kina bakere woro rimbasa aborosovura. I ki ya dagba yo wẽ, “Oni ngére, bakindo aYisaraere ngbe bakindo aEto, na agu abakindo nga ga aEzipeto yo, i ye kuti rani.”

⁷Si du i aguari ti ni nzinzii rago ka ora, ki mbu gayo abamburoko, na gayo afarasi, na gayo adongi, na aubataya a wa si adu, ki orosi kina ungayo.

⁸Ho agi aboro ngbataka re aye ni ku bangbanda bataya yo tuturu, i ki rimi ku rogo bamburoko sa, ki ri riahe ki mbiri ime, ki tindi feda yo, na dahabu, na aroko, ki ndu ka oka ha. I ki yega, ki rimi ku rogo kura bamburoko, ki tindi ahe yo berewe, ki ndu ka oka ha.

⁹I ki ya dagba yo, “Ani amanga nga ha nzunzu te. Areme nga rago wene pangbanga. Ono ka ani ongo aonga kii, ki sungu dati girarago, mbusa agbia rani. Si du oni yé awere, ani ndú tie ka gumba ha fu ga bakindo aborokporo.”

¹⁰Si du i aye ti ni Ki yambu babanda ngbadimo bakporo. I ki gumba ha fu ko, ki ya, “Ani nida ku rogo ga aSurio bataya yo, ono boro nadu nga yo wa sa te, fugo boro a te. Ono kina afarasi nidu ni vodivodi ra, na adongi ni vodivodi ra a, abamburoko ki du wa si adu.”

¹¹Babanda ngbadimo ki yambu he ku ari, i ki gumba ha fu ga bakindo aborokporo ku dimoyo.

¹²Bakindo ki guari yuru, ki ya fu gako amoyambu, “Mi nikayugo gu pai fu roni awere nga gu mangi aSurio kuti rani. I ini he ya ani du na bakere gomoro; si du kuru yo ti ni bataya yo ka gbu ku nvuo yo, niya, ‘Ho i ka kura ni bakporo yo, ani ki zi yo ni kina ungayo, ki rimi ku bakporo yo.’ ”

¹³Gako moyambu sa ki karaga ha ki ya fu ko, “Mi nakpara foro, mo idi he agu aboro ndu na afarasi bisue, dagba agu ra nye bakporo no, ami adú wa kina gu rimbasa aYisaraere naima kpika. Ani kédi nga asunge koyo ka bi nga ha.”

¹⁴Si du i andu na angbagidavura ti ni ue na afarasi. Bakindo ki kedi yo fuo rimbasavura nga ga aSurio, ki ya, “Oni ndú ka bi nga ha.”

¹⁵I ki ndu fuo yo daku Yaradene yo. Oni ngere, aroko na apere ki du bangiri gene dunduko, nga gu aSurio abafa ku sa yo wa i aora gburungagburunga. Asunge ki yega, ki gumba pa ha fu bakindo.

¹⁶Aboro ki kuru bakporo yo ki ndu ka gbu ahe rogo ga aSurio bataya yo. Si du i abagi fufuru ngungo ti ni wa aritere 12 tipa sekere sa, na he wa mapunga wa aritere 24 na beberehe tipa sekere sa a, kuti sangba Yekova.

¹⁷Bakindo ki asia pai fu gu barutirivura ko anasongoda tiko ku beko, ko nirugu pai ngbadimo bakporo yo. Aboro ki simbi ko ngbadimo bakporo yo, ko ki kpi a wa ga Mbori kumba agumba ha, nga gu ko nagumba pai ho bakindo aye ni koyo du ko ni.

¹⁸Bambiko wa ga Mbori kumba agumba ha fu bakindo, niya, “Zende he wa ga mapunga wa aritere 24 na bebere he tipa sekere sa, na fufuru ngungo wa aritere 12 tipa sekere sa adú gba ti saa wa gere ngbadimo bakporo Somorona yo,”

¹⁹gu barutirivura re akaraga ha ki ya fu ga Mbori kumba, “Mo ngére, kina gu ka Yekova za ngbadimo ngbangbaturũ, si ka gi pai mangi ti ni re.” Erisa ki ya, “Mo abi he ni kina bangiro, ono mo ari nga ha te.”

²⁰Si ki mangi kina wo fu ko; bambiko aboro asimbi ko ngbadimo bakporo yo, ko ki kpi.