Read zande 2 Abakindo 9 Bible Online

2 Abakindo 9 - zande bible

2 Abakindo 9

¹Gu nebi nangia Erisa ki yambu wiri nebi sa dagba awiri anebi, ki ya fu ko, “Mo tápa ga roko ku dimoro, ki di gi ndukura nzeme re ku be ro, ka ndu ku Ramota-girada yo.

²Ho mo ka da ni yo, mo ki ngere yo tipa Yeu wiri Yosafata nangia wiri Nimisi. Mo ki rimi fuo ko, ki ya ko guari dagba awirinako, mo ki ndu na ko ku rogo kura vuru bambu.

³Mo ki di gu ndukura nzeme re, ki uka ha ku ri ko yo, ki ya, ‘Ya Yekova wẽ, Mi mbedi ro mo du ni bakindo ku ri aYisaraere.’ Mo ki uru ngbadimo, ki oro, ka mo aima nga ku ho ya.”

⁴Si du gu paranga nebi re ki ndu ku Ramota-girada yo.

⁵Ho ko ada ni, mo ngére, abarutiri rimbasa aborosovura avo gbuu. Ko ki ya, “Ako barutirivura, mi na pai ngbare ka gumba ha foro.” Yeu ki ya, “Fu gini ni dagba rani?” Ko ki ya, “Ako barutirivura; fu kina ro.”

⁶Ko ki guari, ki rimi ku dimo yo. Gu paranga re ki uka nzeme ku ri ko yo, ki ya fu ko, “Ya Yekova nga ga aYisaraere Mbori wẽ, mi mbedi ro mo du ni bakindo ku ri ga Yekova aboro, nga aYisaraere.

⁷Mo amánga ngbatunga Aba nga bairaro, ya mi iri bape kure gimi amoyambu nga anebi, na kure agu amoyambu dunduko nga ga Yekova yo, kuti Izebere.

⁸Bambiko ngbatunga Aba akpí akpi du. Mi anyása akumba dunduko be Aba, na gu ni du ni zogozogo ni na gu ni nara ni rini Yisaraere no a.

⁹Mi asá gu ngbatunga nga ga Aba wa ngbatunga Yerobama nangia wiri Nebata, wa ngbatunga Basa nangia wiri Aiya a.

¹⁰Aango nikari Izebere Yizerere yo, boro adú nga yo nikakpisida ri te.” Gu paranga re ki uru ngbadimo, ki oro.

¹¹Ho Yeu aye ni koyo du ga bairako amoyambu ni, i ki ya fu ko, “Pa zereda du? Tipagine gi irazanga niye ti ni re kono du mo ni?” Ko ki ya fu yo, “Oni ini gu kumba re tigaoni na gu pai gumba ko.”

¹²I ki ya, “Zire du; mo gúmba ha fu rani awere.” Ko ki ya fu yo, “Ko nipe he fere were na were, ki ya, ‘Ya Yekova wẽ, Mi mbedi ro mo du ni bakindo ku ri aYisaraere.’ ”

¹³Aboro ni ba sa sa ki ipisi tiyo, ki nidi gayo roko, ki nimoi he ku tii yo yo ri babita, ki ta vuda anambongo, niya, “Yeu nga bakindo.”

¹⁴Si du Yeu wiri Yosafata nangia wiri Nimisi ki ta bura kuti Yorama. Were Yorama abanda Ramota-girada, ko na aYisaraere dunduko, tipa pa Azaere bakindo aSurio.

¹⁵Ono Bakindo Yorama akaraga tiko i husi ko Yizerere yo be gu oro aSurio ahogi ko na ni, ho ko aso vura ni na Azaere bakindo aSurio. Yeu ki ya, “Ka ngia gaoni berã nga gere, ka boro kúru nga sa bakporo yo ki merẽ, ka ndu ka gumba ha Yizerere yo ya.”

¹⁶Si du Yeu andu ti ni rogo ngbagidavura, ki da ku Yizerere yo; bambiko yo Yorama araka ni. Ono Azaya nangia bakindo aYudo aye ka bi Yorama.

¹⁷Were babandarago aru ti ngbaho kirikiri gbata Yizerere yo, ko ki bi ga Yeu rikavura wa ko aye. Ko ki ya, “Mi bi rikaaboro.” Yorama ki ya, “Mo di bandurifarasi sa, ki kedi ni ni ndu ka gbia yo, ki ya, ‘Pa zereda du?’ ”

¹⁸Si du boro ki oro ri farasi ka gbia ko, ki ya, “Ya bakindo wẽ, ‘Pa zereda du?’ ” Yeu ki ya “Gini pa zereda du na mo? Mo kúru ku gii re yo, ki nipe re.” Babandarago ki gumba pai, ki ya, “Bandusunge ima da koyo du yo ni, ono ko ayega nga te.”

¹⁹Ko ki kedi ue boro ri farasi, ni ki da kóyo du yo ni, ki ya, “Ya bakindo wẽ, ‘Pa zereda du?’” Yeu ki karaga ha ki ya, “Gini pa zereda du na mo? mo kúru ku gii re yo, ki nipe re.”

²⁰Babandarago ki gumba ha, ki ya, “Ko ima da koyo du yo ni a, ko ayega nga a te. Ono nduge gu boro re wiri kina nduge Yeu wiri Nimisi; bambiko ko nandu andu gbamagbama.”

²¹Yorama ki ya, “Oni mbakadi afarasi ngbagidavura.” I ki mbakadi gako ngbagidavura. AYorama bakindo aYisaraere ki kuru na Azaya bakindo aYudo, i ni ba sa sa rogo gayo ngbagidavura. I ki kuru ka ndu ka gbia Yeu, ki bi ko ati ku Nabota yo boro Yizerere.

²²Si ki ta du wa gere, ho Yorama abi Yeu ni, ko ki ya, “Pa zereda du, Yeu?” Ko ki karaga ha ki ya, “Gini pa zereda ka du wa ga namo pa bari ange ange kindi nga Izebere na gari pa soroka a?”

²³Yorama ki zigba ki oro, ki ya fu Azaya, “Ako Azaya pa kere biriki du!”

²⁴Yeu ki gbe gako mboto na omeko du, ki no Yorama dagba kpurungabeko, guanza ki rimi ki no bagundako, ko ki ti ku vuru ngbagidavura yo.

²⁵Yeu ki ya fu Bidikara gako barutirivura, “Mo di ko ki ba ko ku ati ku Nabota yo boro Yizerere; bambiko mo tíngidi pa gu rago ani aoro na mo wa sa fuo Aba nangia bako, Yekova amoi gi pa rungo re ku ri Aba;

²⁶nga, ‘Ni rengo wa mi abi kure Nabota gba, na kure awiriko wo poi Yekova Mi aíra bape Nabota ti ro rogo gu ati re.’ Awere mo di ko ki ba ko ku ati yo, wa Yekova agumba ha.”

²⁷Ono ho Azaya nangia bakindo aYudo abi gi pai ni re, ko ki oro ngba gene pati bambu ati. Yeu ki nipe ko kindi, ki ya, “Mo no ko a.” I ki no ko ku vuru ngbagidavura yo pati babita ku Gura yo, nga gu du pati Yiberama. Ko ki oro ku Megido yo, ki kpi yo.

²⁸Gako amoyambu ki tindi ko rogo ngbagidavura ku Yerusarema yo, ki kpisidi ko rogo gako murã fuo atitako rogo gu bakporo nga ga Dawidi.

²⁹Ti gu 11 garã zogarago nga ga Yorama nangia wiri Aba, Azaya atona zoga aYudo.

³⁰Ho Yeu aye ni ku Yizerere yo, Izebere ki gi pa ko. Ri kí mbedi bangiriri ni arangi ki fongo mangeriri, ki ningere ti bangiri bambu.

³¹Wa Yeu arima ti ngbadimo bakporo yo, ri ki ya, “Pa zereda du, mo boro Zimiri, naimi bairaro?”

³²Kokituka bangiriko kuti bangiri bambu yo, ki bi ri, ki ya, “Da nga gimi ni? Da?” Avuru Izebere ki ningere koyo du ko ni ue watadu biata.

³³Ko ki ya, “Oni bá ri ku sende no.” Si du i ki ba ri ku sende yo. Gu kureri ki gbadi kuti vuro bambu, na ku auru afarasi. Wa Yeu andu ami ki nisimbi ri ni ndura.

³⁴Ko ki rimi ku dimo yo, ki niri riahe ki nimbiri he. Ko ki ya, “Oni ndú ki bi gi tiwatiwa de re, ki kpisidi ri; bambiko wiri bakindo nga ri.”

³⁵I ki ndu ka kpisida ri, ka i abi nga kura he ti ri ya kina memeriri, na akpetenduri, na akpataberi.

³⁶Si du i aye ti ni berewe, ki gumba ha fu Yeu. Ko ki ya, “Gere nga sangba Yekova, nga gu pai ko agumba ku ngba gako moyambu nangia Eriya boro Tesebe, ki ya, ‘Rogo gu ati du Yizerere yo yo aango ka rita pasio Izebere ni.

³⁷Kangba Izebere adú wa kina mirĩhe ati yo du Yizerere yo. Si du i ayá nga ti ni, Izebere du re, te.’ ”