Read zande 1 Pekapai 10 Bible Online

1 Pekapai 10 - zande bible

1 Pekapai 10

¹Were aFereseto ki so vura kuti aYisaraere; aboro aYisaraere ki oro be aFereseto, ki tiwi ki kpiki Bagangara Giriboa yo.

²AFereseto ki nido fuo Saura na awiriko nyanyaki; aFereseto ki imi aYonatana, Abinadaba na Marekisua, nangia awiri Saura.

³Vura ki nindu ni kere he na Saura, abaaguanza ki gbia ko; ko ki ho be yo gbegberẽ.

⁴Saura ki ya fu gako batindi uvura, “Mo mo ga basape, ki rú re na ni puu, agi azangayeratise re ka ye ka wasi re.” Ono gako batindi úvura aida nga ha te; bambiko ko adu na kere gunde. Si du Saura ki mo gako basape, ki ti ngba ha.

⁵Ho gako batindi úvura abi he ni ya Saura kpi, ko ki ti a tigako ngba gako basape, ki kpi.

⁶Si du Saura ki kpi; awiriko biata na angbatungako ki kpiki akpika na ko dunduko a.

⁷Ho agu aboro aYisaraere naadu ngboongboorago yo abi he ni ya aYisaraere oro, Saura kpi na awiriko a, i ki mbu gayo abaakporo ki oro; aFereseto ki yega ki nye rogo ho.

⁸Si ki ta du wa gere, ho aFereseto aye ni wiso ka gbu ahe ti kangba aboro, i ki bi kangba Saura na kangba awiriko si piki Bagangara Giriboa yo.

⁹I ki uru ahe ti ko ki kati riko ki di gako úvura, ki kedi pai ku ringara aFereseto yo kirikiri, ka gumba gu pangbanga re fu gayo kpiaahe na fu aboro a.

¹⁰I ki moi gako úvura ku rogo gu bambu nga ga gayo ambori, ki banga riko rogo ga Dagona bambu yo.

¹¹Ono ho aboro Yabesa-girada agi agu apai re ni dunduko aFereseto amangi Saura na ni,

¹²ngangarã aboro dunduko ki guari, ki di kangba Saura ku sa yo na kangba awiriko, ki ye na ni ku Yabesa yo. I ki kpisidi amemeyo tii gu gero naadu Yabesa yo, ki gina riahe tipa rame saba.

¹³Si du Saura akpi ti ni tipa gako tindika nga gu ko amangi kuti Yekova, bambiko wa ko aka nga kuti ga Yekova pai ya, na gu pai nga ko asana boro gumba sangbaatoro tipa pai,

¹⁴ka ko asana nga Yekova ya. Si du Yekova aimi ko ti ni, ka fu ngbi fu Dawidi wiri Yisai.