Read zande 1 Pekapai 11 Bible Online

1 Pekapai 11 - zande bible

1 Pekapai 11

¹AYisaraere ki dungura tiyo dunduko koyo du Dawidi ni ku Eburone yo, niya, “Mo ngere, Ani nga memero na pasioro.

²Bakuru yo, zavura ho Saura adu ni ni bakindo vuru, mo nangia gu ko naangbe fu aYisaraere ku mbata yo ki niyega na yo a. Yekova ga Mbori ki ya foro, ‘Mo nikariga gimi aboro aYisaraere, mo ki du ni bazogo ku ri gimi aboro aYisaraere.’ ”

³Si du ga aYisaraere abaakumba aye ti ni dunduko koyo du bakindo ni ku Eburone yo; Dawidi ki mangi mozunga na yo Eburone yo ku bara bangiri Yekova, i ki mbedi Dawidi ni bakindo ni nzeme ku ri aYisaraere kuti sangba Yekova ku ngba Samuere.

⁴Dawidi ki ndu ku Yerusarema yo na aYisaraere dunduko, kura rimoho nga Yebusa, aYebuso nangia agu aboro naaraka rogo gu ringara re, i adu yo a.

⁵Agu aboro naaraka Yebusa yo ki ya fu Dawidi, “Mo aye nga kono te.” Ono Dawidi adi gu nyanyaki gbata nga Siona, kina ha nga ga Dawidi bakporo.

⁶Dawidi ki ya, “Gu boro nikagbarasa aYebuso mbata, ni adu ni barumbatayo ni barutirivura a.” Yoaba nangia wiri Seruya ki ndu mbata, si du Dawidi ki moi ko ni barumbatayo.

⁷Dawidi ki niraki rogo gu nyanyaki gbata re; si du i ayambu he ti ni ga Dawidi bakporo.

⁸Ko ki dua bakporo pati he kirikiri tona Miro yo pati he kirikiri a. Yoaba ki mbakadi gu kura abambu naadu bakporo yo.

⁹Pa Dawidi ki ninyaki anyaka ki susi, bambiko Yekova nga ga arimbasa Ko adu na ko.

¹⁰Gere nga rimo agu yo nangia abarumbatayo fu agu airanyaka nangia ga Dawidi yo, naadu ni nyanyaki aboro na ko rogo gako ngbi, wa sa na aYisaraere dunduko, ka sa ko ni bakindo, ku sangba ga Yekova pai yo tipa aYisaraere.

¹¹Gedigedi agu airanyaka re du re nga agu yo nangia ga Dawidi yo: Yasobama nangia wiri boro Akemoni, nangia barumbatayo fu agu aboro 30 re, ko adi gako baso kuti aboro 300 ki imi yo ni kina gu uru sa.

¹²Fuo ko Erazara ki du nangia wiri Dodo, boro Awoa, naadu dagba agu airanyaka yo naadu biata.

¹³Ko adu na Dawidi Pasa-damima yo yo aFereseto adungura tiyo ku ho ni ka so vura. Dagba rago adu yo, he wa mapunga arengbe arengba na ni dú, aboro ki oro be aFereseto.

¹⁴I ki ru kina bebere gu dagba rago re, ka banda ha, ki imi aFereseto; Yekova ki batasi yo na bakere diabese.

¹⁵Abaakumba biata dagba agu abaakumba 30 ki zorõ ki ndu koyo du Dawidi ni ri mbia yo ku rogo gu simbia nga Adurama, rikavura aFereseto ki zi bataya rogo gu ngboongbooragodu Refaimayo.

¹⁶Dawidi ki du kina rogo nyanyaki ba; gu gbata abanzengere nga ga aFereseto ki du Beterereme yo.

¹⁷Dawidi ki nikpi nyemu ime, ki ya, “Ako ka boro fu gu ime fere mi mbiri he nga ga guga Betereme nga gu du pa ngbadimo bakporo!”

¹⁸Si du agu airanyaka biata re ki gbiriwo rogo ga aFereseto rimbasa, ki gbe ime rogo guga Betereme nga gu naadu pangbadimo bakporo, ki di he, ki ye na ni fu Dawidi. Ono Dawidi akpi nga nyemu ka mbira ha te; ko ki uka ha fu kina Yekova.

¹⁹Ko ki ya, “Gi Mbori aza re ti ni ya ka mi mangi nga gere ya. Mi mbiri kure agu aboro fu ungayo ku ngba Dai yo? Bambiko i niye na ni nifu ungayo ku ngba pai yo.” Si du ko ambira nga ha ti ni ya. Agu apai re agu airanyaka biata re amangi he.

²⁰Abisai unvurua Yoaba, ko adu ni barumbatayo fu agu yo naadu biata. Ko ki di gako baso kuti aboro 300 ki imi yo du, ki du na worimo dagba agu yo naadu biata.

²¹Dagba yo biata, ko adu ni irisiirisi boro ki susi agu yo, si du i asa ko ti ni ni gavo barutirivura; ono ko arengba nga na gu bambata yo naadu biata te.

²²Benaya wiri Y oyada adu ni eeré kumba nangia boro Kabasere, namangi baiiriwo apai; ko aimi agu airanyaka ue nga ga aMoabo yo. Boro ko andu a ki imi bahu due yo rago kere zere.

²³Ko aimi boro Ezipeta, naadu ni bagbanga kumba, basonako adu wa bagiza mbiribe bisue. Baso adu be gu boro Ezipeta re wa ga abaturoko ngbongbo; Benaya ki ndu sa ko na kina ngbondo, Ko ki gbe baso be boro Ezipeta ki imi ko na kina gako baso.

²⁴Agi apai re Benaya wiri Yovada amangi, ki du na worimo dagba agu airanyaka biata.

²⁵Ko adu ni irisiirisi boro ki susi dagba agu yo naadu 30, ono ko arengba nga na gu bambata yo naadu biata te. Dawidi ki moi ko ku ri ababandako.

²⁶Agu airanyaka nangia ga rimbasa aborovura yo angia Asaere tame Yoaba, na Erenana wiri Dodo boro Betereme,

²⁷na Samota boro Aroda, na Erese boro Perone;

²⁸na Ira wiri Iseke boro Tekua, na Abiezere boro Anatota,

²⁹na Sibekai boro Usa, na Irai boro Awoa,

³⁰na Marai boro Netofa, na Erede wiri Bana boro Netofa,

³¹na Itai wiri Ribai boro Giba dagba ngbatunga Benyamina yo, na Benaya boro Piratona,

³²na Urai nga boro gu ringara wiriadi du Gasa yo, na Abiere boro Aruba,

³³na Azemaveta boro Baruma, na Eriaba boro Sarebona,

³⁴na Asema boro Gizona, na Yonatana wiri Sage boro Arara,

³⁵na Aiyama wiri Sakara boro Arara, na Erifara wiri Ura,

³⁶na Erefere boro Mekera, na Aiya boro Perone,

³⁷na Ezero boro Karumera, na Narai wiri Ezebai,

³⁸na Yoere wirina Natana, na Mibara wiri Agari,

³⁹na Sereke boro Amona, na Narai boro Berota, nangia ga Yoaba batindi úvura nangia wiri Seruya,

⁴⁰na Ira boro Yetere, na Gareba boro Yetere a,

⁴¹na Uria boro Ito, na Zabada wiri Arai,

⁴²na Adina wiri Siza boro Rubena, naaru ku ri aboro Rubena, na aboro 30 fuo ko,

⁴³Anana wiri Maka, na Yosafata boro Metene,

⁴⁴Uzia boro Aseterata, Sama na Yiere awiri Otama boro Aroere,

⁴⁵Yediyaere wiri Simeri, na Yoa nangia tameko, boro Tisi,

⁴⁶Eriere boro Mau, na Yeribai, na Yosavaya, nangia awiri Erenama, na Yitema boro Moaba,

⁴⁷Eriere, na Obede, na Yasiere boro Mesoba.