Read zande 1 Pekapai 12 Bible Online

1 Pekapai 12 - zande bible

1 Pekapai 12

¹Agi akumba re naye koyo du Dawidi ni ku Zikeraga yo, ho ko arengba nga ni ka ta mbiko Saura wiri Kisi ya. I adu dagba airanyaka yo ni gako amounda rago sovura.

²I azadi ũvura nangia amboto be yo, i aim pa ba aguanza ti mboio na pa ba barioko mbia na kumbabeyo na garebeyo a. I adu ni agume Saura, ni ngbatunga Benyamina.

³Aiyezerenaadu ni barumbatayo fu yo. Yoasa ki du fuo ko, i nangia awm Serna boro Giba; na Yeziere na Perete awiri Azamaveta; na Beraka, na Yeu boro Anatota,

⁴na Yisemaya boro Gibona, naadu ni iranyaka dagba agu yo 30 re ki du ku ri yo a; na Yeremaya, na Yaziere, na Yoanana, na Yozabada boro Gedera,

⁵na Eruzai, na Yerimota, na Bareya, na Semuraya na Sefataya boro Arufa:

⁶na Erekana na Yisiya, na Azarere, na Yoezere, na Yasobama, nangia ngbatunga Kora:

⁷na Yoera na Zebadaya, nangia awiri Yeroama boro Gedora.

⁸Agu yo daaba ngbatunga Gada ki kpara tiyo yo fu Dawidi ku rogo gu nyanyaki ba naadu ngbakungba yo, nangia airanyaka ni ngangara aboro, rengbe na pa sovura, nangia agu yo rengbe ka tuka bakiku vurakube na baso a, kpakpuyo adu wa kina ga abahu, i andu ni ipiipi yo wa kina agbangbaria ri abaagangara.

⁹Ezere angia bambata yo, Obadaya ni ue yo. Eriaba ni biata yo,

¹⁰Misemana ni biama yo. Yeremaya ni bisue yo,

¹¹Atai ni sita yo. Eriere ni saba yo.

¹²Yoanana ni muambi yo. Erezabada ni ribua yo

¹³Yeremaya ni bawe yo, Makebanai ni 11 yo.

¹⁴Agi yo re nangia ngbatunga Gada i du ni abarutiri rimbasa aborovura, gu ni naadu ni umba ni ni arengbe ka du ku ri aboro 100, na gu ni naadu ni kangará ni ki susi ni arengbe ka du ku ri aboro 1,000.

¹⁵Agi akumba re nangia agu yo naasi Yaradene ku mbiti yo rogo bambata diwi, ho si afu afu ni du ri gango ho, i ki do agu yo du nangia ga angboongboorago yo, ku uroyo na ku dioyo a.

¹⁶Agu yo dagba ngbatunga Benyamina yo ki ye koyo du Dawidi ni na agu aYudo ku rogo gu nyanyaki ba.

¹⁷Dawidi ki ndu ka ngbisa yo ki karaga pai ki ya fu yo, “Ka si du wa oni naye na zereda kono du mi ni ka unda re, ngbadurani adu wa sa na oni; ono ka si du wa oni naye ka kusa re fu avurare, wa mi amanga nga pa zuu ya, ga abarani Mbori wisigi he ki za roni.”

¹⁸Toro ki ye ku ri Amasai, naadu ni barumbatayo fu agu yo naadu 30, ko ki ya, “Ako Dawidi, gamo yo nga ani; Ako wiri Yisai, ani du na mo! Zereda, zereda du foro, na zereda fu gamo amounda! Bambiko ga Mbori naunda ro.” Dawidi ki di yo ku gume, ki moi yo ni abarutiri arikavura.

¹⁹Agi yo dagba ga Manase yo ayara koyo du Dawidi ni ho ko aye ni na aFereseto ka so vura kuti Saura. Ono Dawidi aunda nga yo te, bambiko agbia aFereseto akaraga Dawidi ku sa yo, ku sangba gayo rugapai yo, niya, “Ko ka sa tiko koyo du bairako ni berewe nga Saura ani ki du ngbapai yo be ko.”

²⁰Wa Dawidi andu ku Zikeraga yo agi yo re dagba ngbatunga Manase ki sa tiyo fuo ko: nga Adena, na Yozabada, na Yediyaere, na Mikaere, na Yozabada, na Eriyu na Siretai, nangia abarutirivura nga ga akutu yo dagba ngbatunga Manase

²¹I ki unda Dawidi kuti gu rikavura nangia ga abagbuahe: bambiko i adu dunduko ni airanyaka ni ngangara aboro, ki du ni abarutiri rimbasa aborovura.

²²Bambikoaboro anaye koyo du Dawidi ni na uru ka unda ko, daho i ada ni ni bakere rimbasa aboro, wa kina gu rimbasa aboro nga ga Mbori.

²³Gedigedi agu yo naadu ku ri yo du re, naavodi tiyo tipa sovura, naaye koyo du Dawidi ni ku Eburone yo, ka sa gu ngbi nga ga Saura fu ko, kuti sangba Yekova.

²⁴Aboro Yuda nangia agu yo natindi bakikii vurakube na baso i adu wa aboro 6,800 naavodi tiyo tipa sovura.

²⁵Dagba aboro Simona yo, airanyaka ni ngangarã aboro tipa sovura, adu wa 7,100.

²⁶Dagba aRevi yoiaduwa aboro 4,600.

²⁷Yoyada ki ngia barumbatayo fu ngbatunga Arona, na agu yo naadu na ko i adu wa aboro 3,700.

²⁸Sadoka a, nangia paranga ni iranyaka ni ngangarã boro, na abarutirivura dagba rika ngbatunga bako yo wa aboro 22.

²⁹Dagba ngbatunga Benyamina yo, nangia agume Saura, i adu wa aboro 3,000, bambiko ka da ti gu arago re badungu yo ara fu kina rika ngbatunga Saura kindi.

³⁰Dagba ngbatunga Efuraima yo i adu wa aboro 20,800, ni airanyaka ni ngangarã aboro, ni abaworimo dagba rika ngbatunga abayo yo.

³¹Dagba gu bebere ngbatunga Manase yo i adu wa aboro 18,000 nangia agu yo i akusi payo ti rimoyo i ye ka maa Dawidi ni bakindo.

³²Dagba ngbatunga Yisasakara yo, agu aboro naarugu tiyo na pa rago apai, ka ina gu pai rengbe aYisaraere ka manga ha i adu wa abarutiripai 200; awirinayo dunduko anagia kina sangbayo.

³³Ga Zeburuna yo i adu wa aboro 50,000 nangia agu yo narengbe na kura ni rimbasa yo ka re vura, na angbatunga auvura dunduko, i angia nga aboro berã pai ue te.

³⁴Ga Nafatari yo adu wa abarutirivura 1,000, na agu yo naadu na yo na bakikii vurakube na baso i adu wa aboro 37,000.

³⁵Ga Dana yo nangia agu yo narengbe ka re vura i adu wa aboro 28,600.

³⁶Ga Asera yo nangia agu yo narengbe ka kura ni rimbasa yo ka re vura i adu wa 40,000.

³⁷Pavuru Yaradene ku mbiti yo dagba ngbatunga Rubena yo, na ngbatunga Gada na gu bebere ngbatunga Manase i aye wa aboro 120,000, nangia agu yo naadu na angbatunga auvura dunduko be yo tipa sovura.

³⁸Agi yo dunduko re naadu ni abasovura, naavodi tiyo na úvura, i aye na ziazia kpotoyo yo ku Eburone yo, ka maa Dawidi ni bakindo ku ri aYisaraere dunduko; kura aboro aYisaraere dunduko adu na kpotoyo yo kina ku bani sa ka maa Dawidi ni bakindo.

³⁹I ki sungu na Dawidi uru ki du biata, ki niri riahe ki nimbiri he, bambiko awirinayo aima mbakada pai tipa yo.

⁴⁰Ku ri agi apai re agu yo naadu mbembedi na yo, dati ringara Yisasakara na ga Zeburuna na ga Nafatari, i aye na riahe ri anaadongi na ri akameri na ri abaadongi na ri abaabagara, na ungba kpaima nga ga ngungo, na ugu vurumo, ni mekemeke he, na kpura ugu rindikakue, na imekakue, na nzeme, na abaabagara, na akandoro; bambiko ngbarago adu Yisaraere yo.