Read zande 1 Pekapai 13 Bible Online

1 Pekapai 13 - zande bible

1 Pekapai 13

¹Dawidi ki fura na abarutivura nga ga akutu yo na ga akama yo, na abarumbatayo dunduko a.

²Dawidi ki ya fu gbuu aYisaraere dunduko, “Ka si ngba ti roni, na ka si du nga gu pai nga Yekova gaani Mbori idi he, ani kedi pai fu awirinarani i dungura tiyo kono du ani ni nga agu yo nanye rogo ringara Yisaraere yo dunduko, fu aboromotumo na aRevi du na yo rogo gayo abaakporo du ringara abanambu pati he.

³Ani ki ye na ga gaani Mbori sanduki kono du ani ni berewe; bambiko ani ambu pa sanahe pati he rago Saura.”

⁴Gbuu yo ki idi he dunduko ya i amanga ha wo, bambiko gu pai re adu ni ruru he bangiri aboro dunduko.

⁵Si du Dawidi ki dungura gbuu aYisaraere dunduko tona Siora yo Ezipeta yo ki da ti barima ku Amata yo, i yega na ga Mbori sanduki Kiriyata-yarima yo.

⁶Dawidi ki ndu na aYisaraere dunduko ku Bara yo, du kura rimoho nga Kiriyatayarima, nga gu bakporo nga ga Yuda, ka yega na ga Mbori sanduki yo, i ayambu rimoho ti rimo Yekova nasunga ri akeruba.

⁷I ki tindi ga Mbori sanduki auru vovo ngbagida, ki kusi he tii ga Abinadaba bambu yo, Uza na Ayo ki nirugu ngbagida.

⁸Dawidi na aYisaraere dunduko ki ningi bara bangiri Mbori na omeyo du; ki nibi abia a ki nitaki anzenze na akindondo na agaza ki niwo ti gu sirigi napaa apaa ki nivudi ambanya.

⁹Ho i ada ni ti bataka zende ahe Kidona yo, Uza ki taĩ beko ka zada sanduki, bambiko abaabagara akotoko.

¹⁰Ga Yekova zinga ki rungudi kuti Uza; ko ki imi ko bambiko ko ataĩ beko sa sanduki; ko ki kpi kina ho bara bangiri Mbori.

¹¹Si ki gbere ti Dawidi gbe wa ga Yekova zinga ati ku ri Uza; ko ki yambu rimo gu ba re nga Perese-uza daku areme.

¹²Dawidi agunde ti Yekova ni gu uru re, ko ki ya, “Mi awira pa da waĩ na ga Mbori sanduki ku kpure yo?”

¹³Si du ka Dawidi aga nga na sanauki ku rogo gako bakporo yo ya, ono ko ki tindi he ki aria ha ku tii ga Obedeedome bambu yo nangia boro Gata.

¹⁴Ga Mbori sanduki ki sungu ku be ga Obedeedome aborokporo tii gako bambu yo tipa diwi biata. Yekova ki fu maku fu ga Obedeedome aborokporo dunduko na ku ri gako ahe dunduko.