Read zande 1 Pekapai 14 Bible Online

1 Pekapai 14 - zande bible

1 Pekapai 14

¹Irama nangia bakindo Tura ki kedi asunge koyo du Dawidi ni, na angua kedara, na abasekembia na abasekengua ka dua bambu fu ko.

²Dawidi ki ini he ya Yekova nyakasi pa ko ni bakindo ku ri aYisaraere, bambiko gako ngbi adu ni kiisikiisi pa ha mbiko pa gako aboro nga aYisaraere.

³Dawidi ki rogo kura ade Yerusarema yo ni adiako, Dawidi ki batika kura akumba gude na adegude.

⁴Rimo agu agude ko abatika yo Yerusarema yo du re: Samua, Sobaba, Natana, Soromo,

⁵Yibara, Erisua, Erepete,

⁶Noga, Nefege, Yapiya,

⁷Erisama, Berayada, na Eriferete.

⁸Ho aFereseto agi he ni ya i mbedi Dawidi ni bakindo ku ri aYisaraere dunduko, aFereseto dunduko ki ndu ka gbata Dawidi; ono Dawidi ki gi he ki ndu fuo yo.

⁹Were aFereseto aye ki zuba pai rogo gu ngboongboorago Refaima yo.

¹⁰Dawidi ki sana Mbori, ki ya, “Mi ndú sa aFereseto? Mo afu yo ku be re?” Yekova ki ya fu ko, “Mo ndú; mi afu yo afu ku be ro.”

¹¹Si du ko ki ye ku Bara-perazima yo, Dawidi ki di be yo yo. Dawidi ki ya, “Mbori kuru sa avurare ki mangi yo ni kina bere, wa baime nasipa gango ho.” Si du i ayambu rimo gu ba ti ni re nga Bara-perazima.

¹²AFereseto ki mbu gayo ambori kina ho, Dawidi ki fu rugute, i ki zo ho.

¹³AFereseto azuba pai berewe kina rogo gu ngboongboorago re.

¹⁴Dawidi ki sana Mbori berewe. Mbori ki ya fu ko. “Ka mo ndu nga fuo yo ya. Mo karaga tiro fuo yo yo, ki ye sa yo wa du agu angua nga barasama.

¹⁵Si adu wa gere, ho mo ka gia woro nduge ni dagba angua barasama yo, mo ki kuru ka so vura; bambiko Mbori kuru ku mbata yo foro ka manga gu rimbasa nga ga aFereseto.”

¹⁶Dawidi ki mangi he wa Mbori arugu ko na ni, i ki mangi gu rimbasa nga ga aFereseto tona Gibona yo ki da ku Gezere yo.

¹⁷Rimo Dawidi ki wo awo rogo aringara dunduko, Yekova ki moi gunde Dawidi ku kpoto rika angbatunga aboro yo dunduko.