Read zande 1 Pekapai 16 Bible Online

1 Pekapai 16 - zande bible

1 Pekapai 16

¹I ki rimisi ga Mbori sanduki, ki moi he ku rogo gu bamburoko Dawidi adua tipa ha. I ki fu gu zozo amotumo na amotumo zereda bara bangiri Mbori.

²Ho Dawidi anyasi tumo ni zozo amotumo ni na amotumo zereda, ko ki fu maku fu aboro ti rimo Yekova,

³ko ki gamu udiudi kpokuta ni ba sa sa fu aboro aYisaraere dunduko, nga akumba na ade a, na bete pasio, na kpura ugu rindi bakakue.

⁴Ko ki ringbisi agu aRevi a i nimangi pa Yekova barangba sanduki nga ga Yekova, ka atingida pa apai na ka fu irisa fu Yekova na ka tambua ko nga ga aYisaraere Mbori.

⁵Asafa angia gayo barumbatayo, Zekaraya ki du ni ue yo, na Yiere na Semiramota, na Yiere, na Matitaya, na Eriaba, na Benaya, na Obede-edome, na Yiere, i naadu ni abataki akindondo na anzenze, Asafa ki du na gu sirigi napaa apaa ku ari,

⁶Benaya na Yaziere nangia aboromotumo ki nivudi ambanya kindi, barangba sanduki ga Mbori mokido.

⁷Ti gu uru re Dawidi arugu pa bi bia tambuahe fu Yekova ni bambata ha ku be Asafa na awirinako.

⁸Ako oni fu atambuahe fu Yekova, oni kpári ti rimoko, Oni yugu pa gako mangaapai dagba aboro!

⁹Oni bíki bia fu ko, oni bíki abia tambuahe fu ko, oni gumba pa gako iiriwo mangaapai!

¹⁰Oni sambua tironi rogo kparakpara ziazia rimoko; kpoto agu yo yo ningi angi nagbata Yekova!

¹¹Oni gbata Yekova na gako ome, oni gbáta kpakpuko waragoagira!

¹²Oni tíngidi pa gako iiriwo mangaa pai nga gu ko amangi, na gako iiriwo yuguyugu apai, na agu asaraangbanga naadu ngbako,

¹³Ako oni nga awiri aYisaraere nangia gako moyambu, oni nga awiri Yakoba, gako siasia yo!

¹⁴Ko nga Yekova gaani Mbori; gako asaraangbanga du rogo kpotosende dunduko.

¹⁵Oni tíngidi pa gako zungahe nye anye kindi, gu pai ko arugu he fu arika ngbatunga aboro wa 1,000;

¹⁶nga gu mokido ko afu fu Abara yama, na gako zungahe fu Yisaka,

¹⁷kina ha ko anyakasi fu Yakoba tipa rugapai, na fu aYisaraere ni nyenye zungahe,

¹⁸niya, “Mi afu ringara Kanana foro, ni kparakpara ha ni gaoni.”

¹⁹Ho i adu ni ni kina bete aboro, ni umba pa yo gbe, ni tata aboro rogo ho,

²⁰ki niyara dagba gu rikaaboro na gu rikaaboro, rogo gu ngbi ku dagba gu kura aboro,

²¹ko aida nga fu gu boro ni mangi yo gbegberẽ wa sa te; ko aza abakindo tipa yo,

²²niya, “Ka oni zádi nga gimi mbedimbedi yo ya, Ka oni mangi nga gimi anebi gbigbita a ya!”

²³Oni bíki bia fu Yekova, zegino dunduko! Oni yugu pa gako bata uru na auru.

²⁴Oni táki pande pa gako taarimo dagba arikaaboro, na pa gako iiriwo mangaapai dagba aboro dunduko!

²⁵Bambiko Yekova nga bahe, rengbe na tambua ko bakere gbe, i ka agunde ti ko susi ambori dunduko.

²⁶Bambiko ga aboro ambori dunduko nga kina kungba ahe; ono Yekova namangi angbangbaturũ,

²⁷Irisa du bara bangiriko na bairiwo; ome du rogo gako ba na ngbarago.

²⁸Oni fu taarimo fu Yekova na ome, oni fu he fu Yekova, oni nga angbatunga aboro!

²⁹Oni fu taarimo fu Yekova a wa rengbe he na rimoko; oni yé na ruhe, ki ye ku bara bangiriko! Oni írisi Yekova ni gu wene ngbanya nga ga kparakpara ziazia pai;

³⁰oni kío ku bara bangiriko, zegino dunduko; ii, zegino du ku baha kindi, ka i agbísa nga ha ya.

³¹Angbangbaturũ ningi angi, kpoto sende ki du pusiapusia, i yá dagba arikaaboro yo, “Yekova nazoga rago!”

³²Abaime nipói apaa, na agu ahe du rogo ho dunduko, ati ningi angi, na agu ahe du rogo ho dú!

³³Angua bire yo dunduko angbíko ni bia ngbarago, ku bara bangiri Yekova, bambiko ko aye ka sapangbanga zegino.

³⁴Ako oni fu atambuahe fu Yekova, bambiko ko ni wene ko; gako weneringise nye anye kindi!

³⁵Oni ki ya a; “Ako Mbori gaani bata, mo batasi rani, ki dungura rani ki batasi rani be rikaaboro, ani fuku atambuahe fu kparakpara ziazia rimoro, ki sambua tirani rogo ga tambuahe.

³⁶Yekova au ni sambuasambua ko, nga ga aYisaraere Mbori, mbata rago nikaenga nye anye kindi!” Aboro dunduko ki ya “Amina!” ki tambua Yekova.

³⁷Dawidi ki mbu Asafa na awirinako yo barangba sanduki ga Yekova mokido, ka amanga sunge barangba sanduki kindi a wa rengbe he tipa gu uru,

³⁸na Obedeedome na awirinako 68; na gu Obedeedome nangia wiri Yedutuna, na Osa i ki du ni ababanda angbadimo.

³⁹Sadoka boromotumo na awirinako nangia aboromotumo ki ru barangba ga Yekova banye rogo tumbatumba rago nga gu nadu Gibona yo,

⁴⁰i nizo zozo amotumo fu Yekova auru bamotumo zozo motumo na awiso na anyemu a kindi, ku sangba agu apai du ni keke he rogo rugute yo nga ga Yekova, nga gu ko arugu he fu aYisaraere.

⁴¹AEmana na Yedutuna adu na yo, na gu kura yo i asia yo nangia agu yo i akusi yo ti rimoyo ka afu atambuahe fu Yekova, bambiko gako weneringise nye anye kindi.

⁴²AEmana na Yedutuna ki du na yo na ambanya be yo na gu sirigi napaa apaa tipa agu yo nikapaa ku ari na gu woro ahe du tipa abia nga ga Mbori. I ki ringbisi awiri Yedutuna i du ku ngbadimo bakporo yo.

⁴³Aboro ni ba sa sa ki ga ku kpuyo yo, Dawidi ki karaga tiko ka fu maku fu gako aborokporo.