Read zande 1 Pekapai 18 Bible Online

1 Pekapai 18 - zande bible

1 Pekapai 18

¹Fuo agi apai re si ki du wa gere, wa Dawidi adi be aFereseto, ki zogo yo, ko ki di Gata na gaha akporo be aFereseto.

²Ko ki mangi Moaba, aMoabo ki du ni avuru Dawidi ki niye na rúhe fu ko.

³Dawidi ki mangi Adadezere nangia bakindo Soba daku Amata yo, wa ko andu ka nyakasa pa gako zogarago pavuru di nga Ferata.

⁴Dawidi ki zi angbagidavura be ko 1,000, na abanduri afarasi 7,000, na aborovura ni ndue 20,000. Dawidi ki kafu gbaga ndu afarasi ngbagidavura dunduko, ono ko aka kuti agu ra dagba ra arengbe na angbagidavura 100.

⁵Ho aSurio nga ga Damaseke yo aye ni ka unda Adadezere nangia bakindo Soba, Dawidi ki imi ga aSurio aboro wa 22,000.

⁶Dawidi ki mamoi gbata abanzengere Suria yo nga ga Damaseke, aSurio ki du ni avuru Dawidi, ki niye na rúhe fu ko. Yekova ki nifu diabese fu Dawidi yo ko anandu ku ho ni.

⁷Dawidi ki rogo agu avurakube du ni dahabu nga gu naadu ti kpoto avuru Adadezere, ki ye na ni ku Yerusarema yo.

⁸Dawidi arogo sirigi ni bakere he Tibata yo na Kuna yo nangia ga Adadezere abaakporo, Soromo ki mangi bazundati rogo gu sirigi; na adangba aũsunge.

⁹Ho Tou nangia bakindo Amata agi he ni ya Dawidi mangi gu rimbasa aborovura dunduko nga ga Adadezere nangia bakindo Soba,

¹⁰Tou ki kedi Adorama nangia wiriko koyo du Bakindo Dawidi ni ka paa kuti ko, ka tambua ko, bambiko ko aso vura na Adadezere ki mangi ko; bambiko Adadezere anaso vura aso na Tou. Dungu ngbatunga aúsunge nga ga dahabu na feda na sirigi ko akedi he;

¹¹Bakindo Dawidi akpara agu ahe re fu kina Yekova, wa sa na agu afeda na adahabu nga gu ko arogo be arikaaboro dunduko, be aEdome, na be aMoabo, na be awiri Amona, na be aFereseto, na be aAmareko.

¹²Abisai nangia wiri Seruya, ki imi aEdome rogo Ngboongboorago Tikpo wa aboro 18,000.

¹³Ko ki mamoi gbata abanzengere Edome yo; aEdome dunduko ki du ni avuru Dawidi. Yekova ki nifu diabese fu Dawidi yo ko anandu ku ho ni.

¹⁴Dawidi ki zogo aYisaraere dú, ko ki nisari ngbanga nzunzu fu gako aboro na rurupai dunduko.

¹⁵Yoaba wiri Seruya ki du ku ri rimbasa aborosovura; Yosafata wiri Airuda ki ngia batingidipai;

¹⁶Sadoka wiri Aituba, na Aimereke wiri Abiatara, i adu ni aboromotumo, Savase ki ngia bakeapai;

¹⁷Benaya wiri Yoyada ki du ku ri aKereto na aPereto, awiri Dawidi ki du ni abazogo rogo ga bakindo sunge.