Read zande 1 Pekapai 22 Bible Online

1 Pekapai 22 - zande bible

1 Pekapai 22

¹Dawidi ki ya, “Gere nga gu bambu nga ga Yekova nga Mbori, gere nga bamotumo nga ga zozo motumo tipa aYisaraere.”

²Dawidi ki gumba pai i dungura gu kungba aboro naadu rogo ga aYisaraere ringara, ko ki ringbisi agu yo ni abasekembia i nimangi sunge seka mbia ka dua ga Mbori bambu na ni.

³Dawidi ki dungura mará ni dungu he tipa taka aneri rogo ho tipa angbadimo bakporo, na tipa aúzungaha; na sirigi ni dungu he a zanga ringbisa barõaha,

⁴na gbakigbaki angua kedara zanga geda ha; bambiko aboro Sidona na aboro Tura aima ye na angua kedara fu Dawidi ni dungu he.

⁵Dawidi ki ya, “Soromo nga wire nga paranga ata nyakada nga te, gu bambu i ka dua ha fu Yekova si ka du ni kiisikiisi paha ki susi, rimoho awo rogo aringara dunduko na pa gaha taarimo; si du mi ambakada aũhe ti ni.” Si du Dawidi ki mbakadi ahe ni badungu he mbata fu kpi ko.

⁶Ko ki yambu Soromo nga wiriko, ki rugu ko ko dua bambu fu Yekova, nga ga aYisaraere Mbori.

⁷Dawidi ki ya fu Soromo. “Wire, si adu kpotore yo ka dua bambu tipa rimo Yekova gi Mbori.

⁸Ono sangba Yekova ki ye fere, niya, ‘Mo auka kure gbe ki so bakere avura; mo adua nga bambu tipa rimore te, bambiko mo uka kure gbe auru kpotosende ku bangire.

⁹Mo ngere, i avunga kumbagude foro; ko nikadu m boro zereda. Mi afu zereda fu ko be agu avurako dunduko du pati ko kirikiri; bambiko rimoko nikangia Soromo, mi ki fu zereda fu aYisaraere ti gako rago na zezeredi pai.

¹⁰Ko nikadua bambu tipa rimore. Ko nikadu ni wire, mi ki du ni bako, mi anyakasa gako mbatabakindo dagba a Yisaraere nye anye kindi.’

¹¹Awere, wire, Yekova du na mo, si du mo ki nyasi pa dua gu bambu nga ga Yekova nga ga Mbori, wa ko agumba ha tipa ro.

¹²Ono Yekova fu tatamana foro na rugatinapai, ki fu rugapai foro tipa aYisaraere si du mo ki nika kuti gu rugute nga ga Yekova nga ga Mbori.

¹³Mo au ka mo amanga pa gu rugaapai na asaraangbanga nga gu Yekova arugu Mose na ni tipa aYisaraere. Mo du nyanyaki, ki du na bakere era. Ka mo gunde nga ya; ka mo yungura nga a ya.

¹⁴Rogo gi gberárago mi mbakadi ahe tipa ga Yekova bambu wa taranda dahabu 100,000, na taranda feda wa niirioni sa; na sirigi na mará ki susi geda barõaha, bambiko si adu adu kpaima; mi mbakadi gbakigbaki ngua na ambia a. Mo arengba ka maa gu ku ri he a.

¹⁵Were aborosunge kina be ro a ni dungu yo: nga abageteke mbia, na abaseke he a, na abagbaki ngua, na agu aboro du ni airabirĩ tipa ngbatunga asunge dunduko;

¹⁶nga sunge dahabu, ga feda, ga sirigi na ga mará a, susi bageda yo. Mo guari tie kamanga ha! Yekova dú na mo!”

¹⁷Dawidi ki rugu abazogo nga ga aYisaraere yo d unduko i unda Soromo nga wiriko, mya,

¹⁸“A nga Yekova na oni nga gaoni Mbori te? Ko afu nga zereda fu roni rogo arago dunduko, te? bambiko ko fu agu aboro naaraka rogo gi ringara re ni zogozogo yo ku be re; gi ringara re ki du ni zogozogo ho fu Yekova na fu gako aboro.

¹⁹Oni moi gaoni berã na kpotoroni yo awere ka gbata Yekova gaoni Mbori. Si du oni guari tie, ki dua gu kparakpara ba nga ga Yekova Mbori, ka ye na sanduki ga Yekova mokido ku rogo gu bambu i ka dua ha ti rimo Yekova na gu ziazia aũsunge nga ga Mbori.”