Read zande 1 Pekapai 29 Bible Online

1 Pekapai 29 - zande bible

1 Pekapai 29

¹Dawidi nangia bakindo ki ya fu gbuu dunduko, “Soromo nga wire, nga gu ko sia kina Mbori ko, ko nga paranga kindi ata nyakada nga ya, sunge du ni bakere he; bambiko gu bambu bakindo re si tipa aboro te ono si tipa Yekova Mbori.

²Awere mi mbakadi ahe na omere dú, tipa ga gi Mbori bambu, nga dahabu tipa sunge agu ahe du ni dahabu, feda tipa sunge agu ahe du ni feda, na sirigi tipa sunge agu ahe du ni sirigi, mará tipa sunge agu ahe du ni mará, ngua tipa sunge agu ahe du ni ngua, na agu ambia nga oniki kpaima, na agu ambia nakĩ akĩ moi yo ho ku rogo kura he, na agu ambia du na ngbatunga arangi akia, na angbatunga kikiipa ambia dunduko, na zezerenge ambia kpaima.

³Ku ri gere a, bambiko mi fu ngbadure tipa ga Mbori bambu, wa du gimi aũkumuko kina bere nga gimi a, nga dahabu na feda, mi fu he tipa ga gi Mbori bambu ku ri agu ahe mbakadi mi dunduko tipa ziazia bambu:

⁴si nga taranda dahabu 3,000, nga ga ringara Ofiri, taranda gigiri feda 7,000, ka dada vuro bambu na ni,

⁵dahabu tipa sunge agu ahe du ni dahabu, na feda tipa sunge agu ahe du ni feda, tipa ngbatunga asunge dunduko abagbaki ahe agbaka ni beyo. Da fu tini tie, ka kpara tini fu Yekova areme?”

⁶Abazogo nga ga angbatunga abayo ki fu tiyo sa ni na nyemuhe, na agu abazogo nga ga angbatunga aYisaraere, na abarutirivura nga ga akutu yo na ga akama yo, na abarugu pa ga bakindo sunge a.

⁷I ki fu taranda dahabu 5,000 tipa gu sunge nga ga ga Mbori bambu, na sekere dahabu wa 10,000 a, na taranda feda wa 10,000, na taranda sirigi wa 18,000, na taranda mará wa 100,000.

⁸Ono agu yo du kikiipa ambia beyo, i afu he tipa gu ũkumuko nadu rogo ga Yekova bambu, ku be Yiere nangia boro Gerusona

⁹Aboro ki ningi bambiko wa i afu he ni nyemuhe, bambiko i afu he fu Yekova na kpotoyo yo ziazia ni nyemuhe; Bakindo Dawidi ki ningi a na bakere ngbarago.

¹⁰Si du Dawidi ki sambua Yekova ku bangiri gbuu dunduko; Dawidi ki ya, “Ako Yekova, ga Yisaraere Mbori nga barani, i sambua ro nye anye kindi.

¹¹Ako Yekova, ga pai dũ ni bahe, na tandu, na taarimo, na diabese, na irisa; bambiko agu ahe du ngbangbaturũ yo na auru kpotosende no dunduko nga gamo; ngbi nga gamo a, Ako Yekova, mo ni kiisikiisi pa ro ku ri ahe dú.

¹²Kumuko naye be kina ro na irisa, mo nazoga ahe dú. Tandu na ome du kina be ro a; pa kiisa pa boro si kina be ro na pa fu ome fu ahe dunduko a.

¹³Were si du ani natambua ro nga gaani Mbori, ki nisambua taasitaasi rimoro.

¹⁴“Ono da nga mi, gini he nga gimi aboro ka ani rengbe ka fu he ni nyemuhe wa gere? Bambiko ahe dunduko naye kina be ro, kina dagba gamo ahe yo ani afu he ni foro.

¹⁵Bambiko ani nga kungba aboro bangiro, ni nungunungu aboro, a wa abarani adu. Gaani rame ku auru kpotosende no si wa kina kirimase, banye no te.

¹⁶Ako Yekova gaani Mbori, agi ahe du kpaima re dunduko mbakadi ani he, ka dua bambu foro na ni, tipa ziazia rimoro, si naye be kina ro, nga kina gamo dunduko.

¹⁷Gi Mbori, mi ini he a, ya mo naasada kpoto boro yo, ki du na ngbarago tipa kina rurupai. Mi tigimi mi afu agi ahe re ni nyemuhe be gu rurupai du kpotore yo, awere mi bi gamo aboro nga agu yo du erẽ, i nifu he ni nyemuhe foro na ngbarago.

¹⁸Ako Yekova, ga Abarayama Mbori, nga ga Yisaka Mbori, nga ga Yisaraere Mbori, i nangia abarani, mo díka gere ku rogo gu wisigapai nga ga berá du kpoto gamo aboro yo, ki rugu kpotoyo yo koyo du mo ni.

¹⁹Mo ki fu ziazia kpoto yo fu Soromo nga wire tipa ka kuti gamo arugute, na gamo dezireapai, na gamo rugaapai, ka manga agi apai dunduko re, ka dua ga bakindo bambu nga gu mbakadi mi ahe tipa ha.”

²⁰Dawidi ki ya fu gbuu, “Oni sambua Yekova gaoni Mbori awere.” Gbuu dunduko ki sambua Yekova nga ga abayo Mbori, i ki dua riyo ku sende, ki irisi Yekova, ki tumusa fu bakindo a.

²¹I ki tumo ni amotumo fu Yekova, ki nitumo ni zozo amotumo fu Yekova a ni gu fuo girarago, wa abaabagara 1,000, abaakandoro 1,000, na wiri akandoro 1,000 na gaami mbirimbiri amotumo, na amotumo kpaima tipa aYisaraere dunduko.

²²I ki niri riahe nimbiri he na ngbarago gbe bara bangiri Yekova ni gu uru re. I ki moi Soromo wiri Dawidi ni bakindo ni ue he kina ti gu rago re, ki mbedi ko ni nzeme fu Yekova ko du ni bazogo, na Sadoka a ko du ni boromotumo.

²³Soromo ki sungu auru ga Yekova mbatabakindo ni bakindo ku ba bako nga Dawidi. Ko au au; aYisaraere dunduko ki nigi sangbako.

²⁴Abazogo dú na airanyaka ki ra na goróyo fu Bakindo Soromo, na awiri Bakindo Dawidi kina wo a.

²⁵Yekova ki nikiisi pa Soromo ni bakere he gbe ku bangiri aYisaraere dunduko, ki fu ngbatunga worimo nga ga abakindo fu ko naadu nga ti gu ni naadu mbata fu ko ni bakindo aYisaraere ya.

²⁶Were Dawidi wiri Yisai azogo aYisaraere dunduko

²⁷Gu rago ko azogo aYisaraere ti ni si adu wa garã 40; ko azogo rago Eburone yo tipa garã saba, ko ki zogo rago Yerusarema yo tipa garã 33.

²⁸Ko ki kpi garãko narengbe nzunzu, dungu agarã asaki ko, aũkumuko adu be ko gbe na irisa a. Soromo nangia wiriko ki zogo rago ku ba ko.

²⁹Were pa gu mangaapai nangia ga Bakindo Dawidi, bambata ha na yangara ha, oni ngere, si ni keke he rogo gu Kitabu Pekapai nga ga Samuere nangia babiapai, na rogo gu Kitabu Pekapai nga ga Natana nangia nebi, na rogo gu Kitabu Pekapai nga ga Gada nangia babiapai a,

³⁰wa sa na pa gako zogarago na pa gako tandu na pa agu arago nasusi ko na aYisaraere, na agu angbi dunduko nga ga aringara.