Read zande 2 Pekapai 10 Bible Online

2 Pekapai 10 - zande bible

2 Pekapai 10

¹Rabama ki ndu ku Sekeme yo, bambiko aYisaraere dunduko andu ku Sekeme yo ka maa ko ni bakindo.

²Ho Yerobama nangia wiri Nebata agi he ni, Yerobama ki yega Ezipeta yo bambiko ko adu Ezipeta yo kindi, yo ko aoro ku ho ni be bangiri Bakindo Soromo.

³I ki kedi sunge ka yamba ko; Yerobama ki ye na aYisaraere dunduko i ki gumba pai fu Rabama, ki ya,

⁴“Bamo amoi gonga ku gorani ni kere he. Awere tie, mo ákpurasi ga bamo kere nyanyaki sunge fu rani, na gu gako rõrõi gonga ko amoi ku gorani, ani nimángi pa ro.”

⁵Ko ki ya fu yo, “Oni yé berewe kono du mi ni fuo rame biata.” Aboro ki guari ki ga.

⁶Bakindo Rabama ki saki pai na gbinza abaakumba, nangia agu yo nanaru mbata ku bara bangiri bako nangia Soromo ho ko adu ni ni ungako. Rabama ki ya, “Gini rugapai oni akaringbisa fere mi karaga ha fu agi aboro re?”

⁷I ki gumba pai fu ko, ki ya, “Ka mo du na weneringise fu agi aboro re, ki nimangi gu pai ngba ti yo, ki gumba wene apai fu yo, i adú ni avururo nye anye kindi.”

⁸Ono ko abasa sangba gbinza abaakumba nga gu i ape fu ko, ko ki saki pai na kina aparanga nangia agu yo ko asono na yo naru ku bara bangiriko.

⁹Ko ki ya fu yo, “Gini rugapai oni akaringbisa ha fere tigaoni ani karaga ha fu agi aboro re nagumba pai fere, niya, ‘Mo ákpurasi gu gonga bamo amoi ku gorani’?”

¹⁰Agu aparanga ko asono na yo i ki ta gumba pai fu ko, niya, “Were mo ka gumba ha fu agu aboro nagumba pai foro, naya, ‘Bamo amoi gonga ni rõrõi he ku gorani, ono mo tigamo mo ákpurasi he fu rani’; were mo ka pe he fu yo, ‘Tanga wirinzagare kii ti dimo buba.

¹¹Si du wa buba amamaa rõrõi gonga ku goroni, mi tigimi arõasa gaoni gonga ki susi. Buba anata roni ni kpudu, ono mi tigimi atá roni ni angerembia.’ ”

¹²Si du Yerobama ki ye na aboro dunduko ti biata uru, a wa bakindo agumba ha fu yo, niya, “Oni yé kono du mi ni berewe, ti biata rame.”

¹³Bakindo ki karaga pai fu yo ni kina bau, ki basa pa sangba gbinza abaakumba,

¹⁴Bakindo Rabama ki gumba pai fu yo kina kuti sangba aparanga, ki ya, “Buba amoi rõrõi gonga ku goroni, ono mi tigimi arõasa ha gaoni gonga ki susi; buba anata roni ni kpudu, ono mi tigimi atá roni ni kina angerembia.”

¹⁵Si du bakindo agia nga fugo aboro te; bambiko si aye be Mbori ya Yekova digisi sangbako nga gu ko agumba ku ngba Aiya boro Sirona fu Yerobama nangia wiri Nebata.

¹⁶Ho aYisaraere abi he ni dunduko ya bakindo agia nga fugoyo te, aboro ki karaga ha fu bakindo, ki ya, “Gini he nikadu fu rani rogo kumbo Dawidi? Mosoro be wiri Yisai fu rani te. Ako aYisaraere, oni gúari ka ga ku rogo gaoni abamburoko! Dawidi, kina ro ka banda ngbatungaro.” Si du aYisaraere dunduko aga ti ni ku rogo gayo abamburoko.

¹⁷Ono Rabama azogo kina agu awiri aYisaraere naaraka rogo agu abaakporo naadu Yuda yo.

¹⁸Bakindo Rabama ki kedi Adorama, naadu ku ri zizi aborosunge, aYisaraere dunduko ki sopo ko na ambia ko ki kpi. Bakindo Rabama ki ipisi tiko ka rima ku rogo gako ngbagidvura, ka ora ku Yerusarema yo.

¹⁹Si du aYisaraere asa mungu ti ni kuti ngbatunga Dawidi daku areme.