Read zande 2 Pekapai 12 Bible Online

2 Pekapai 12 - zande bible

2 Pekapai 12

¹Si adu wa gere, ho ga Rabama ngbi anyaki ni ko ki du nyanyaki tigako a, ko ambu gu rugute nga ga Yekova, na aYisaraere fuo ko a.

²Si adu wa gere ti bisue garã zogarago nga ga Bakindo Rabama, Sisaka bakindo aEzipeto aye na vura kuti Yerusarema, bambiko i ati ga Yekova andika.

³Sisaka aye na angbagidavura 1,200 na abanduri afarasi 60,000. I ageda nga agu aboro naaye na ko Ezipeta yo te ― aboro Ribue, na aboro Suka, na aboro Etiopia.

⁴Ko ki rogo agu abaakporo ngapa Yuda yo, ki da ku Yerusarema yo.

⁵Were Semaya nangia nebi ki ye koyo du Rabama ni, na koyo du abazogo aYudo ni, naadungura tiyo ku Yerusarema yo be Sisaka, ki ya fu yo, “Ya Yekova wẽ, ‘Oni mbu re, si du mbu mi roni ti ni ku be Sisaka.’ ”

⁶Abazogo nga ga aYisaraere yo ki umbasi tiyo na bakindo a i ki ya, “Yekova du ni ruru ko.”

⁷Ho Yekova abi he ni ya i umbasi tiyo, sangba Yekova ki ye fu Semaya niya: “I umbasi tiyo; mi agbárasa nga yo te, ono mi aída pa bete bata fu yo, ka gi zinga ye nga ku ri Yerusarema be Sisaka ya.

⁸Ono ka si vura du wo vurũ, i adú ni avuruko, i ini pa manga pa re, na pa gu mangapai nga ga angbi nga ga aringara.”

⁹Si du Sisaka bakindo aEzipeto aye na vura kuti Yerusarema; ko ki rogo gu kikiipaahe naadu rogo ga Yekova bambu na gu kikiipaahe naadu rogo ga bakindo bambu yo; ko ki ga na ni dunduko. Ko ki rogo agu avurakube du ni dahabu Soromo amangi he.

¹⁰Bakindo Rabama ambakadi avurakube ni sirigi ku ba ha, ki fuku he ku be abaakumba naadu ku ri ababandarago, nangia agu yo naabanda ngbadimo ga bakindo bambu.

¹¹Si adu wa gere, wa bakindo anandu ku rogo ga Yekova bambu yo, babandarago aniaka ha, ki nigasi he berewe ku rogo ga ababandarago bambu yo.

¹²Ho ko aniumbasi tiko ni ga Yekova zinga ki niguari tiko, ka ko agbarasa nga ko dunduko ya; were, i abi wenepai Yuda yo a.

¹³Si du Bakindo Rabama ki ninyakasi tiko anyakasa gbe Yerusarema yo ki nizogo rago. Garã Rabama adu 41 ho ko atona zoga rago ni, ko ki zogo rago Yerusarema yo tipa garã 17, nga gu bakporo Yekova asia ha dagba angbatunga aYisaraere dunduko ka maa rimoko ti ni. Rimo nako angia Nama ni boro Amona.

¹⁴Ko ki nimangi gu pai nadu ni gbigbita ha, bambiko ko afu nga kpotoko yo ka gbata Yekova te.

¹⁵Were gu mangaapai nga ga Rabama, bambata ha na yangara ha, ati si ni keke he rogo gu kitabu pekapai nga ga Semaya nangia nebi, na ga Ido nga babiapai? Vura ki nye dagba aRabama na Yerobama kindi.

¹⁶Rabama ki kpi fuo atitako, i ki kpisidi ko rogo ga Dawidi bakporo; Abiya nangia wiriko ki zogo rago ku ba ko.