Read zande 2 Pekapai 14 Bible Online

2 Pekapai 14 - zande bible

2 Pekapai 14

¹Si du Abiya ki kpi fuo atitako, i ki kpisidi ko rogo ga Dawidi bakporo. Asa nangia wiriko ki zogo rago ku ba ko. Ti gako rago ringara adu zezeredi garã ki du bawe.

²Asa amangi gu pai nadu ni wene he ni ruru he bangiri Yekova gako Mbori.

³Ko arogo kungba abamotumo dunduko ku sa yo na tumbatumba arago, ki kuadi duadua ambia ki dewe aAsera nga ngbama,

⁴ko ki rugu aboro Yuda i gbata Yekova, ga abayo Mbori, ka amanga pa rugute na ndika.

⁵Ko arogo gu tumbatumba arago rogo abaakporo dunduko nga ga Yuda na duadua ambia wa kpia uru. Ngbi adu zezeredi ti rago ko.

⁶Ko ki dudua abaakporo ngapa Yuda yo, bambiko ringara adu zezeredi. Vura adu nga na ko rogo agu agarã re te, bambiko Yekova afu zereda fu ko.

⁷Bambiko ko aya fu aYudo wé, “Ani dúdua agi abaakporo re, ki dua ngapa na kirikiri agbata, na angbadimo, na angbongbo susu; wa du ringara kindi ni gaani, bambiko ani agbata Yekova nga gaani Mbori; ani agbata ko, ko ki fu zereda fu rani rogo arago dunduko.” Si du i ki dudua ha ki u.

⁸Asa adu na rikavura be ko naatinda bakikii avurakube na abaso wa aboro 300,000 naye Yuda yo, na Benyamina yo i aye wa aboro 280,000 nangia agu yo naatinda vurakube ki nizumudi aguanza; agi yo dunduko re angia airanyaka ni kangarã aboro.

⁹Zera boro Etiopia ki ye sa yo na rikavura wa aboro mirioni sa na angbagidavura 300, ko ki ye da ku Maresa yo.

¹⁰Asa ki ndu ka gbia ko, i ki tangara tiyo sa vura rogo ngboongboorago Sefata du Maresa yo.

¹¹Asa ki kpari fu Yekova gako Mbori, ki ya, “Ako Yekova, a nga kura boro ho ka unda rani wa mo te, dagba iraome na gu ni adu nga na ome ti ni ya. Ako Yekova gaani Mbori, mo únda rani, bambiko ani nakida kuti ro, ani naye na rimoro kuti gi oarimbasa re. Ako Yekova, mo nga gaani Mbori; ka mo ídi nga fu boro ni dí nga be ro ya.”

¹²Si du Yekova ki mangi aboro Etiopia barangba Asa na aboro aYudo, aboro Etiopia ki oro.

¹³Asa ki do fuo yo na agu aboro nadu na ko ki da ku Gerara yo, aboro Etiopia ki kpi ni dungu yo; bambiko i adu ni gbarasigbarasi yo barangba Yekova, na barangba gako rimbasa vura. Aboro aYudo ki rogo badungu gbugbu ahe

¹⁴I ki mangi agu abaakporo dunduko du kirikiri pati Gerara, bambiko gunde Yekova aye ku ri yo. I ki gbarasi abaakporo dũ, bambiko bakere gbugbu ahe adu rogo ho.

¹⁵I agbarasi agu abamburoko a du tipa zogozogo anya, ki ga na akandoro kpaima na akameri. I ki karaga tiyo ku Yerusarema yo.