Read zande 2 Pekapai 15 Bible Online

2 Pekapai 15 - zande bible

2 Pekapai 15

¹Ga Mbori Toro ki ye ku ri Azaraya wiri Odede.

²Ko ki kuru ka ngbisa Asa, ki ya fu ko, “Asa, oni gí sangba re, na aboro Yuda dunduko na aboro Benyamina: Yekova nidu na oni, kina ho du oni ni na ko. Ka oni agbáta ko, oni abí ko abi, ono ka oni mbu ko, ko ambú roni a.

³Were tipa gbanga rago aYisaraere anara nga fu ndikidi Mbori te, gu boromotumo nayugo pai adu nga na yo a te, na rugute a te;

⁴ono rogo gayo rungo i asa tiyo fu Yekova, ga aYisaraere Mbori, ki gbata ko, i ki bi ko.

⁵Ti agu arago re zereda adu nga fu gu ni naakura wa sa te na fu gu ni naarima a te, bambiko kina bakere rungosiro naadu fu agu aboro dunduko naaraka rogo agu aringara re.

⁶I ki du ni kuadikuadi yo rukutu, gu rikaaboro kuti gu rikaaboro, bakporo kuti gu bakporo, bambiko Mbori ambusi yo na ngbatunga fudifudiapai dunduko.

⁷Ono oni, oni dú nyanyaki! ka beroni rúngbura nga ya, bambiko i afú mosoro gaoni sunge fu roni.”

⁸Ho Asa agi agi apai ni re, na gu gumbapai nga ga Azaraya nangia wiri Odede, ko ki ngará, ki kusi gu gbegberẽ kere kpiahe dunduko naadu rogo ringara Yuda na Benyamina yo, na rogo agu abaakporo dunduko ko arogo ho rogo ringara abaagangara Efuraima, ko ki mbakadi bamotumo nga ga Yekova berewe, nga gu naadu barangba mbarazaga Yekova bambu.

⁹Ko ki dungura aYisaraere dunduko na aBenyamina, na agu yo nasungu na yo naye Efuraima yo, ga Manase yo, na ga Simona yo a, bambiko i aye koyo du ko ni ni dungu yo dagba awiri aYisaraere yo ho i abi he ni ya Yekova gako Mbori du na ko.

¹⁰Si du i ki dungura tiyo ku Yerusarema yo ti biata diwi ti gu 15 garã zogarago nga ga Asa.

¹¹I ki tumo fu Yekova ni gu uru re, dagba gu gbugbu ahe i aye na ni, nga abaabagara 700 na akandoro 7,000.

¹²I ki zunga he ka gbata Yekova, ga abayo Mbori, na kpotoyo yo dunduko na mbisimoyo dũ.

¹³Gu ni ka akpi nga nyemu ka gbata Yekova, ga aYisaraere Mbori ya, i aímo ni aimo, watadu umba pa ni na kikii pa ni, watadu kumba na de a.

¹⁴I ki zunga he fu Yekova ni bakere wa wa, na ngbiko, na ambanya, na anambongo.

¹⁵AYudo dunduko ki ningi mbiko gu zungahe re; bambiko i azunga he na kpotoyo yo dũ, ki nigbata ko na nyemuko ti yo dũ, i ki bi ko, Yekova ki fu zereda fu yo pati yo kirikiri.

¹⁶Maka nangia na Bakindo Asa, bakindo ki di ri ti du ni nakindo bambiko ri amangi gbegberẽ kere kpiahe si du ni Asera nga ngbama. Asa ki dewe gari kpiahe ku sande, ki sa ha wa nvutu, ki zo ho pangba gu wiridi nga Kidirona.

¹⁷Ono i aroga nga tumbatumba arago ku sa yo Yisaraere yo te. Ono kpoto Asa yo adu ni ziazia ha ti gako rago dunduko.

¹⁸Ko ki ye na agu ahe bako anakpara ha ku rogo ga Mbori bambu yo, na agu ahe ko ni tiko akpara ha a, nga feda na dahabu, na aũsunge.

¹⁹Ka vura adu nga berewe ya, dati gu 35 garã zogarago nga ga Asa.