Read zande 2 Pekapai 17 Bible Online

2 Pekapai 17 - zande bible

2 Pekapai 17

¹Yosafata nangia wiriko ki zogo rago ku ba ko, ki ninyakasi tiko kuti aYisaraere.

²Ko ki moi abanzengere rogo abaakporo ngapa dunduko Yuda yo, ki moi agbata abanzengere ringara Yuda yo a, na rogo agu abaakporo du Efuraima yo nangia gu Asa arogo ho nangia bako.

³Yekova adu na Yosafata, bambiko ko apekegu bambata apai nga ga titako nangia Dawidi; ka ko agbata nga pai be aBara ya,

⁴ono ko ki nigbata kina gu Mbori nga ga bako ko, ki nipeke kina gako arugute, ka ko ata nga fuo ga aYisaraere mangapai ya.

⁵Si du Yekova anyakasi ngbi ti ni ku be ko; aboro Yuda dunduko ki niye na gamaahe fu Yosafata. Ko adu na aũkumuko na irisa a gbe

⁶Kpotoko yo adu ni ngarãsingarãsi he rogo ga Yekova apai; ku ri gere ko arogo tumbatumba arago ku sa yo na aAsera nga ngbama Yuda yo.

⁷Ti gako biata garã zogarago ko ki kedi gako abazogo, nangia Benaira, na Obadiya, na Zekaraya, na Netanere, na Mikaya, i yúgu pai rogo abaakporo Yuda yo;

⁸a Revi adu na yo nangia Semaya, na Netanya, na Zebadiya, na Asaere, na Semiramata, na Yonatana, na Adoniya, na Tabiya, na Tobadoniya; Erisama adu na yo na Yorama nangia aboromotumo.

⁹I ki yugu pai Yuda yo, ga Yekova kitabu rugute ki du be yo. I ki nindu ki nitangara abaakporo Yuda yo dunduko ki niyugu pai dagba aboro.

¹⁰Gunde Yekova ki zi angbi azia dunduko nga ga agu aringara naadu kirikiri pati Yuda, ka i aso nga vura kuti Yosafata berewe ya.

¹¹Agu aFereseto ki ye na agamahe fu Yosafata a, na feda ni rũhe; aboro Araba ki ye na zogozogo anya fu ko, abaakandoro wa 7,700, na abameme wa 7,700 a.

¹²Pa Yosafata ki nikii akia ni bakere he. Ko adudua nyanyaki agbata na abaakporo baigaahe Yuda yo.

¹³Ko adu na dungu ngbatunga asunge rogo abaakporo Yuda yo. Aborosovura ni airanyaka nga kangará aboro adu be ko Yerusarema yo.

¹⁴Gere nangia gedigedi yo wa ngbatunga abayo adu; dagba ga Yuda yo, abarutirivura ki du nga ga akutu yo: Adena ki du ni barumbatayo, airanyaka ni kangarã aboro ki du fuo ko wa 300,000.

¹⁵Yoanana ki du fuo ko nangia barutirivura, aboro adu fuo ko wa 280,000,

¹⁶Anasaya wiri Zikiri ki du fuo ko, ko nafu tiko na nyemuhe tipa manga pa Yekova, airanyaka ni kangarã aboro ki du fuo ko wa 200,000.

¹⁷Dagba ga Benyamina yo: Eriada ki du nangia iranyaka ni kangarã boro, aboro ki du fuo ko wa 200,000 navodi tiyo na mboto na vurakube,

¹⁸Yozabada ki du fuo ko, aboro wa 180,000 ki du na ko naaima mbakada tiyo tipa sovura.

¹⁹Agi yo re nangia agu yo naamanga pa bakindo, gbiakuti agu yo bakindo amoi yo rogo agu abaakporo ngapa naadu ringara Yuda yo dunduko.