Read zande 2 Pekapai 18 Bible Online

2 Pekapai 18 - zande bible

2 Pekapai 18

¹Were Yosafata adu na aũkumuko na irisa gbe; ko ki kpamia tiko kuti Aba wa ko adi wiriko.

²Fuo bete agara ko andu ku Somorona yo ka bi Aba. Aba ki imi akandoro na abaabagara tipa ko ni dungu ra, na tipa agu aboro naadu na ko a. Aba ki zomia ko i ndu na ko kuti Ramotagirada.

³Aba bakindo aYisaraere ki ya fu Yosafata bakindo aYudo, “Ani andú na mo ku Ramota-girada yo?” Ko ki karaga ha fu ko ki ya, “Mi wa kina ro, gimi aboro wa kina gamo aboro. Ani adú na mo rago sovura.”

⁴Yosafata ki ya fu bakindo aYisaraere, “Mi nazungadi ro, mo sána he tipa sangba Yekova mbata areme.”

⁵Si du bakindo aYisaraere adungura anebi ti ni wa aboro 400, ki ya fu yo, “Ani ndú ka so vura, kuti Ramota-girada yo, watadu mi nye?” I ki ya, “Oni ndú; bambiko Mbori nikafu he ku be bakindo.”

⁶Ono Yosafata ki ya, “A nga kura nebi ho nga ga Yekova ni ka ani sana ko, te?”

⁷Bakindo aYisaraere ki ya fu Yosafata, “Boro ko yo sa ka ani sana Yekova ku ngbani, nga Mikaya wiri Yimera; ono mi nasoga ko, bambiko ko nagumba nga wenepai tipa re te, ono kina gbigbitapai dedede.” Yosafata ki ya, “Ka bakindo gúmba nga ha wo ya.”

⁸Bakindo aYisaraere ki yambu vuruko sa, ki ya fu ko, “Mo yé na Mikaya ni ipo nga wiri Yimera.”

⁹Were bakindo aYisaraere na Yosafata bakindo aYudo ki sungu ri gayo ambatabakindo ni ukadiukadi tiyo na gayo aroko; i ki sungu rogo bataka zende ahe ti ngbadimo bakporo Somorona; anebi dunduko ki nigumba pai ku bara bangiriyo.

¹⁰Sedekiya nangia wiri Kenana ambakadi agbanga ni marã tipa tiko, ki ya, “Wo poi Yekova re, ‘Mo atúrã aSurio na agi ahe re daho mo ka ba tungayo ni kpakaya’.”

¹¹Anebi dunduko ki gumba pai kina wo, ki ya, “Oni ndu ku Ramota-girada yo, ki u; bambiko Yekova afú he ku be bakindo.”

¹²Gu sunge naandu ka yamba Mikaya agumba pai fu ko, ki ya, “Mo ngére, agu apai anebi apeka si kusi wenepai fu bakindo wa pai ku ngba boro sa; mi nazungadi ro sangbaro dú wa kina sangba gu ni sa dagba yo mo gúmba kina wenepai a.”

¹³Ono Mikaya ki ya, “Wa du Yekova ni ungako, gu pai gi Mbori agumba, mi agúmba kina ha.”

¹⁴Ho ko ada ni koyo du bakindo ni, bakindo ki ya fu ko, “Mikaya, ani ndú sa vura kuti Ramota-girada yo, watadu ka mi nye?” Ko ki karaga ha ki ya, “Oni ndú, ki u; i afú yo ku be roni.”

¹⁵Bakindo ki ya fu ko, “Mi tigimi mi aruga ro bara waĩ mo gúmba kina rengo fere ti rimo Yekova?”

¹⁶Mikaya ki ya, “Mi abi aYisaraere ni gbandakagbandaka yo dunduko ri abaagangara, a wa agu akandoro adu nga babandara ti ra ya; Yekova ki ya, ‘Agi yo re adu nga na bairayo ti ni ya; i ga ku kpuyo yo dunduko ngba zereda.’ ”

¹⁷Bakindo aYisaraere ki ya fu Yosafata, “Mi nagumba nga ha foro te ya ko agumba nga wenepai tipa re te, kina gbigbitapai?”

¹⁸Mikaya ki ya, “Ono mo gí sangba Yekova tie; mi abi Yekova ko nisungu auru gako mbatabakindo, gu rimbasa dunduko nga ga ngbangbaturũ yo ki ru ku kumbabeko na ku garebeko yo;

¹⁹Yekova ki ya, ‘Da nikananga Aba bakindo aYisaraere, ko ndu ku Ramota-girada yo ka kpi yo?’ Gu ni ki gumba ha were, gu kura ni ki gumba pai were.

²⁰Toro ki ye ki ru ku bara bangiri Yekova, ki ya, ‘Mi tigimi nikananga ko.’ Yekova ki ya fu ko, ‘Ni gini pai?’

²¹Ko ki ya, ‘Mi andu ki du wa irazire toro ku ngba gako anebi dunduko.’ Yekova ki ya, ‘Mo anánga ko, si ki di be ko; mo ndú ki mangi he kina wo.’

²²Mo ngére tie, si du Yekova moi irazire toro ku ngba gi gamo anebi re yo dunduko; Yekova gumba pa gbigbitapai tipa ro.”

²³Sedekiya wiri Kenana ki mbedi ki nari pangba Mikaya, ki ya, “Ga Yekova Toro aguari ti re waĩ ka gumba pai foro?”

²⁴Mikaya ki ya, “Mo ngere, mo abí he ni gu rago mo ka ndu ku rogo vuru bambu yo ka oka tiro.”

²⁵Bakindo aYisaraere ki ya, “Oni zí Mikaya, ki ndu na ko berewe koyo du Amona ni nga bazogo bakporo, na koyo du Yoasa ni nga wiri bakindo;

²⁶ki ya, ‘Ya bakindo wẽ, Oni mói gi boro re ku bambukisa yo, ki nirigi ko na gu kpokuta nga ga rungosi na gu ime nga ga rungosi, daho mi ka yega ni zezeredi.’ ”

²⁷Mikaya ki ya, “Ka mo yega zezeredi, si ngia Yekova agumba nga pai ku ngbare te.” Ko ki ya a, “Aboro gí he, wa du oni dunduko!”

²⁸Si du bakindo aYisaraere andu ti ni na Yosafata bakindo aYudo ku Ramotagirada yo.

²⁹Bakindo aYisaraere ki ya fu Yosafata, “Mi abírika tire ki ndu sa vura, ono mo úkadi tiro na gamo aroko bakindo.” Si du bakindo aYisaraere ki biriki tiko; i ki ndu sa vura.

³⁰Were bakindo aSurio arugu gako abarutiri angbagidavura, ki ya, “Ka oni só nga vura na umba boro watadu bakere boro a ya, kpara kina bakindo aYisaraere sa.”

³¹Si adu wa gere, ho abarutiri angbagidavura abi Yosafata ni, i ki ya, “Ndikidi bakindo aYisaraere du re.” I asa tiyo fuo ko ka so vura kuti ko; ono Yosafata apoi ku ari, Yekova ki unda ko. Mbori ki wo ti yo i guari pati ko,

³²si adu wa gere, ho, abarutiri angbagidavura aini he ni ya bakindo aYisaraere nga ko te, i ki karaga tiyo ngba fuo ko.

³³Ono gu boro ki gbe gani mboto ki ba ha ni baringbangba gbua, ki no bakindo aYisaraere dagba ngbazunga ũvura na marãngbaduse; si du bakindo aya ti ni fu barugu gako ngbagidavura, “Mo sá tiro, ki tindi re ku sa yo dagba rimbasa, bambiko mi hõ ahõ ni kere he.”

³⁴Vura ki moi pai ni gu uru re, ono bakindo aYisaraere ki songodi tiko rogo gako ngbagidavura nibi aSurio ki da ku nyemu; ho uru ati ni ko ki kpi.