Read zande 2 Pekapai 19 Bible Online

2 Pekapai 19 - zande bible

2 Pekapai 19

¹Yosafata nangia bakindo aYudo ki karaga tiko ku kpuko yo Yerusarema yo zezeredi.

²Ono Yeu wiri Anani babiapai ki ndu ka ngbisa ko, ki ya fu Bakindo Yosafata, “Mo ka unda gbegberẽ boro, ki nikpi nyemu agu yo nasoga Yekova? Bambiko gi pai re, zinga ye be Yekova ku ri ro.

³Ono i abi bete wenepai ti ro a, bambiko wa mo arogo aAsera nga ngbama ku sa yo rogo ringara, ki rugu kpotoro yo ka gbata Mbori.”

⁴Yosafata ki niraki Yerusarema yo. Ko ki ndu berewe ku dagba aboro yo, tona Berasaba yo da ku ringara abaagangara Efuraima, ki karaga yo berewe koyo du Yekova ni, nga ga abayo Mbori.

⁵Ko ki ringbisi abasapungbanga ringara yo ku rogo abaakporo ngapa dunduko Yuda yo, ku rogo abaakporo ni ba sa sa.

⁶Ko ki ya fu abasapungbanga, “Oni bérẽ pa gu pai oni amanga, bambiko oni asapa nga ngbanga tipa aboro te, ono tipa kina Yekova; ko du na oni rogo sarangbanga.

⁷Ono gunde Yekova dú ti roni; oni bánda tironi ki mangi he, bambiko irairapai ti Yekova gaani Mbori rogo sarangbanga te. Ko aberã nga pa aboro kuti pa kindiga yo te, watadu ko adia nga marã mobirimo a te.”

⁸Ku ri agi apai re Yosafata ki ringbisi agu aRevi na aboromotumo na abarumbatayo ku ri angbatunga aYisaraere, i nisápu ngbanga ku sangba Yekova yo, na ka ruga angbanga pa kango. Gayo basapangbanga adu Yerusarema yo.

⁹Ko ki rugu yo ki ya; “Were oni ka manga ni yososopai rogo gunde ti Yekova yo, na ziazia kpotoroni yo:

¹⁰ho gu boro nikaniye ni na pa kango dagba awirinaroni yo naraka rogo gayo abaakporo, dagba wirina na wirina tia pa uke kure, rogo pa rugute na ndika, watadu rugaapai na asarangbanga, oni anirugu yo, ka i dú nga na pai ku ri yo ku bangiri Yekova ya, si du ka zinga aye nga ti ni ku ri roni na ku ri awirinaroni ya. Oni animangi gere, ka oni adú nga na pai ku ri roni ya.

¹¹Oni ngére, Amariya bairamotumo du ku ri roni tipa agu apai dunduko nga ga Yekova; na Zebadaya nga wiri Yisamaere, du ni bazogo ku ri ngbatunga Yuda, tipa agu apai nga ga bakindo dunduko, aRevi adú ni abarumbatayo fu roni. Oni mángi pai ni ngangarã ha, Yekova ki du na agu roni du ni ruru roni!”