Read zande 2 Pekapai 20 Bible Online

2 Pekapai 20 - zande bible

2 Pekapai 20

¹Si adu wa gere fuo gure, aMoaba aye na aAmono, na bete agu aMunima kuti Yosafata na vura.

²Agu aboro ki ye ki gumba pai fu Yosafata, ki ya, “Bakere rimbasa aboro naye mbiti baime yo Suria yo sa ro, mo ngere, i kina Asosanatamara yo”, si sa na Ene-gedi.

³Yosafata ki nigunde, ki fu tiko ka gbata Yekova, ko ki taki pande pa gina riahe rogo ringara Yuda dunduko.

⁴AYudo ki dungura tiyo dunduko ka gbata undahe be Yekova. I aye rogo agu abaakporo dunduko du Yuda yo ka gbata Yekova.

⁵Yosafata ki ru dagba gbuu nga ga Yuda na ga Yerusarema, rogo ga Yekova bambu yo, barangba vovo vurukporo.

⁶Ko ki ya, “Ako Yekova, ga abarani Mbori, a nga mo nga Mbori du ngbangbaturũ yo te? A nga mo du ni bazogo ku ri angbi nga ga arikaaboro dunduko te? Tandu du be ro na ome, si du a nga boro sa ka zingi kuti ro te.

⁷Ako gaani Mbori, a nga mo naado agu aboro nanaraka rogo gi ringara re barangba gamo aboro aYisaraere, ki fu he fu ngbatunga Abarayama nga wene badiaro nye anye kindi, te?

⁸I ki niraki yo, ki dua kparakpara ba yo tipa rimoro, niya,

⁹‘Ka gbigbitapai ye ku ri rani, watadu basape, na sarangbanga, watadu tata kaza gberãngbi, watadu ngbongi, ani arú barangba gi bambu re, na ku bara bangiro, bambiko rimoro du ti gi bambu re, ani anikpari foro rago gaani fudifudiapai, mo ki nigi he agia ki batasi rani.’

¹⁰Ono mo ngére awere, aAmono naye na aMoabo na aboro Bagangara Seira, nga agu yo mo aida nga fu aYisaraere i zuba yo ya, ho i akuru ni Ezipeta yo, ono i aaria tiyo ku bani ti yo, ka i agbarasa nga yo ya―

¹¹mo ngére, waĩ nafu mosoro fu rani, i naye ka ba rani ku sa yo ti ga ringara, nga gu mo afu he fu rani si du ni gaani.

¹²Ako gaani Mbori, mo asápa nga ngbanga yo te? Bambiko ome ti rani kuti gi bakere rimbasa naye sa rani te re. Ani aina nga gu pai ka ani mangi he a te, ono bangirani ti kina ro.”

¹³AYudo ki ru dunduko ku bara bangiri Yekova, na gayo rukutu agude na adiayo, na awiriyo.

¹⁴Ga Yekova Toro ki ye ku ri Yaziere nangia wiri Zekaraya, Zekaraya ki ngia wiri Benaya, Benaya ki ngia wiri Yiere, Yiere ki ngia wiri Mataniya, Mataniya ki ngia boro Revi dagba awiri Asafa, Toro aye ku ri Yaziere dagba gbuu.

¹⁵Ko ki ya, “Oni dége turoni, oni nga aYudo dunduko na agu roni naraka Yerusarema yo, na mo a nga Bakindo Yosafata: Ya Yekova fu roni wẽ, ‘Ka oni gúnde nga ya, ka oni yúngura nga be gi bakere rimbasa re a ya; bambiko gu vura re gaoni nga ha te ono ga Mbori du.

¹⁶Oni ndú gba fuo yo; oni ngére, i aye babita du Zizi yo. Oni abí yo ti digida ngboongboorago yo, du ku uroyo pati ngbakungba Yeruwere.

¹⁷Ako Yuda na Yerusarema, oni asó nga gi vura te re; oni ríngbisi ti roni, oni ki ru aru zaa, ka bi gu diabese nga ga Yekova du tipa roni.’ Ka oni gúnde nga ya, ka oni yúngura nga ya; oni ndú gba sa yo, bambiko Yekova adú na oni.”

¹⁸Yosafata ki zogo riko na kpakpuko ku sende, aYudo dunduko na agu aboro nanaraka Yerusarema yo ki tiwi ku sande bara bangiri Yekova, ki niirisi Yekova.

¹⁹ARevi naadu ni ngbatunga Koata na ngbatunga Kora, i ki ru ku ari ka tambua Yekova, ga aYisaraere Mbori, na bakere wawa ku ari.

²⁰I ki guari ngbatutu wiso ka ndu ku rogo gu ngbakungba du Tekua yo. Wa i andu, Yosafata ki ru ki ya, “Oni gí sangbare, Ako Yuda, na agu roni ninaraka Yerusarema yo! Oni ídi pa Yekova gaoni Mbori, si oni ka du ti ni nyanyaki; oni ídi pa gako anebi, si oni ka u ti ni.”

²¹Ho ko arugu pai ni na aboro, ko ki ringbisi agu yo i bi bia fu Yekova, ka tambua ko na wene ziazia aroko ti kpotoyo, wa i ka ngbe ku mbata yo fu rikavura, ki ya, “Oni fú atambuahe fu Yekova, bambiko gako weneringise nye anye kindi.”

²²Ho i atona bi bia ni na ka tambua he, Yekova ki ringbisi pa runguru kuti aAmono, na kuti aMoabo na kuti aboro Bagangara Seira a, nga agu yo naye kuti aYudo, i ki du ni mangimangi yo.

²³Bambiko aAmono na aMoabo azingi kuti agu aboro ninaraka Bagangara Seira yo, ka gbarasa yo kpakaya. Ho i adigisi pa nyasa agu aboro ni nanaraka Seira yo, aboro ni ba sa sa ki niimi kina akura yo.

²⁴Ho aYudo abiti ni ku ngbaho ga ababandarago bambu yo naadu ngbakungba yo, i ki ngere koyo du rimbasa ni; i ki bi yo, i dunduko ki du ni kina kangba aboro napiki sande; a nga gu ni sa nabati te.

²⁵Ho Yosafata aye ni na gako aboro ka roga gbugbu ahe be yo, i abi dungu a ũkumuko yo, na kikiipa ũfongahe, nga gu i arogo tipa yo, ka ome yo arengba nga ka tinda ha ku sa yo dunduko ya. I ki tindi gu gbugbu ahe re rame ki du biata, bambiko wa si adu ni bakere he.

²⁶Ti biama rame i ki dungura tiyo ku rogo Ngboongboorago Beraka, bambiko yo i asambua Yekova ni; si du i ayambu gu ba ti ni re nga Ngboongboorago Beraka daku areme.

²⁷I ki karaga tiyo dunduko, nga aboro Yuda na aboro Yerusarema a, Yosafata ki ngbe ku mbata yo fu yo, ka ga berewe ku Yerusarema yo na ngbarago, bambiko Yekova aunda yo i ngi ku ri avurayo.

²⁸I ki ye ku Yerusarema yo, na woro akindondo na anzenze na ambanya ki da ti ga Yekova bambu.

²⁹Gunde Mbori adu ku ri angbi nga ga aringara ho i agi he ni ya Yekova so vura kuti avura aYisaraere.

³⁰Si du ga Yosafata ngbi ki du adu zezeredi, bambiko gako Mbori afu zereda fu ko pati ko kirikiri.

³¹Were Yosafata ki zogo ringara Yuda. Garãko adu 35 ho ko atona zoga rago ni, ko ki zogo rago Yerusarema yo garã ki du 25. Rimo nako nangia Azuba nangia wiri Siri.

³²Ko apeka kina sino Asa nangia bako, ka ko aguari nga ti ni ya, ko ki nimangi gu pai ru aru bangiri Yekova.

³³Ono i aroga nga gu tumbatumba arago ku sa yo te; bambiko aboro ata maa nga kpotoyo yo tipa ga abayo Mbori a te.

³⁴Were kura ga Yosafata apai, bambata ha na yangara ha, si ni keke he rogo ga Yeu kitabu pekapai nangia wiri Anani, nga gu du ni keke he rogo gu Kitabu nga ga pa Abakindo aYisaraere.

³⁵Fuo gi pai re Yosafata bakindo aYudo ki kpamia tiko kuti Azaya bakindo aYisaraere, nga gu ko namangi pai ni gbigbita ha gbe

³⁶Ko ki kodi tiyo na ko ka manga abaakurungba si nindu ku Tarusisa yo. I amangi agu abaakurungba re Esiona-gebere yo.

³⁷Eriazere wiri Dodavau boro Maresa ki gumba pai kuti Yosafata, ki ya, “Bambiko mo kpamia tiro kuti Azaya, Yekova agbárasa gu sunge mangi mo.” Abaakurungba agberẽ he baime, ka si arengba nga ka ndu ku Tarusisa yo ya.